ରଙ୍ଗର ପର୍ବ ହୋଲି ଖେଳିବାକୁ ସମସ୍ତେ ପ୍ରସ୍ତୁତ

ଭୁବନେଶ୍ୱର: ଆସନ୍ତାକାଲି ରଙ୍ଗର ପର୍ବ ହୋଲି।  ହୋଲି ଖେଳିବାକୁ ସମସ୍ତେ ପ୍ରସ୍ତୁତ ହୋଇ ପଡିଲେଣି।  ରାଜ୍ୟର ବିଭିନ୍ନ ସହରରେ ଦୋକାନ ବଜାରରେ ଖୋଲିଛି ରଙ୍ଗର ପସରା। ରଙ୍ଗ କିଣିବା ପାଇଁ ଦୋକାନ ବଜାରରେ ଜମୁଛି ଗ୍ରାହକଙ୍କ ଭିଡ।

ପୁରୀରେ ମହାପ୍ରଭୁଙ୍କର ପ୍ରତୀକ ଦୋଳ ଗୋବିନ୍ଦ , ମାଆ ଲକ୍ଷ୍ମୀ ଓ ସରସ୍ୱତୀ ବିମାନରେ ଆସି ଭକ୍ତଙ୍କ ମେଳରେ ଅବିର ଖେଳିବେ।  ଉତ୍ସବକୁ ପାଳନ ପାଇଁ ପୁରୀ ସହରରେ ଖୋଲିଛି ଅନେକ ରଙ୍ଗ ଦୋକାନ।ନାଲି, ନୀଳ ଅବିର ସାଙ୍ଗକୁ ପିଚକାରୀ, ମାସ୍କ, ଚଷମା, ଟୋପି ଆଦି ବିକ୍ରି କରୁଛନ୍ତି ବ୍ୟବସାୟୀ।

ସେହିପରି ହୋଲି ପର୍ବ ପାଇଁ ରେଶମ ସହର ବ୍ରହ୍ମପୁର ମଧ୍ୟ ଚଳଚଞ୍ଚଳ।  ଭାପୁର ବଜାର, ସାନବଜାର, କମାପଲ୍ଲୀ, ଗିରି ବଜାର ଆଦି ସ୍ଥାନରେ ରଙ୍ଗ ବେରଙ୍ଗର ଅବିର ଓ ଫଗୁ ସହ ବିଭିନ୍ନ ଡ଼ିଜାଇନର ପିଚକାରି ମିଳୁଛି। ଅନ୍ୟପଟେ ହୋଲି ଲାଗି ଇସ୍ପାତ ସହର ରାଉରକେଲାରେ ମଧ୍ୟ ଜୋରଦାର ପ୍ରସ୍ତୁତି ହୋଇଛି। ସହରର ବିଭିନ୍ନ ସ୍ଥାନରେ ଖୋଲିଛି ରଙ୍ଗ ଦୋକାନ। ସେପଟେ ସୁରକ୍ଷାକୁ ଆଖିଆଗରେ ରଖାଯାଇ ଅଗ୍ନିଶମ ବିଭାଗ ପକ୍ଷରୁ ବ୍ୟାପକ ବ୍ୟବସ୍ଥା ହୋଇଛି।

ଏପଟେ ସମ୍ବଲପୁର ସହରରେ ମଧ୍ୟ ପ୍ରସ୍ତୁତି ଜୋରଦାର।  ଗୋଲବଜାର, ଅଇଁଠାପାଲି ଆଦି ସ୍ଥାନରେ ଖୋଲାଯାଇଥିବା ଦୋକାନରେ ଗ୍ରାହକଙ୍କ ଭିଡ  ପିଲାଠୁ ବୟସ୍କ ସଭିଁଏ ରଙ୍ଗ କିଣିବାରେ ବ୍ୟସ୍ତ।  କମ୍ ମାତ୍ରାରେ ରାସାୟନିକ ରଙ୍ଗ ଏବଂ ଫଗୁ ଅଧିକ ବିକ୍ରି ହେଉଥିବା କହିଛନ୍ତି ବ୍ୟବସାୟୀ।

You might also like