ନୂଆଦିଲ୍ଲୀ: ପିଏନବିରେ ହୋଇଥିବା ପାଖାପାଖି୧୩ ହଜାର କୋଟି ଟଙ୍କାର ମହା ଦୁର୍ନୀତି ମାମଲାକୁ ନେଇ ଆଇସିଆଇସିଆଇ ବ୍ୟାଙ୍କର ସିଇଓ ତଥା ଏମଡି ଚନ୍ଦା କୋଚର ଏବଂ ଆକ୍ସିସ ବ୍ୟାଙ୍କ ମୁଖ୍ୟ ଶିଖା ଶର୍ମାଙ୍କୁ ଆଣ୍ଟି ଫ୍ରଡ୍ ଏଜେନ୍ସି, ଏସଏଫଆଇଓ(ସିରିୟସ ଫ୍ରଡ ଇନଭେଷ୍ଟିଗେସନ୍ ଅଫିସ) ଆଜି ସମନ ଜାରି କରିଛି।

କୋଚର ଓ ଶର୍ମାଙ୍କୁ ଏସଏଫଆଇଓର ମୁମ୍ବାଇ ସ୍ଥିତ କାର୍ଯ୍ୟାଳୟରେ ହାଜର  ହେବାପାଇଁ କୁହାଯାଇଛି।

ତେବେ ବ୍ୟାଙ୍କର ଏହି ବରିଷ୍ଠ ଅଧିକାରୀଙ୍କୁ ଅଭିଯୁକ୍ତ ଭାବରେ ନୁହେଁ ବରଂ ପଚରାଉଚୁରା ପାଇଁ ସମନ ଜାରି କରାଯାଇଛି ବୋଲି ସୂଚନା ମିଳିଛି।

ମେହୁଲ ଚୋକସିଙ୍କ ଗୀତାଞ୍ଜଳି ଗ୍ରୁପକୁ ଲୋନ୍ ଦେବା ନେଇ ସମନ ଜାରି କରାଯାଇଛି। ସୂଚନାଥାଉ କି, ମେହୁଲ ଚୋକସୀ ୩୧ଟି ବ୍ୟାଙ୍କକୁ ଜାଲ୍ କାଗଜପତ୍ର ଦେଇ ଋଣ ହାତେଇଥିବା ଅଭିଯୋଗ ରହିଛି। । ସେଥିମଧ୍ୟରୁ ଆଇସିଆଇସିଆଇ ଚୋକସିଙ୍କୁ ୪୦୫କୋଟିର ଲୋନ ପ୍ରଦାନ କରିଛି।

ଅନ୍ୟପକ୍ଷରେ, ପିଏନବି ଦୁର୍ନୀତି ମାମଲାକୁ ନେଇ ଗୀତାଞ୍ଜଳି ଗ୍ରୁପର ଉପାଧ୍ୟକ୍ଷ ବିପୁଲ ଚିତାଲିଆଙ୍କୁ ଆଜି ସିବିଆଇ ଗିରଫ କରି ତଦନ୍ତ ଚଳାଇଛି।

ଉଲ୍ଲେଖଥାଉ କି, ହୀରା ବ୍ୟବସାୟୀ ନିରବ ମୋଦି ଓ ତାଙ୍କ ମାମୁଁ ମେହୁଲ ଚୋକସି(ଗୀତାଞ୍ଜଳି ଗ୍ରୁପର ମାଲିକ)ଙ୍କ ଦ୍ୱାରା ପିଏନବିରେ ହୋଇଥିବା ୧୨,୬୩୬କୋଟି ଦୁର୍ନୀତି ମାମଲାରେ ସଂପୃକ୍ତି ନେଇ ସିବିଆଇ ରବିବାର ୪ ଜଣ ବ୍ୟକ୍ତିଙ୍କୁ ଗିରଫ କରିଛି।

Other Stories