୮ ଟୁଇଟର ଆକାଉଣ୍ଟକୁ ବନ୍ଦ ନିର୍ଦ୍ଦେଶ

ନୂଆଦିଲ୍ଲୀ: ଗୁଜବ ଓ ଫେକ୍  ନ୍ୟୁଜ ପୋଷ୍ଟ କରୁଥିବା ୮ଟି ଆକାଉଣ୍ଟକୁ ହଟାଇ ଦେବା ପାଇଁ ଟୁଇଟରକୁ ଗୃହ ମନ୍ତ୍ରଣାଳୟ ନିର୍ଦ୍ଦେଶ ଦେଇଛି। ପାକିସ୍ତାନ ଗୁଇନ୍ଦା ସଂସ୍ଥା ଆଇଏସଆଇ ପ୍ରରୋଚନାରେ ଏହି ଆକାଉଣ୍ଟଗୁଡିକୁ ପରିଚାଳିତ କରାଯାଉଥିବା  ଗୃହ ମନ୍ତ୍ରାଳୟ ପକ୍ଷରୁ କୁହାଯାଇଛି। ଜାମ୍ମୁ ଓ କାଶ୍ମୀରରେ ବିଶୃଙ୍ଖଳା ସୃଷ୍ଟି ଉଦ୍ଦେଶ୍ୟରେ ଏପରି କରାଯାଉଥିବା ଗୃହ ସଚିବ ରାଜୀବ ଗୌବା କହିଛନ୍ତି।

ସେହିପରି ଏହି ଟୁଇଟର ଆକାଉଣ୍ଟଗୁଡିକ ଜମ୍ମୁ ଓ କାଶ୍ମୀରର କୌଣସି ବ୍ୟକ୍ତିଙ୍କର ନୁହେଁ ବୋଲି ପୁଲିସ ସ୍ପଷ୍ଟ କରିଛି । ଅନ୍ୟପକ୍ଷରେ ସୋଶାଲ ମିଡିଆରେ ପ୍ରଚାର କରାଯାଉଥିବା ଗୁଜବରେ ବିଶ୍ୱାସ ନକରିବା ଲାଗି ସିଆରପିଏଫ୍, ଜମ୍ମୁ ଓ କାଶ୍ମୀର ପୋଲିସ ଏବଂ ଅନ୍ୟ ସୁରକ୍ଷା ଏଜେନ୍ସିଙ୍କ ତରଫରୁ ଜନସାଧାରଣଙ୍କୁ ସତର୍କ କରାଇ ଦିଆଯାଇଛି।

ଏପଟେ ଜମ୍ମୁ ଓ କାଶ୍ମୀରରୁ ଧାରା ୩୭୦ ପ୍ରତ୍ୟାହାରର ୭ ଦିନ ପରେ ବି ଶ୍ରୀନଗର ସମେତ ଅନ୍ୟ ଅଞ୍ଚଳରେ କଟକଣା ଜାରି ରହିଛି। ଶ୍ରୀନଗରରେ ଦୋକାନ ବଜାର ବନ୍ଦ ଥିବା ବେଳେ ଅଧିକାଂଶ ଅଞ୍ଚଳରେ ଧାରା ୧୪୪ ବଳବତ୍ତର ରହିଛି । ସେହିପରି ଟେଲିଫୋନ ଓ ଇଣ୍ଟରନେଟ୍ ସେବା ମଧ୍ୟ ବନ୍ଦ ରହିଛି ।

You might also like