୧୧୦ ଫୁଟ ବୋରୱେଲ୍‌ ଭିତରକୁ ଖସିପଡ଼ିଛି ୩ ବର୍ଷର କୁନି ଝିଅ

ପାଟନା: ବିହାର ମୁଙ୍ଗେର ଜିଲ୍ଲାରେ ୧୧୦ ଫୁଟ ଗଭୀର ବୋର୍‌ୱେଲରେ ଖସି ପଡ଼ିଛି ୩ ବର୍ଷର ଶିଶୁ। ଶିଶୁ କନ୍ୟାକୁ ବାହାର କରିବା ପାଇଁ ଉଦ୍ଧାର କାର୍ଯ୍ୟ ଜାରିରହିଛି। ଘଟଣାକୁ ୨୪ ଘଣ୍ଟା ବିତିଯାଇଥିବା ବେଳେ ଝିଅଟିକୁ ଅକ୍ଷତ ଅବସ୍ଥାରେ ଉଦ୍ଧାର ପାଇଁ ଉଦ୍ୟମ ଜାରି ରହିଛି। ଗତକାଲି ମୁଙ୍ଗେର ଜିଲ୍ଲା ମୁରଗିଆଛକ ଅଞ୍ଚଳରେ ଏକ ନିର୍ମାଣାଧୀନ ବୋର୍‌ୱେଲ ଭିତରେ ୩ ବର୍ଷର ଝିଅଟି ଖେଳୁଥିବା ବେଳେ ଅଚାନକ ଖସିପଡ଼ିଥିଲା। ଖବର ପାଇ ବିହାର ଷ୍ଟେଟ୍‌ ଡିଜାଷ୍ଟର୍‌ ରେସ୍‌ପନ୍ସ ଫୋର୍ସ ପକ୍ଷରୁ ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଥିଲା।

ପରେ ଅଗ୍ନିଶମ ବାହିନୀ ଓ ସ୍ଥାନୀୟ ପୋଲିସ ଟିମ୍ ବି ଅପରେସନ୍‌ରେ ସାମିଲ ହୋଇଛନ୍ତି। ଅନ୍ୟପକ୍ଷରେ ରେସ୍କ୍ୟୁ ଅପରେସନ୍‌କୁ ଜୋରଦାର କରିବା ପାଇଁ ଆଜି ସେନାକୁ ଏଥିରେ ସାମିଲ କରାଯାଇଛି। ସେହିପରି ଅଧିକ ସହାୟତା ପାଇଁ ଏନ୍‌ଡିଆରଏଫ୍‌କୁ ମଧ୍ୟ ନିର୍ଦ୍ଦେଶ ଦିଆଯାଇଛି। ପିଲାଟି ନିକଟକୁ ପାଇପ୍ ଯୋଗେ ଅକ୍ସିଜେନ୍‌ ପଠାଯାଉଥିବା ବେଳେ ତାର ସ୍ଥିତି କିଭଳି ରହିଛି, ସେନେଇ କମ୍ପ୍ୟୁଟର ସ୍କ୍ରିନ୍‌ରେ ମନିଟରିଂ କରାଯାଉଛି।

You might also like