ମୁଁ ନିଶା କାରବାର କରିବାକୁ ଚାହୁଁଛି… ମୋ ପାଇଁ ତୁରନ୍ତ ଟିକଟ ବୁକିଂ କର… ନହେଲେ…

ଭୁବନେଶ୍ୱର: କଡ଼ା ସୁରକ୍ଷା ବ୍ୟବସ୍ଥା ଭିତରେ ଥିବା ଭୁବନେଶ୍ୱରର ବିଜୁ ପଟ୍ଟନାୟକ ଆନ୍ତର୍ଜାତିକ ବିମାନ ବନ୍ଦରକୁ ମିଳିଛି ଧମକ। କେହି ଜଣେ ଅଜଣା ବ୍ୟକ୍ତି ଏୟାରପୋର୍ଟକୁ ଟେଲିଫୋନ୍‌ରେ ଧମକ ଦେଇଥିବା ଖବର ମିଳିଛି। ଏ ସଂପର୍କରେ ଏୟାରପୋର୍ଟ ପକ୍ଷରୁ ଅଭିଯୋଗ କରାଯାଇଛି।

ମିଳିଥିବା ସୂଚନା ଅନୁଯାୟୀ, ଆଜି ପୂର୍ବାହ୍ନରେ ଏୟାରପୋର୍ଟର ଏକ ନମ୍ବର ଟର୍ମିନାଲକୁ କେହିଜଣେ ବ୍ୟକ୍ତି ଫୋନ୍‌ କରିଥିଲେ। ଫୋନ୍ ଆରପଟୁ ବ୍ୟକ୍ତି ଜଣକ ଅଶ୍ଲୀଳ ଭାଷାରେ ଗାଳି ଗୁଲଜ କରୁଥିବା ଏୟାରପୋର୍ଟ ପକ୍ଷରୁ କୁହାଯାଇଛି। ଜଣା ପଡୁଥିଲା ଯେ, ବ୍ୟକ୍ତିଜଣକ ନିଶାଗ୍ରସ୍ତ ଅବସ୍ଥାରେ ଫୋନ୍ କରିଥିଲେ। ପ୍ରଥମେ ସେ ଟିକେଟ ବୁକିଂ ସଂପର୍କରେ କହିଲେ ଓ ଏହା ତୁରନ୍ତ କରିବାକୁ ଦାବି କରିଥିଲେ। ଏମିତିକି ବ୍ୟକ୍ତି ଜଣକ ଏୟାରପୋର୍ଟ ମାଧ୍ୟମରେ ନିଶା କାରବାର କରିବା କଥା ମଧ୍ୟ ଫୋନ୍‌ରେ କହିଥିବା ସୂଚନା ମିଳିଛି।

ତେବେ ଫୋନ୍ କରିଥିବା ଅଜଣା ବ୍ୟକ୍ତିଙ୍କ ସଂପର୍କରେ ଏବେସୁଦ୍ଧା କୌଣସି ସ୍ପଷ୍ଟ ସୂଚନା ମିଳିନାହିଁ। ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଅଭିଯୁକ୍ତ ଜଣଙ୍କ ମଦ୍ୟପାନ କରି ଫୋନ କରିଥିଲେ।  ଏନେଇ ବିମାନ ବନ୍ଦର ପକ୍ଷରୁ ଏୟାରଫିଲ୍ଡ ଥାନାରେ ଅଭିଯୋଗ କରାଯାଇଛି ବୋଲି ନିର୍ଦ୍ଦେଶକ ସୁରେଶ ଚନ୍ଦ୍ର ହୋତା ସୂଚନା ଦେଇଛନ୍ତି।

You might also like