ଏନଡିଏ ମେଣ୍ଟରୁ ଓହରିଲା ତେଲୁଗୁ ଦେଶମ ପାର୍ଟି

ନୂଆଦିଲ୍ଲୀ: କେନ୍ଦ୍ରରେ କ୍ଷମତାସୀନ ଏନଡିଏ ମେଣ୍ଟରୁ ଓହରିଲା ତେଲୁଗୁ ଦେଶମ ପାର୍ଟି। ଆନ୍ଧ୍ରପ୍ରଦେଶକୁ ସ୍ୱତନ୍ତ୍ର ରାଜ୍ୟ ପାହ୍ୟା ମାନ୍ୟତା ଦେବାରେ କେନ୍ଦ୍ର ସରକାରଙ୍କ ଉଦାସୀନତା ପ୍ରତିବାଦରେ ଏଭଳି ନିଷ୍ପତ୍ତି ନେଇଛନ୍ତି ଟିଡିପି ମୁଖ୍ୟ ତଥା ଆନ୍ଧ୍ର ମୁଖ୍ୟମନ୍ତ୍ରୀ ଏନ୍. ଚନ୍ଦ୍ରବାବୁ ନାଇଡୁ।

କେନ୍ଦ୍ର ସରକାରରେ ଥିବା ପାର୍ଟିର ଦୁଇ ମନ୍ତ୍ରୀ ଅଶୋକ ଗଜପତି ରାଜୁ ଓ ଓ୍ୱାଇ. ଏସ୍ ଚୌଧୁରୀ ଆଜି ଇସ୍ତଫା ଦେବେ। ଅଶୋକ ଗଜପତି କେନ୍ଦ୍ରରେ ବେସାମରିକ ବିମାନ ଉଡ୍ଡୟନ ମନ୍ତ୍ରୀ ଓ ଓ୍ୱାଇ. ଏସ୍. ଚୌଧୁରୀ ବିଜ୍ଞାନ ଓ ଜ୍ଞାନକୌଶଳ ମନ୍ତ୍ରୀ ଅଛନ୍ତି।

ଅମରାବତୀରେ ଆୟୋଜିତ ଏକ ସମ୍ବାଦିକ ସମ୍ମିଳନୀରେ ଚନ୍ଦ୍ରବାବୁ କହିଛନ୍ତି, କେନ୍ଦ୍ର ସରକାର ତାଙ୍କ ପ୍ରତିଶ୍ରୁତି ରଖିବାରେ ବିଫଳ ହୋଇଛନ୍ତି। କେନ୍ଦ୍ର ସରକାରଙ୍କ ଠାରୁ ତାଙ୍କ ଦଳର ଅନେକ ଆଶା ଥିଲା। ଆନ୍ଧ୍ରପ୍ରଦେଶ ସହ ନ୍ୟାୟ ହେବ ବୋଲି ଭାବିଥିଲୁ କିନ୍ତୁ ଦୁଖର ବିଷୟ ଆନ୍ଧ୍ରକୁ ନେଇ କେନ୍ଦ୍ରର ମନୋଭାବ ପରିବର୍ତ୍ତନ ହୋଇ ପାରିଲାନି। ବିଜେପି ସେମାନଙ୍କ ସହ ବିଶ୍ୱାସଘାତକ କରିଛି ବୋଲି ନାଇଡୁ କହିଛନ୍ତି।

ଗତକାଲି ମଧ୍ୟ ସଂସଦ ଭବନ ପରିସରରେ ଦଳର ସାଂସଦ ମାନେ ଧାରଣା ଦେଇଥିଲେ। କେନ୍ଦ୍ର ଅର୍ଥମନ୍ତ୍ରୀ ଅରୁଣ ଜେଟଲୀଙ୍କ ସାମ୍ବାଦିକ ସମ୍ମିଳନୀର କିଛି ଘଣ୍ଟା ଭିତରେ ଏଭଳି ନିଷ୍ପତ୍ତି ନେଇଛନ୍ତି ନାଇଡୁ। ଆନ୍ଧ୍ରର ସ୍ୱତନ୍ତ୍ର ରାଜ୍ୟ ପାହ୍ୟା କିମ୍ବା ଟିକସ ଛାଡ଼ ଦାବିକୁ ପୂରଣ କରିହେବନି ବୋଲି ଜେଟଲୀ ସ୍ପଷ୍ଟ କରିଥିଲେ।

You might also like