ସବୁଠୁ ହତାଶ ହେବା ପରେ ଚାଇନାର ଶରଣ ପଶିଲା ପାକିସ୍ତାନ

ନୂଆଦିଲ୍ଲୀ: ଭାରତ ସରକାର ଜମ୍ମୁ-କଶ୍ମୀରରୁ ଧାରା ୩୭୦ ଉଚ୍ଛେଦ କରିବା ପରେ ପାକିସ୍ତାନ ଏବେ ନୂଆଦିଲ୍ଲୀ ଉପରେ ପ୍ରତିଶୋଧ ନେବାକୁ ଅଣ୍ଟା ଭିଡ଼ିଛି।

ପାକିସ୍ତାନ ଏକାକୀ ଭାରତର କିଛି କ୍ଷତି କରିପାରିବ ନାହିଁ ବୋଲି ଇମ୍ରାନ୍‌ ଖାନ୍‌ ସରକାର ଭଲ ଭାବେ ଜାଣିଛନ୍ତି। ତେଣୁ ଚାଇନା କାନ୍ଧରେ ବନ୍ଧୁକ ଥୋଇ ପାକିସ୍ତାନ ପଡ଼ୋଶୀ ଭାରତ ଉପରେ ଗୁଳି ଚଳାଇବାକୁ ଯୋଜନା କରିଛି। ଜମ୍ମୁ-କଶ୍ମୀରରେ ସାହାଯ୍ୟ କରିବାକୁ ଆଜି ପାକିସ୍ତାନ ବୈଦେଶିକ ମନ୍ତ୍ରୀ ଶାହ ମେହମୁଦ କୁରେଶୀ ଚାଇନାର ଶରଣ ନେଇଛନ୍ତି।

କୁରେଶୀ ଆଜି ଚାଇନା ରାଷ୍ଟ୍ରପତି ସି ଜିନପିଙ୍ଗ ଓ ବରିଷ୍ଠ ଅଧିକାରୀଙ୍କ ସହ ଆଲୋଚନା କରିଛନ୍ତି। ଏହି ଆଲୋଚନା ସମୟରେ କୁରେଶୀ ଜମ୍ମୁ-କଶ୍ମୀର ପ୍ରସଙ୍ଗ ଛଡ଼ା ଆଉ କୌଣସି କଥା ଉଠାଇ ନାହାନ୍ତି। ଚାଇନା ଗସ୍ତ ପୂର୍ବରୁ କୁରେଶୀ ଗଣମାଧ୍ୟମକୁ କହିଥିଲେ ଯେ “ଭାରତ ସରକାର ଆଞ୍ଚଳିକ ଶାନ୍ତିକୁ ଭଙ୍ଗ କରିବାକୁ ଚେଷ୍ଟା କରୁଛନ୍ତି।

ଭାରତ ଅସାମ୍ବିଧାନିକ ଢଙ୍ଗରେ ନିଷ୍ପତ୍ତି ନେଇଛନ୍ତି। ଆମେ ଚାଇନା ସରକାରଙ୍କୁ ଏ ସମ୍ପର୍କରେ ଅବଗତ କରାଇବୁ। ଚାଇନା କେବଳ ଆମର ବନ୍ଧୁ ନୁହେଁ, ସମଗ୍ର ଏସିଆରେ ଏହା ଏକ ଗୁରୁତ୍ୱପୂର୍ଣ୍ଣ ଓ ଶକ୍ତିଶାଳୀ ରାଷ୍ଟ୍ର। ଭାରତର ସରକାର ଜମ୍ମୁ-କଶ୍ମୀରରେ ଯେଉଁଭଳି ଅସାମ୍ବିଧାନିକ ପଦକ୍ଷେପ ନେଇଛି, ସେ ସମ୍ପର୍କରେ ମୁଁ ଚାଇନାର ଅଧିକାରୀଙ୍କୁ ଜଣାଇବି। ଏଥିସହ କଶ୍ମୀରରେ ଚାଲିଥିବା ମାନବାଧିକାର ଉଲ୍ଲଙ୍ଘନ ସମ୍ପର୍କରେ ମଧ୍ୟ ଚାଇନା ନେତୃବୃନ୍ଦଙ୍କ ସହ କଥା ହେବି।”

You might also like