୩୭୦ ଉଚ୍ଛେଦକୁ କାର୍ଗିଲ୍‌ରେ ବିରୋଧ; ପୁଲିସ୍‌ର ଲାଠି ଚାର୍ଜ୍

ନୂଆଦିଲ୍ଲୀ: ଜମ୍ମୁ-କଶ୍ମୀରର ବିଭାଜନ କରି ଭାରତ ସରକାର ଲଦାଖକୁ ଏହାଠାରୁ ଅଲଗା କରିଛନ୍ତି। ତେଣୁ ଲଦାଖ ଏବେ ଏକ ସ୍ୱତନ୍ତ୍ର କେନ୍ଦ୍ରଶାସିତ ଅଞ୍ଚଳ। ଲଦାଖରେ ଲେହ ଓ କାର୍ଗିଲ ଭଳି ସହର ରହିଛି। ହେଲେ କେନ୍ଦ୍ର ସରକାରଙ୍କ ଏଭଳି ବିଭାଜନ ନିଷ୍ପତ୍ତିକୁ କାର୍ଗିଲରେ ଜୋରଦାର ବିରୋଧ କରାଯାଇଛି। କାର୍ଗିଲବାସୀ ଏଭଳି ବିଭାଜନରେ ଖୁସି ଥିବା କେନ୍ଦ୍ର ସରକାର କହୁଥିଲେ ହେଁ ଏଠାରେ ଏକ ଭିନ୍ନ ଦୃଶ୍ୟ ଏବେ ସାମ୍ନାକୁ ଆସିଛି।

ଜମ୍ମୁ-କଶ୍ମୀରରେ ସରକାର ୧୪୪ ଧାରା ଜାରି କରିଥିବାରୁ ଲୋକମାନେ ବାହାରକୁ ବାହାରି ପାରୁନାହାନ୍ତି। ତଥାପି ପୁଞ୍ଚରେ କାଲି ସୁରକ୍ଷାକର୍ମୀ ଓ ସାଧାରଣ ଲୋକଙ୍କ ମଧ୍ୟରେ ସଂଘର୍ଷ ଦେଖିବାକୁ ମିଳିଥିଲା। ଆଜି କାର୍ଗିଲରେ ଅନୁରୂପ ଦୃଶ୍ୟ ଦେଖିବାକୁ ମିଳିଛି। କେନ୍ଦ୍ର ସରକାରଙ୍କ ବିରୋଧରେ ଆଜି ଶତାଧିକ ଲୋକ ରାଜରାସ୍ତାକୁ ଓହ୍ଲାଇଥିଲେ।

ସେମାନେ ଧାରା ୩୭୦ର ଉଚ୍ଛେଦ ଓ ଲଦାଖକୁ କଶ୍ମୀରରୁ ଅଲଗା କରିଥିବାରୁ ଲୋକମାନେ କେନ୍ଦ୍ର ସରକାର ବିରୋଧରେ ନାରାବାଜି କରିଥିଲେ। ଏହାକୁ ନେଇ ସୁରକ୍ଷାକର୍ମୀ ଓ ସାଧାରଣ ଲୋକ ଦୀର୍ଘ ସମୟ ଧରି ମୁହାଁମୁହିଁ ହୋଇଥିଲେ। ଲୋକଙ୍କୁ ଘଉଡ଼ାଇବା ପାଇଁ ପୁଲିସ୍‌ ପକ୍ଷରୁ ଲାଠିଚାର୍ଜ କରାଯିବା ସହ ଲୁହବୁହା ଗ୍ୟାସ୍‌ ମଧ୍ୟ ପ୍ରୟୋଗ କରାଯାଇଥିଲେ। ଏବେ ବି କାର୍ଗିଲରେ ୧୪୪ ଧାରା ଲାଗୁ କରାଯାଇଛି। ଇଣ୍ଟରନେଟ୍‌, ମୋବାଇଲ୍‌ ଓ ଲ୍ୟାଣ୍ଡଲାଇନ୍‌କୁ ବନ୍ଦ କରାଯାଇଛି।

ଲୋକସଭାରେ ଜମ୍ମୁ-କଶ୍ମୀର ସଂକ୍ରାନ୍ତ ବିଲ୍‌ ଉପରେ ଆଲୋଚନା ଚାଲିଥିବା ବେଳେ ଲଦାଖର ଯୁବ ସାଂସଦ ଜାମୟାଙ୍ଗ୍‌ ସେରିଙ୍ଗ୍‌ ନମଗ୍ୟାଲ୍‌ ନିଜର ଓଜସ୍ୱୀ ଭାଷଣରେ ସାରା ସଂସଦକୁ ସ୍ତବ୍ଧ କରିଦେଇଥିଲେ। ସାରା ଦେଶରେ ଏହାକୁ ନେଇ ଚର୍ଚ୍ଚା ଆରମ୍ଭ ହୋଇଥିଲା। ବିତର୍କ ବେଳେ ନମଗ୍ୟାଲ୍‌ କହିଥିଲେ, କାର୍ଗିଲବାସୀ ସ୍ୱତନ୍ତ୍ର ଲଦାଖ ପାଇଁ ବିଜେପିକୁ ଭୋଟ ଦେଇଥିଲେ। ସେମାନେ ଲଦାଖକୁ ସ୍ୱତନ୍ତ୍ର କେନ୍ଦ୍ର ଶାସିତ ଅଞ୍ଚଳ ଭାବେ ଘୋଷଣା କରିବାକୁ ଦାବି କରୁଛନ୍ତି। ହେଲେ ଆଜିର ଘଟଣା ପରେ ଲଦାଖର ଅନେକ ଲୋକଙ୍କ ମନରେ ବିରୋଧ ଭାବ ଥିବା ସ୍ପଷ୍ଟ ହୋଇଯାଇଛି।

You might also like