ସମ୍ବଲପୁରରେ ଲଗାଣ ବର୍ଷା: ୬ଟି ୱାର୍ଡ କ୍ଷତିଗ୍ରସ୍ତ, ଭାଙ୍ଗିଲା ୭୨୬ ଘର

ସମ୍ବଲପୁର: ସମ୍ବଲପୁରରେ ଲଗାଣ ବର୍ଷା ଜାରି ରହିଛି। ଫଳରେ ସହରବାସୀଙ୍କ ଅବସ୍ଥା ବେହାଲ୍‌ ହୋଇପଡ଼ିଛି। ଗତକାଲିଠୁ ଆରମ୍ଭ ହୋଇଥିବା ବର୍ଷା ଏବେ ବି ଜାରି ରହିଛି।

ସହରରେ ୪୯୦ ମିଲିମିଟର ବର୍ଷା ହୋଇଥିବା ନେଇ ସମ୍ବଲପୁର ଜିଲ୍ଲାପାଳ  ସୂଚନା ଦେଇଛନ୍ତି। ଲୋକଙ୍କ ପାଇଁ ୩୪ଟି ଆଶ୍ରୟସ୍ଥଳୀ ଖୋଲା ଯାଇଛି।  ସେଠାରେ ୧୫ ଶହରୁ ଅଧିକ ଲୋକଙ୍କୁ ରଖାଯାଇଛି। ଲୋକଙ୍କୁ ଶୁଖିଲା ଖାଦ୍ୟ ମଧ୍ୟ ଦିଆଯାଉଛି। ସମ୍ବଲପୁର ବିଧାୟିକା ରାସେଶ୍ୱରୀ ପାଣିଗ୍ରାହୀ ଏବଂ ଜିଲ୍ଲାପାଳ ନିଜେ ଆଶ୍ରୟ ସ୍ଥଳ କଥା ବୁଝୁଛନ୍ତି।

ଆଜି ବୁର୍ଲାରେ ସର୍ବାଧିକ ୬୨୨ ମିଲିମିଟର ବର୍ଷା ରେକର୍ଡ କରାଯାଇଛି। ସହରର ୬ଟି ୱାର୍ଡ କ୍ଷତିଗ୍ରସ୍ତ ହୋଇଥିବା ବେଳେ ୭୨୬ ଘର ଭାଙ୍ଗିଯାଇଛି।

ଲୋକଙ୍କ ପାଇଁ ଟୋଲ୍ ଫ୍ରି ନମ୍ବର ମଧ୍ୟ ଜାରି ହୋଇଛି। ନମ୍ୱର ଗୁଡ଼ିକ ହେଉଛି ୦୬୬୩-୨୪୧୨୪୦୭  କିମ୍ବା ୧୦୭୭। ଏହି ନମ୍ବରରେ କଲ୍ କରି ଲୋକେ ନିଜ ଅସୁବିଧା ସମ୍ପର୍କରେ ଜଣାଇ ପାରିବେ।

ଲଗାତର ଦୁଇ ଦିନ ଧରି ବର୍ଷା ହେବା ଫଳରେ ବିଭିନ୍ନ ସ୍ଥାନରେ ଜଳବନ୍ଦୀ ଅବସ୍ଥା ସୃଷ୍ଟି ହୋଇଛି। ମୁଖତଃ ସହରର ତଳି ଅଞ୍ଚଳ ଓ ବୁର୍ଲା ଏବଂ ହୀରାକୁଦ ଅଞ୍ଚଳରେ ଲୋକେ ଜଳବନ୍ଦୀ ଭାବେ ଜୀବନ କାଟୁଛନ୍ତି। ଅତ୍ୟାବଶ୍ୟକୀୟ ସାମଗ୍ରୀ ପାଇଁ ଲୋକେ ବିଭିନ୍ନ ଅସୁବିଧାର ସମ୍ମୁଖୀନ ହେଉଛନ୍ତି।

You might also like