ରାଜ୍ୟରେ ସକ୍ରିୟ ହୋଇ ଉଠିଛି ଭିଜିଲାନ୍ସ, ଜାଣନ୍ତୁ ଆଜି କେଉଁ ସ୍ଥାନରେ ଚଢାଉ କଲା ଟିମ୍

ଭିଜିଲାନ୍ସ ଜାଲରେ ଆଉ ଜଣେ PEO

ବଲାଙ୍ଗୀର:  ଭିଜିଲାନ୍ସ ଜାଲରେ ଆଉ ଜଣେ PEO। ବଲାଙ୍ଗିର ସହରରେ ପଞ୍ଚମ ଦିନରେ ଭିଜିଲାନ୍ସ ଟିମର ରେଡ୍। ପୁଇଁତଳା ପଞ୍ଚାୟତ PEO ବିହାରିଲାଲ ବାରିକଙ୍କ ଘରେ ରେଡ୍ ଜାରି ରହିଛି। ଶାନ୍ତିପଡ଼ା ଘର ଓ ପୁଇଁତଳା ଅଫିସ ରେଡ୍ କରୁଛି ଭିଜିଲାନ୍ସ। ଆୟ ବହିର୍ଭୂତ ସମ୍ପତ୍ତି ଠୁଳ କରିବା ଅଭିଯୋଗରେ ଚଢ଼ାଉ ଜାରି ରହିଛି। ଏହି ଚଢାଉରେ ବଲାଙ୍ଗୀର, ସମ୍ବଲପୁର, ସୋନପୁର ଏବଂ ବରଗଡ ଜିଲ୍ଲାର ଭିଜିଲାନ୍ସ ଟିମ୍ ସାମିଲ ହୋଇଛନ୍ତି। ପିଇଓ ବାରିକଙ୍କ ଦୁଇ ମହଲା କୋଠା, ଜମିବାଡି, ନଗଦ ଟଙ୍କା, ସୁନା ଅଳଙ୍କାରକୁ ନେଇ ଭିଜିଲାନ୍ସର ଖୋଳତାଡ ଜାରି ରହିଛି।

ସେପଟେ,ବଲାଙ୍ଗିର ଜିଲ୍ଲା ଟିଟିଲାଗଡ଼ କେନ୍ଦ୍ର ସମବାୟ ବ୍ୟାଙ୍କ ଶାଖା ପରିଚାଳକଙ୍କ ଘରେ ଭିଜିଲାନ୍ସ ଚଢ଼ଉ। ଆୟ ବହିର୍ଭୁତ ସଂପତ୍ତି ଠୁଳ ଅଭିଯୋଗରେ ଲାଠୋର ଶାଖାର ମ୍ୟାନେଜର ସାଗର କଣାଙ୍କ ଘରେ ସକାଳୁ ଭିଜିଲାନ୍ସ ଚଢ଼ଉ କରିଛି। ଭିଜିଲାନ୍ସ ଟିମ୍ ସାଗରଙ୍କ ବଏଜ ହାଇସ୍କୁଲ ପଡ଼ାରେ ଥିବା ଘର, ଘୁନସରରେ ଥିବା ସ୍ବଶୁର ଘରେ ଏକକାଳୀନ ଚଢ଼ଉ କରୁଛି।

ସେପଟେ, ରାଜ୍ୟରେ ଲଗାତାର  ଭାବରେ ବଢିଚାଲିଛି ଭିଜିଲାନ୍ସ ଚଢାଉ। ତେବେ ମିଳିଥିବା ସୂଚନା ଅନୁସାରେ, ଗତକାଲି ମଧ୍ୟ ଜଗତସିଂହପୁର ଜିଲ୍ଲା ତିର୍ତ୍ତୋଲ କୋର୍ଟରେ ଏଏସଆଇ ଭାବେ କାର୍ଯ୍ୟରତ ରବୀନ୍ଦ୍ରନାଥ ସେନାପତିଙ୍କ ଘରେ ଭିଜିଲାନ୍ସ ରେଡ୍ ହୋଇଛି।

