ସୁନ୍ଦରୀ ପ୍ରତିଯୋଗିତାରେ ସମ୍ବଲପୁର ଝିଅଙ୍କ କମାଲ : ଲିଟିଲ ମିସ୍ ଗାଲାକ୍ସି ୱାର୍ଲଡ଼ ଟାଇଟଲ କଲେ ହାସଲ

ସମ୍ବଲପୁର : ସୁନ୍ଦରୀ ପ୍ରତିଯୋଗିତାରେ ସମ୍ବଲପୁର ଝିଅଙ୍କ କମାଲ। ଆଗରୁ ମିସ୍‌ ସମ୍ବଲପୁର ଓ ମିସ୍‌ ବେଙ୍ଗାଲୁରରେ ସଫଳତା ପାଇବା ପରେ ବୁଲଗେରିଆରେ ଆୟୋଜିତ ହୋଇଥିବା ଲିଟିଲ ମିସ୍‌ ଗାଲାକ୍ସି ଭାବେ ସଫଳତା ଲାଭ କରିଛନ୍ତି ସମ୍ବଲପୁରର ଅର୍ପିତା ବେହେରା। ଆଜି ସମ୍ବଲପୁରରେ ପହଞ୍ଚିବା ପରେ ତାଙ୍କୁ ବିପୁଳ ସମ୍ବର୍ଦ୍ଧନା ଦିଆଯାଇଛି। ତାଙ୍କୁ ସମ୍ବର୍ଦ୍ଧନା ପାଇଁ ତାଙ୍କ ସ୍କୁଲର ବହୁ ଛାତ୍ରଛାତ୍ରୀ ଆଜି ରେଳ ଷ୍ଟେଶନକୁ ଆସିଥିଲେ।

ତାଙ୍କୁ ଫୁଲତୋଡ଼ା ଦେଇ ଏକ ସ୍ୱତନ୍ତ୍ର ଗାଡ଼ିରେ ବସାଇ ସ୍ୱାଗତ ପାଇଁ ସ୍କୁଲକୁ ପାଛୋଟି ନିଆଯାଇଥିଲା। ଏହି କାର୍ଯ୍ୟକ୍ରମରେ ଅର୍ପିତାଙ୍କ ବାପା ମା’ ମଧ୍ୟ ଉପସ୍ଥିତ ଥିଲେ। ସୂଚନା ଅନୁଯାୟୀ, ଲିଟିଲ ମିସ୍‌ ଗାଲାକ୍ସି ପ୍ରତିଯାଗିତାରେ ୩୭ଟି ଦେଶର ପ୍ରତିଯୋଗୀ ଭାଗ ନେଇଥିଲେ। ହେଲେ ସମସ୍ତଙ୍କୁ ପଛରେ ପକାଇ ବିଜୟମୁକୁଟ ପିନ୍ଧିଥିଲେ ଅର୍ପିତା। ସମ୍ବଲପୁରର ରାଜେଶ କୁମାର ବେହେରା ଓ ସ୍ତ୍ରୀ ବୀଣା ବେହେରାଙ୍କ ଝିଅ ହେଉଛନ୍ତି ଅର୍ପିତା ବେହେରା। ତାଙ୍କ ବାପା ଜଣେ ବ୍ୟବସାୟୀ ହୋଇଥିବା ବେଳେ  ମା’ ଶିକ୍ଷୟିତ୍ରୀ । ସମ୍ବଲପୁର ସେଣ୍ଟ ଯୋଶେଫ କନଭେଣ୍ଟ ସ୍କୁଲର ଷଷ୍ଠ ଶ୍ରେଣୀରେ ପଢ଼ୁଥିବା ଅର୍ପିତା  ଜଣେ ଭଲ ଫଟୋଗ୍ରାଫି ଓ ଚିତ୍ରକର ମଧ୍ୟ। ଅର୍ପିତାଙ୍କ ଏହି ସଫଳତାରେ ପରିବାରର ଖୁସିର ଲହରୀ ଖେଳିଯାଇଛି।

You might also like