ପୋଲିସ ଅଫିସର ହେଲେ କିନ୍ତୁ ଖୋଲିଗଲା ପୋଲ୍‌….

ଛତିଶଗଡ଼: ଛତିଶଗଡ଼ର ଜଣେ ଯୁବକଙ୍କର ସ୍ୱପ୍ନ ଥିଲା ପୁଲିସ ଅଫିସର ହେବେ । ଦିନ ପରେ ଦିନ ଗଡ଼ି ଚାଲିଲା, ହେଲେ ସେ ପୁଲିସ ଅଫିସର ହୋଇ ପାରିଲେ ନାହିଁ।  ହତାଶ ହେଲେ, କିନ୍ତୁ ଭାଙ୍ଗି ପଡ଼ିଲେ ନାହିଁ। ସ୍ୱପ୍ନ ପୂରଣ କରିବାକୁ ଉପାୟ ଖୋଜିଲେ ଆଉ ସଫଳ ହେଲେ ମଧ୍ୟ। ହେଲେ ସେ କ’ଣ ଜାଣିଥିଲେ ସ୍ୱପ୍ନ ତାଙ୍କ ପାଇଁ ଏମିତି ମହଙ୍ଗା ପଡ଼ିବ ବୋଲି।

ଛତିଶଗଡ ପୋଲିସର କହିବା ଅନୁଯାୟୀ, ରାମେଶ୍ୱର ପଟେଲ ନାମକ ଜଣେ ବ୍ୟକ୍ତି ବାରାଦ୍ୱାରା ଅଞ୍ଚଳରେ ରୁହନ୍ତି। ସ୍ଥାନୀୟ କଲେଜରେ ଏମ.ଏ କରୁଥିଲେ। ଜୀବନର ଲକ୍ଷ୍ୟ ଥିଲା ପୁଲିସ ଅଫିସର ହେବେ। ହେଲେ ଯେତେବେଳେ ଦେଖିଲେ ତାଙ୍କର ସ୍ୱପ୍ନ ପୂରଣ ହେଲାନି, ସେ ଏହାକୁ ସତ କରିବା ପାଇଁ ଏକ ଉପାୟ ପାଞ୍ଚିଲେ।

ପୋଲିସ ପୋଷାକ ପିନ୍ଧି ସେ ନିଜର କାରନାମା ଦେଖାଇବାକୁ ଲାଗିଲେ। ପୋଷାକରେ ଏଏସଆଇ ଅବିନାଶ ସାହୁ ଲେଖା ଥିବା ଏକ ନେମ୍‌ ପ୍ଲେଟ ଲଗାଇ ଗାଡ଼ିରେ ଘୂରି ବୁଲିଲେ। ଏପରିକି ଗ୍ରାମାଞ୍ଚଳକୁ ଯାଇ ସେଠାରେ ଲୋକଙ୍କୁ ହଇରାଣ ମଧ୍ୟ କଲେ। ତାଙ୍କର ବ୍ୟବହାର ଦେଖି ଲୋକଙ୍କ ମନରେ ସନ୍ଦେହ ସୃଷ୍ଟି ହେଲା। ଶେଷରେ ଗାଁ ଲୋକେ ପୋଲିସ ଷ୍ଟେସନକୁ ଗଲେ। ସେଠାରେ ସେ ନକଲି ପୋଲିସ ବୋଲି ଜଣା ପଡ଼ିଲା।

ପୁଲିସ ଉକ୍ତ ଯୁବକଙ୍କୁ ଗିରଫ କରିଛି। ତେବେ ସେ କାହାକୁ ହଇରାଣ କରୁ ନ ଥିଲେ ବୋଲି କହିଛନ୍ତି। ସେ କେବଳ ନିଜର ଇଚ୍ଛା ପୂରଣ କରିବା ପାଇଁ ଦୋକାନରୁ ପୋଲିସ ପୋଷାକ କିଣି ପିନ୍ଧିଥିଲେ ବୋଲି କହିଛନ୍ତି।

You might also like