ସୋମବାର କାର୍ଯ୍ୟାଳୟକୁ ଫେରିବେ କେନ୍ଦ୍ରମନ୍ତ୍ରୀ !

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଗଠିତ ମନ୍ତ୍ରୀ ପରିଷଦର ସମସ୍ତ ସଦସ୍ୟମାନେ ନିଜ ନିଜ କାର୍ଯ୍ୟାଳୟକୁ ଫେରିବେ। ସୋମବାରଠାରୁ ସେମାନେ କାର୍ଯ୍ୟାଳୟ ଆସିବେ ବୋଲି ବିଶେଷ ସୂତ୍ରରୁ ଜଣାପଡ଼ିଛି।

କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଏବଂ ଅର୍ଥମନ୍ତ୍ରୀ ନିର୍ମଳା ସୀତାରମଣ ଆଦି ମଧ୍ୟ କାର୍ଯ୍ୟାଳୟକୁ ଫେରିବେ। ମଙ୍ଗଳବାର ଲକ୍‌ଡାଉନ୍‌ ଅବଧି ସରିବାକୁ ଥିବାବେଳେ ଏହା ପୂର୍ବରୁ ହିଁ ଏହି ମନ୍ତ୍ରୀମାନେ କାର୍ଯ୍ୟାଳୟକୁ ଫେରିବେ।

ଯୁଗ୍ମ ସଚିବ ଏବଂ ଏହି ପହ୍ୟାଠାରୁ ଊର୍ଦ୍ଧ୍ୱ ସଚିବମାନେ ପୂର୍ବଭଳି ରିପୋର୍ଟ କରିବେ ବୋଲି ସୂଚନା ମିଳିଛି । ସମସ୍ତ କର୍ମଚାରୀଙ୍କ ଏକ ତୃତୀୟାଂଶ କାର୍ଯ୍ୟରେ ଯୋଗଦେବେ। ଜୁନିଅରମାନେ ରୋଟେସନ୍‌ ଭିତ୍ତିରେ କାର୍ଯ୍ୟ କରିବେ।

ପ୍ରଧାନମନ୍ତ୍ରୀ ପୂର୍ବରୁ ଆହ୍ୱାନ କରିଛନ୍ତି, ଏହି କାର୍ଯ୍ୟାଳୟ ସବୁରେ ସାମାଜିକ ଦୂରତାକୁ ଗୁରୁତ୍ୱ ଦିଆଯିବ। ଗତ ମାସକ ପୂର୍ବରୁ ସରକାର ୱାର୍କ ଫ୍ରମ୍‌ ହୋମ୍‌ ପାଇଁ ନିର୍ଦ୍ଦେଶ ଦେଇଥିଲେ। ବର୍ତ୍ତମାନ ଏଥିରେ ପରିବର୍ତ୍ତନ ପାଇଁ ସରକାରଙ୍କ ନୂଆ ଷ୍ଟ୍ରାଟେଜିକୁ ଗୁରୁତ୍ୱ ଦିଆଯାଇଛି। ନୂଆ ଷ୍ଟ୍ରାଟେଜୀ ଅନୁଯାୟୀ, ଉଭୟ ଜୀବନ ଏବଂ ଅର୍ଥନୀତିକୁ ଗୁରୁତ୍ୱ ଦିଆଯିବ।

You might also like