ଭୁବନେଶ୍ୱର: ଏଣିକି ଡୋରଷ୍ଟେପରେ ମିଳିବ ଟିକାକରଣ ସହ ଟେଷ୍ଟିଂ ସୁବିଧା। ଅର୍ଥାତ ବରିଷ୍ଠ ନାଗରିକ ଏବଂ ଦିବ୍ୟାଙ୍ଗକୁ ଘରୁ ନେଇ ଟିକା ଦିଆଯିବ ଏବଂ ଘରେ ଆଣି ଛଡ଼ାଯିବ। ଭୁବନେଶ୍ୱର ମହାନଗର ନିଗମ କମିଶନର ସଞ୍ଜୟ ସିଂ ଏହି ସୂଚନା ଦେଇଛନ୍ତିା ସଂକ୍ରମଣ ସନ୍ଦେହ କରୁଥିବା ଭୁବନେଶ୍ୱରର ଯେ କୌଣସି ବରିଷ୍ଠ ନାଗରିକ ୧୯୨୯କୁ ଫୋନ୍ କରି ନିଜର ତଥ୍ୟ ଜଣାଇବେ। ଏହାପରେ ତାଙ୍କୁ ଟିକାକରଣ କେନ୍ଦ୍ରକୁ ନିଆଯିବ, ଟିକାକରଣ ପରେ ପୁଣି ଘରେ ଆଣି ଛଡାଯିବ ବୋଲି କହିଛନ୍ତି ବିଏମ୍ସି କମିଶନର।

କେବଳ ଟିକାକରଣ ନୁହେଁ, ଘରକୁ ଯାଇ ସାମ୍ପଲ ମଧ୍ୟ ସଂଗ୍ରହ କରାଯିବ। ଆସନ୍ତାକାଲିଠାରୁ ବରିଷ୍ଠ ନାଗରିକଙ୍କ ଘରକୁ ଯାଇ ସାମ୍ପଲ ସଂଗ୍ରହ କରାଯିବ । ଟେଷ୍ଟିଂ ସେଣ୍ଟରକୁ ଆସିବାରେ ସମସ୍ୟା ଥିବାରୁ ଘରକୁ ଯାଇ ସାମ୍ପଲ ସଂଗ୍ରହ କରାଯିବ ବୋଲି ବିଏମ୍ସି କମିଶନର କହିଛନ୍ତି। ସେହିପରି ବ୍ରହ୍ମପୁର ସହରରେ ମଧ୍ୟ ୭୫ ବର୍ଷ ବୟସରୁ ଅଧିକ ବୃଦ୍ଧ ବ୍ୟକ୍ତି ଓ ଦିବ୍ୟାଙ୍ଗଙ୍କୁ ଘରକୁ ଆସି ଟିକା ଦିଆଯିବ। ବ୍ରହ୍ମପୁର ମହାନଗର ନିଗମ ପକ୍ଷରୁ ଏନେଇ ଟ୍ୱିଟ୍‌ କରି ସୂଚନା ଦିଆଯାଇଛି।  ଆସନ୍ତାକାଲିଠୁ ବ୍ରହ୍ମପୁରରେ ମଧ୍ୟ ଡୋର୍ ଷ୍ଟେପ୍ ଭ୍ୟାକସିନେସନ୍ ଚାଲିବ ବୋଲି ବିଏମ୍ସି ପକ୍ଷରୁ କୁହାଯାଇଛି।

ଅନ୍ୟପଟେ କରୋନା ମୁକାବିଲା ପାଇଁ ଉଚ୍ଚସ୍ତରୀୟ କମିଟି ଗଠନ କରିଛନ୍ତି ରାଜ୍ୟ ସରକାର । କମିଟି ଗଠନ ସଂପର୍କରେ ମୁଖ୍ୟ ସଚିବ ସୁରେଶ ମହାପାତ୍ର ସୂଚନା ଦେଇଛନ୍ତି । ବିଶିଷ୍ଟ ଚିକିତ୍ସା ବିଜ୍ଞାନୀ ଡାକ୍ତର ଶ୍ରୀନାଥ ରେଡ୍ଡୀଙ୍କ ଅଧ୍ୟକ୍ଷତାରେ ଏହି କମିଟି କାର୍ଯ୍ୟ କରିବ ।କମିଟିରେ ବହୁ ବରିଷ୍ଠ ଡାକ୍ତର, ବୈଜ୍ଞାନିକ ସଦସ୍ୟ ରହିଥିବା କହିଛନ୍ତି ମୁଖ୍ୟ ସଚିବ ।

ଡାକ୍ତର ଦେବୀ ସେଟ୍ଟୀ, ରମାକାନ୍ତ ପଣ୍ଡା କମିଟିରେ ସାମିଲ ଅଛନ୍ତି । କମିଟି ରାଜ୍ୟରେ କରୋନା ପରିଚାଳନା ନେଇ ପରାମର୍ଶ ଦେବେ । ଖାଲି ସେତିକି ନୁହେଁ ଏହି କମିଟି ଟିକାକରଣ ଓ ପରବର୍ତ୍ତୀ ଲହର ସମ୍ଭାବନା ବିଷୟରେ ମଧ୍ୟ ପରାମର୍ଶ ଦେବ । କମିଟିର ପରାମର୍ଶ ଅନୁସାରେ ରାଜ୍ୟ ସରକାର ପଦକ୍ଷେପ ନେବେ । କମିଟି ଯେଉଁ ପରାମର୍ଶ ଦେବେ, ତାହା ଶୀଘ୍ର କାର୍ଯ୍ୟକାରୀ କରାଯିବ ।

ଟିକା ପାଇଁ ଗ୍ଲୋବାଲ ଟେଣ୍ଡର ସଂପର୍କରେ ମଧ୍ୟ ସୂଚନା ଦେଇଛନ୍ତି ମୁଖ୍ୟ ସଚିବ । ୩.୮ କୋଟି ଟିକା କିଣିବାକୁ ଟେଣ୍ଡର ଡକାଯାଇଛି । ୪ ମାସ ମଧ୍ୟରେ ସମସ୍ତ ସପ୍ଲାଇ ଦେବାକୁ କୁହାଯାଇଛି । ସଫଳ ବିଡିଂ ହେଲେ ମେ’ ୨୮ ପରେ ଆମେ ଟିକା କିଣିପାରିବା ବୋଲି ମୁଖ୍ୟ ଶାସନ ସଚିବ ସୂଚନା ଦେଇଛନ୍ତି।

Other Stories