LIVE TV
ନୂଆଦିଲ୍ଲୀ: ପଞ୍ଜାବରେ ସିଏମ ପଦରୁ କ୍ୟାପଟେନ୍ ଅମରିନ୍ଦର ସିଂହଙ୍କ ଇସ୍ତଫା ପରେ ପଞ୍ଜାବ ରାଜନୀତିରେ କଂଗ୍ରେସ ଦଳ ଦିନକୁ ଦିନ ଦୁର୍ବଳ ହେଉଥିବାର ଦେଖାଯାଉଛି। ଏଭଳି ପରିସ୍ଥିତିରେ କ୍ୟାପଟେନଙ୍କ ପତ୍ନୀ ତଥା ସାଂସଦ ପ୍ରୀତି କୋର୍ କଂଗ୍ରେସ ହାଇକମାଣ୍ଡ ଉପରେ ନିଜର କ୍ରୋଧ ଦେଖାଇଛନ୍ତି। ନିକଟରେ ଗଣମାଧ୍ୟମକୁ ଦେଇଥିବା ଏକ ସାକ୍ଷାତକାରରେ ସେ କହିଛନ୍ତି ଯେ ଯଦି ପଞ୍ଜାବ ରାଜନୀତିରେ ଏଭଳି ପରିସ୍ଥିତି ଜାରି ରହିବ, ତେବେ ଆସନ୍ତା ୨୦୨୨ ନିର୍ବାଚନରେ କଂଗ୍ରେସ ଦଳ ପାଇଁ ପଞ୍ଜାବର ୧୧୭ ଟି ଆସନ ମଧ୍ୟରୁ ୧୫ ଟି ଆସନ ପାଇବା କଷ୍ଟକର ହୋଇ ପଡିବ।
ସାଂସଦ ପ୍ରୀତି କୋର୍ କହିଛନ୍ତି ଯେ ଅମରିନ୍ଦର ସିଂ ଜଣେ ସୈନିକ ଏବଂ ସେ ଏହି ଯୁଦ୍ଧରେ ନିଶ୍ଚିତ ଭାବରେ ଜିତିବେ। କୃଷି ଆଇନ ସମ୍ପର୍କରେ ପ୍ରୀତ କୋର୍ କହିଛନ୍ତି ଯେ ପଞ୍ଜାବରେ ଚାଲିଥିବା ଏହି ସଂଘର୍ଷକୁ ବନ୍ଦ କରିବା ପାଇଁ କ୍ୟାପଟେନ ଅମରିନ୍ଦର ସିଂହ କେନ୍ଦ୍ରରେ ବିଜେପି ସରକାରଙ୍କ ବରିଷ୍ଠ ନେତାଙ୍କ ସହ ଯୋଗାଯୋଗ କରୁଛନ୍ତି ଏବଂ ଏନେଇ ଖୁବ୍ ଶୀଘ୍ର ଭଲ ଫଳାଫଳ ଆସିବ। ଆଗାମୀ ବିଧାନସଭା ନିର୍ବାଚନରେ କୃଷକଙ୍କ ଆନ୍ଦୋଳନ ଏକ ମୁଖ୍ୟ ପ୍ରସଙ୍ଗ ରହିବ ବୋଲି ସାଂସଦ ପ୍ରୀତି କୋର୍ କହିଛନ୍ତି।
Also Read
ପରୀନିତ କୋର୍ଙ୍କ କହିବାନୁଯାୟୀ କ୍ୟାପଟେନ ଅମରିନ୍ଦର ବର୍ତ୍ତମାନ କୃଷି ଆଇନର ସମୀକ୍ଷା କରୁଛନ୍ତି। ସେ ପଞ୍ଜାବର ସୁରକ୍ଷା ପ୍ରତି ବେଶ୍ ଚିନ୍ତିତ ରହିଛନ୍ତି। ୧୯୯୮ ରେ ଯେତେବେଳେ ପଞ୍ଜାବରେ କଂଗ୍ରେସ ସତ୍ତା ନଥିଲା, ସେହି ସମୟରେ ଅମରିନ୍ଦରଙ୍କ କଠିନ ପରିଶ୍ରମ ବଳରେ କଂଗ୍ରେସ ସତ୍ତାକୁ ଆସିଥିଲା। ୨୦୦୨ ରେ ସେ ପଞ୍ଜାବରେ କଂଗ୍ରେସ ସରକାର ଗଠନ କରିଥିଲେ। ୨୦୧୭ ବିଧାନସଭା ନିର୍ବାଚନରେ ପଞ୍ଜାବରେ ଆମ୍ ଆଦମୀ ପାର୍ଟି ସରକାର ଗଠନ କରାଯିବାର ଅନୁମାନ କରାଯାଉଥିବା ବେଳେ ସେ ଦିନ ରାତି ପରିଶ୍ରମ କରି କଂଗ୍ରେସକୁ ଏକ ରେକର୍ଡ ଭଙ୍ଗା ବିଜୟ ଦେଇଥିଲେ।
ପଟିଆଲାର ସାଂସଦ ପରୀନିତ୍ କୋରଙ୍କ କହିବାନୁଯାୟୀ ସେ ଏବେବି କଂଗ୍ରେସ ଦଳରେ ଅଛନ୍ତି ଏବଂ ପଞ୍ଜାବ ରାଜନୀତିରେ ଚାଲିଥିବା ଏହି ସଂଘର୍ଷକୁ ନେଇ କଂଗ୍ରେସ ହାଇକମାଣ୍ଡ ତୁରନ୍ତ ଉଚିତ୍ ପଦକ୍ଷେପ ନେବା ନିହାତି ଦରକାର। ସେ ସଚ୍ଚୋଟତା ସହ ପଟିଆଲାବାସୀଙ୍କ ସେବା କରୁଥିବାର କଥା କରିଛନ୍ତି। କଂଗ୍ରେସ ଦଳର ପାରସ୍ପରିକ କଳହ କାରଣରୁ ଏଭଳି ପରିସ୍ଥିତି ଦେଖାଯାଉଥିବା କଥା ସାଂସଦ କହିଛନ୍ତି। କ୍ୟାପଟେନ୍ଙ୍କୁ ମନାଇବା ପାଇଁ କଂଗ୍ରେସ ଦଳର କୌଣସି ବଡ ନେତା ତାଙ୍କ ନିକଟକୁ ଆସିଛନ୍ତି କି ନାହିଁ ପଚରାଯିବାରୁ ସେ କହିଛନ୍ତି ଯେ ଏଯାଏଁ କୌଣସି ନେତାଙ୍କ ସହ ମୋର ଆଲୋଚନା ହୋଇନାହିଁ । ଅମରିନ୍ଦର ନିଜ ନିଷ୍ପତ୍ତି ନିଜେ ନିଅନ୍ତି ବୋଲି ପରୀନିତ କୋର୍ ସ୍ପଷ୍ଟ କରିଛନ୍ତି।