ଏହାସହ ଜଗତସିଂହପୁରର ଖେରସରେ ଥିବା ଦୁଇ ମହଲା ବିଶିଷ୍ଟ ବାସଭବନ, ଭୁବନେଶ୍ୱର ହଂସପାଳ ସୁରେଖା ବାଟିକା ଆପାର୍ଟମେଣ୍ଟରେ ଥିବା ଫ୍ଲାଟ, ଏରସମାର ଆନନ୍ଦପୁର ଗାଁରେ ଥିବା ପୈତୃକ ବାସଭବନ ଓ ତିର୍ତ୍ତୋଲ କୋର୍ଟ ଭିତରେ ଥିବା ଅଫିସରେ ଏକକାଳୀନ ଚଢ଼ାଉ କରିଛି ଭିଜିଲାନ୍ସ। ଆୟ ବହିର୍ଭୁତ ସଂପତ୍ତି ଠୁଳ ଅଭିଯୋଗ ଆସିବା ପରେ ଭିଜିଲାନ୍ସ ପକ୍ଷରୁ ସର୍ଚ୍ଚ ଓ୍ୱାରେଣ୍ଟ ଜାରି କରାଯାଇ ଚଢ଼ାଉ କରାଯାଇଛି।

ସେପଟେ ଗତକାଲି ବ୍ରହ୍ମପୁରର ଲିଙ୍ଗରାଜ ଲ କଲେଜର ବି କିରାଣିଙ୍କ ଘରେ ବି ଭିଜିଲାନ୍ସ ଚଢ଼ଉ ହୋଇଥିଲା। କଲେଜର କିରାଣି ତଥା ଟାଇପିଷ୍ଟ ଭାବେ କାର୍ଯ୍ୟରତ ପ୍ରଶାନ୍ତ କୁମାର ନାୟକଙ୍କ ୫ଟି ସ୍ଥାନରେ ବ୍ରହ୍ମପୁର ଭିଜିଲାନ୍ସ ଟିମ୍ ଚଢାଉ କରିଛି।
ଆସ୍କା ରୋଡ଼ରେ ଥିବା ପ୍ରଶାନ୍ତଙ୍କ ତିନି ମହଲା ବିଶିଷ୍ଟ କୋଠା ଓ ମୋଟର ପାର୍ଟସ ଦୋକାନ, ବ୍ୟାଙ୍କ କଲୋନିରେ ଥିବା ତିନି ମହଲା ବିଶିଷ୍ଟ ଘର, ଆସ୍କା ରୋଡ଼ରେ ଥିବା ଦୁଇ ମହଲା ବିଶିଷ୍ଟ ଗୋଦାମ ଘର, ବ୍ରହ୍ମପୁରର ବୃନ୍ଦାବତୀ ନଗରରେ ଭଡ଼ାରେ ଲାଗିଥିବା ଗୋଦାମ ଘର ଓ ବିଷ୍ଣୁ ନଗରରେ ଭଡ଼ାରେ ଲାଗିଥିବା ଗୋଦାମ ଘରେ ଏକକାଳୀନ ଚଢ଼ଉ କରାଯାଇଛି। ଏହାସହ ତାଙ୍କ ଘରୁ ନଗଦ ୧୮ ଲକ୍ଷ ୫ ହଜାର ୧୦ ଟଙ୍କା ଜବତ କରାଯାଇଥିବା ନେଇ ମଧ୍ୟ ସୂଚନା ମିଳିଛି।
ତେବେ କହିବାକୁ ଗଲେ, ଗତ କିଛିଦିନ ହେବ ରାଜ୍ୟରେ ଭିଜିଲାନ୍ସ ଚଢାଉ ମାମଲା ବଢିବାରେ ଲାଗିଛି। ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଗତକାଲି ରାଜ୍ୟର ତିନିଟି ସ୍ଥାନରେ ଚଢ଼ାଉ କରିଛି ଭିଜିଲାନ୍ସ। ଗତକାଲି ସକାଳୁ ସକାଳୁ ଭିଜିଲାନ୍ସ ଜାଲରେ ପଡ଼ିଥିଲେ ବଲାଙ୍ଗିର କେନ୍ଦ୍ରୀୟ ସମବାୟ ବ୍ୟାଙ୍କ ମ୍ୟାନେଜର ସୁଧୀର ନନ୍ଦ। ସମ୍ବଲପୁର ଭିଜିଲାନ୍ସର ୪ ଜଣିଆ ଟିମ୍, ମ୍ୟାନେଜର ସୁଧୀର ନନ୍ଦଙ୍କ ୨ଟି ଘର ଓ ବ୍ୟାଙ୍କ କାର୍ଯ୍ୟାଳୟରେ ଚଢ଼ାଉ କରି ନଗଦ ଟଙ୍କା ଓ ସୁନା ଅଳଙ୍କାର ଜବତ କରିଛି।
You might also like