ଆଇସିଜେ ଛାଟ; କୁଳଭୂଷଣଙ୍କ ପାଇଁ ଆର୍ମି ଆଇନ୍‌ ପରିବର୍ତ୍ତନ କଲା ପାକିସ୍ତାନ

ଇସଲାମାବାଦ: ଇଣ୍ଟରନ୍ୟାଶନାଲ କୋର୍ଟ ଅଫ ଜଷ୍ଟିସ୍‌(ଆଇସିଜେ)ର ଛାଟ ପରେ ଏବେ ପାକିସ୍ତାନ ଅକଳରେ ପଡ଼ିଯାଇଛି। ଭାରତର ପୂର୍ବତନ ନୌସେନା ଅଧିକାରୀ କୁଳଭୂଷଣ ଯାଦବଙ୍କ ମାମଲାକୁ ଏକପାଖିଆ ଭାବେ ସାମାରିକ କୋର୍ଟରେ ବିଚାରକରି ତାଙ୍କୁ ଫାଶୀ ଦଣ୍ଡରେ ଦଣ୍ଡିତ କରିଥିବା ପାକିସ୍ତାନ ଏବେ ନିଜର ନିଷ୍ପତ୍ତି ବଦଳାଇଛି।

କୁଳଭୂଷଣ ଏବେ ସିଭିଲିଆନ୍‌ କୋର୍ଟରେ ନିଜ ନିର୍ଦ୍ଦୋଷର ପ୍ରମାଣ ଦେବାକୁ ଆବେଦନ କରିପାରିବେ ବୋଲି ପାକିସ୍ତାନ ପକ୍ଷରୁ ବ୍ୟବସ୍ଥା କରାଯାଇଛି। ଏଥପାଇଁ ପାକିସ୍ତାନ ସରକାର ନିଜ ଦେଶର ଆର୍ମି ଆଇନ୍‌ରେ ସଂଶୋଧନ ମଧ୍ୟ କରିଛନ୍ତି। ସୂତ୍ର ଅନୁସାରେ, ଯାଦବଙ୍କ ପାଇଁ ପାକିସ୍ତାନ ତା’ର ଆର୍ମି ଆକ୍ଟରେ ପରିବର୍ତ୍ତନ କରିଛି। ପୂର୍ବରୁ ଆର୍ମି ଆକ୍ଟରେ ଥିବା ବ୍ୟବସ୍ଥା ଅନୁଯାୟୀ, ଗୁଇନ୍ଦାଗିରି ଅଭିଯୋଗରେ ଗିରଫ ହେଉଥିବା ବ୍ୟକ୍ତିବିଶେଷ ବା ସଂଗଠନଙ୍କ ବିଚାର ପାକିସ୍ତାନ ସେନାର ସାମରିକ କୋର୍ଟରେ କରାଯାଉଥିଲା। ହେଲେ ଏବେ ଏହି ଆଇନ୍‌ରେ ସ୍ୱତନ୍ତ୍ର ସଂଶୋଧନ କରାଯାଇଛି।

ଏହାର ଅର୍ଥ କୁଳଭୂଷଣ ଯାଦବ ନିଜର ଗିରଫଦାରୀ ବିରୋଧରେ ସିଭିଲିଆନ କୋର୍ଟ ବା ସାଧାରଣ ଲୋକଙ୍କ ମାମଲା ଗୁଡ଼ିକର ଶୁଣାଣି ହେଉଥିବା କୋର୍ଟରେ ଆବେଦନ କରିପାରିବେ।
୨୦୧୬ ମାର୍ଚ୍ଚ ୩ ତାରିଖରେ ପାକିସ୍ତାନ ସେନା କୁଳଭୂଷଣ ଯାଦବଙ୍କୁ ଗୁଇନ୍ଦାଗିରି ଅଭିଯୋଗରେ ବାଲୋଚିସ୍ତାନରୁ ଗିରଫ କରିଥିବା ଦାବି କରିଥିଲା। ଏହାପରେ ତାଙ୍କ ବିଚାର ସାମରିକ କୋର୍ଟରେ କରାଯାଇ ଫାଶୀ ଦଣ୍ଡରେ ଦଣ୍ଡିତ କରାଯାଇଥିଲା। ତେବେ ଏହା ବିରୋଧରେ ଭାରତ ସରକାର ଆଇସିଜେକୁ ଯାଇଥିଲେ।

ଗତମାସରେ ଆଇସିଜେ ୧୫-୧ ଭୋଟରେ ପାକିସ୍ତାନର ଏଭଳି କାର୍ଯ୍ୟାନୁଷ୍ଠାନକୁ ତୀବ୍ର ନିନ୍ଦା କରିଥିଲେ। ଏଥିସହ କୁଳଭୂଷଣ ଯାଦବଙ୍କ ଫାଶୀ ଉପରେ ରୋକ ଲଗାଇବା ସହ କୋର୍ଟ ତାଙ୍କୁ କନସୁଲାର ଆକ୍ସେସ ଯୋଗାଇ ଦେବାକୁ ମଧ୍ୟ କହିଥିଲେ।

You might also like