• translate
Minati Mishra

News Highlights

  • ୨୪ ଘଣ୍ଟା ଧରି ଉତ୍ତରପ୍ରଦେଶର ଅଧିକାଂଶ ଅଞ୍ଚଳରେ ପ୍ରବଳ ବର୍ଷା

  •  ସାଧାରଣ ଜୀବନଯାତ୍ରା ବ୍ୟାହତ

  •  ବର୍ଷା ଯୋଗୁ  ୧୬ ଜଣଙ୍କର ଗଲାଣି ପ୍ରାଣ

ଲକ୍ଷ୍ନୌ: ଗତ ୨୪ ଘଣ୍ଟା ଧରି ଉତ୍ତରପ୍ରଦେଶର ଅଧିକାଂଶ ଅଞ୍ଚଳରେ ପ୍ରବଳ ବର୍ଷା ଲାଗି ରହିଛି। ଏହି କାରଣରୁ ସାଧାରଣ ଜୀବନଯାତ୍ରା ବ୍ୟାହତ ହୋଇଛି।  ବିଭିନ୍ନ ସ୍ଥାନରେ ଘର ଭୁଶୁଡ଼ି ପଡ଼ିଛି । ବର୍ଷା ଯୋଗୁ  ଏପର୍ଯ୍ୟନ୍ତ ୧୬ ଜଣ ପ୍ରାଣ ହରାଇଛନ୍ତି ।   ଅନେକ ଲୋକ ଆହତ ହୋଇ ଚିକିତ୍ସିତ ହେଉଛନ୍ତି। ବର୍ଷା ଯୋଗୁଁ ଜନଜୀବନ ନଷ୍ଟ ହେଉଥିବାରୁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ବିପନ୍ନମାନଙ୍କୁ ଆର୍ଥିକ ସହାୟତା ଏବଂ ଚିକିତ୍ସା ସୁବିଧା ଯୋଗାଇ ଦେବା ପାଇଁ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।

ମିଳିଥିବା ସୂଚନା ଅନୁଯାୟୀ,  ଜୋନପୁର ଏବଂ ଫତେହପୁରରେ ଘରର ଛାତ ଓ କାନ୍ଥ ଭୁଶୁଡ଼ିବା କାରଣରୁ ଚାରି ଜଣଙ୍କର ମୃତ୍ୟୁ ଘଟିଛି। ସେହପରି ବାରବାଙ୍କିରେ ଦୁଇ ଜଣ, ଆମେଠିରେ ଦୁଇ ଜଣ, କୌଶମ୍ବୀ, ସୀତାପୁର, ଅଯୋଧ୍ୟା ଏବଂ ରାଏବରେଲିରୁ ଜଣେ ଲେଖାଏଁ ପ୍ରାଣ ହରାଇଥିବାର ସୂଚନା ମିଳିଛି।

ଜୋନପୁରର ସୁଜାନଗଞ୍ଜ ଅଞ୍ଚଳର ସାରଖାନି ଗ୍ରାମରେ କଚ୍ଚା ଘରର ଛାତ ଭୁଶୁଡ଼ିବା କାରଣରୁ ଗୋଟିଏ ପରିବାରର ତିନି ଜଣଙ୍କର ମୃତ୍ୟୁ ଘଟିଛି।  ଦୁଇ ଜଣ ଆହତ ମଧ୍ୟ ହୋଇଛନ୍ତି। ମୃତକଙ୍କ ମଧ୍ୟରେ ଭାରତଲାଲ ଜୈସୱାଲ୍ (୪୦), ତାଙ୍କ ପତ୍ନୀ ଗୁଲାବା ଦେବୀ (୩୬) ଏବଂ ୯ ବର୍ଷର ଝିଅ ସାକ୍ସିଙ୍କର ରହିଛନ୍ତି।

ଫତେହପୁରରେ ଗତ ୪୮ ଘଣ୍ଟା ଧରି ଲଗାଣ ବର୍ଷା ଲୋକମାନଙ୍କୁ ବିପଦ ଘେରକୁ ଟାଣି ନେଇଛି। ଜିଲ୍ଲାର ତିନିଟି ଭିନ୍ନ ଭିନ୍ନ ସ୍ଥାନରେ କାନ୍ଥ ଭୁଶୁଡ଼ି ପଡ଼ିଥିବାରୁ ଛାତର ଆବର୍ଜନା ତଳେ ତିନି ପିଲାଙ୍କ ସମେତ ଚାରି ଜଣଙ୍କର ମୃତ୍ୟୁ ଘଟିଛି । ଏଥିସହିତ ଦମ୍ପତିଙ୍କ ସମେତ ୩ ଜଣଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଛି।  ରାଜସ୍ୱ ଅଧିକାରୀ ଘଟଣା ସ୍ଥଳରେ ପହଞ୍ଚି ସମସ୍ତ ସମ୍ଭାବ୍ୟ ସହାୟତା ନିଶ୍ଚିତ କରିଛନ୍ତି। ସେହପରି ଦରିଆପୁର ଗାଁରେ ୧୩ ବର୍ଷର ଜଣେ ବାଳିକା ଓ ୩ ବର୍ଷର ଜଣେ ବାଳକଙ୍କର ମୃତ୍ୟୁ ଘଟିଛି।

ବାରବାଙ୍କିରେ ମଧ୍ୟ ୧୨ ଘଣ୍ଟା ଧରି ପ୍ରବଳ ବର୍ଷା ହେତୁ ଦୁଇ ଜଣଙ୍କର ମୃତ୍ୟୁ ଘଟିଛି। ରାମସେନିହାଟ ପୋଲିସ ଷ୍ଟେସନ ଅଞ୍ଚଳର ବାସିଗାପୁର ଗ୍ରାମରେ ଏକ କଚ୍ଚା କାନ୍ଥ ଭୁଶୁଡ଼ିବା କାରଣରୁ ବାପା-ପୁଅଙ୍କର ଘଟଣାସ୍ଥଳରେ ମୃତ୍ୟୁ ଘଟିଛି। ଗ୍ରାମବାସୀମାନେ ବାପା ଓ ପୁଅର ମୃତଦେହ ବାହାର କରିଥିଲେ। ପୋଲିସ ମୃତଦେହକୁ ପୋଷ୍ଟମର୍ଟମ ପାଇଁ ପଠାଇଥିଲା।

ଅଯୋଧ୍ୟାରେ ମଧ୍ୟ ପ୍ରବଳ ବର୍ଷା ହେତୁ ଜନଜୀବନ ବ୍ୟାହତ ହୋଇଛି। ପୁରକଲନ୍ଦର ଥାନା ଅଧୀନ ଦୋଷ୍ଟପୁର ଗାଁରେ ଘରର ମାଟି କାନ୍ଥ ଭୁଶୁଡ଼ି ପଡ଼ିବାରୁ ବୃଦ୍ଧଙ୍କର ମୃତ୍ୟୁ ଘଟିଛି। ଅନ୍ୟଜଣେ ବୃଦ୍ଧା ଏବଂ ତାଙ୍କର ନାତି ଆହତ ହୋଇଛନ୍ତି। ଏଭଳି ଅନେକ ଭୟାବହ ଦୁର୍ଘଟଣା ରାଜ୍ୟର ସମସ୍ତ ଅଞ୍ଚଳରେ ଦେଖିବାକୁ ମିଳିଛି।  

Other Stories