ରାଜନୀତି କ୍ଷେତ୍ରରେ କିଭଳି ପରିବର୍ତ୍ତନ ଆଣିବ ନୂଆବର୍ଷ ? କଣ କହୁଛନ୍ତି ଜ୍ୟୋତିର୍ବିଦ୍? ପଢନ୍ତୁ –

ଭୁବନେଶ୍ୱର : ନବୀନଙ୍କ ପାଇଁ କାଠିକର ପାଠ ହେବ ୨୦୧୯। ଆଉ ସେପଟେ ଦିଲ୍ଲୀରେ ଟଳମଳ ହେବ ମୋଦିଙ୍କ ଗାଦି। ଜ୍ୟୋତିର୍ବିଦ୍‌ଙ୍କ ଅନୁସାରେ, କିଛି ଏଭଳି ସଂକେତ ଦେଉଛି ରାଜ୍ୟ ଓ କେନ୍ଦ୍ର ମୁଖିଆଙ୍କ ଭାଗ୍ୟରେଖା।

ଆସନ୍ତା ସାଧାରଣ ନିର୍ବାଚନରେ ବିଜେପି ସଂଖ୍ୟା ଗରିଷ୍ଠତା ହାସଲ କଲେ ମଧ୍ୟ ବିପୁଳ ବହୁମତ ପାଇବା ମୁସ୍କିଲ। ଝୁଲା ସରକାର ବି ହୋଇପାରେ।  ପୁଣି ସରକାରକୁ ଆସିବା ପାଇଁ ବିଜେପିକୁ ଅନ୍ୟ କ୍ଷୁଦ୍ର ଦଳଙ୍କ ସହ ଗଠବନ୍ଧନ କରିବାକୁ ପଡ଼ିପାରେ। ଫେବୃୟାରୀ ୨୬ରୁ ଏପ୍ରିଲ୍୧ ଯାଏଁ ପ୍ରଧାନମନ୍ତ୍ରୀ ମୋଦିଙ୍କ ଭାଗ୍ୟରେ ସର୍ବାର୍ଥ ସିଦ୍ଧି ଯୋଗ ରହିଛି।

ତେବେ କଂଗ୍ରେସ ସଭାପତି ରାହୁଲ ଗାନ୍ଧି ପୂର୍ବାପେକ୍ଷା ଭଲ ପ୍ରଦର୍ଶନ କଲେ ମଧ୍ୟ ଗାଦି ହାସଲ କରିପାରିବେ ନାହିଁ ବୋଲି କହିଛନ୍ତି ଜ୍ୟୋତିର୍ବିଦ୍। ଏପଟେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପାଇଁ ବି ସଂଘର୍ଷମୟ ହେବ ନୂଆବର୍ଷ।

ବର୍ଷ ଆରମ୍ଭରୁ ଶୁଭଫଳ ଥିଲେ ବି ମାର୍ଚ୍ଚ ୯ ତାରିଖରୁ ଗ୍ରହ ଚଳନ ବଦଳିବା ସହ ସମସ୍ୟା ବଢ଼ିବ। ସେହି ସମୟକୁ ନିର୍ବାଚନ ବି ରହିଛି। ବିରୋଧୀ ଦଳର ଭୂମିକା ପୂର୍ବାପେକ୍ଷା ଗୁରୁତ୍ୱପୂର୍ଣ୍ଣ ରହିବ ଏବଂ ନବୀନଙ୍କୁ ସରକାରକୁ ଆସିବା ପାଇଁ ମଧ୍ୟ ଅନ୍ୟ କ୍ଷୁଦ୍ର ଦଳଙ୍କ ସହ ହାତ ମିଶେଇବାକୁ ପଡ଼ିପାରେ ବୋଲି ଜ୍ୟୋତିର୍ବିଦ୍ ମତ ଦେଇଛନ୍ତି। ସେହିପରି ଏପ୍ରିଲ୍ ମାସ ବେଳକୁ ନବୀନଙ୍କ ସ୍ୱାସ୍ଥ୍ୟ ସମସ୍ୟା ଦେଖା ଦେଇପାରେ କହିଛନ୍ତି ଜ୍ୟୋର୍ତିବିଦ୍‌।

ଅନ୍ୟ କ୍ଷେତ୍ରକୁ ଦେଖିଲେ ୨୦୧୯ମସିହା ରାଜ୍ୟର କୃଷକଙ୍କ ପାଇଁ ଶୁଭଫଳ ଆଣିବା ସହ ଶିକ୍ଷା ଓ ବ୍ୟବସାୟ କ୍ଷେତ୍ରରେ ମଧ୍ୟ ଶୁଭପ୍ରଦ ହେବ। ତେବେ ରାଜ୍ୟକୁ ଅଧିକ ଦୈବୀ ଦୁର୍ବିପାକ ଯୋଗ ରହିଛି। ସେହିପରି ନୂଆ ବର୍ଷରେ ଦେଶକୁ କ୍ରୀଡ଼ା କ୍ଷେତ୍ରରେ ସଫଳତା ମିଳିବ ବୋଲି ପୂର୍ବାନୁମାନ କରିଛନ୍ତି ଜ୍ୟୋତିର୍ବିଦ୍।

You might also like