ଉଦ୍‌ଘାଟନ ପୂର୍ବରୁ ଖୋଲିଲା ସମ୍ପର୍କର ସେତୁ ଗୁରୁପ୍ରିୟା

ଚିତ୍ରକୋଣ୍ଡା: ପୂରଣ ହେଲା ବିଚ୍ଛିନ୍ନାଞ୍ଚଳବାସୀଙ୍କ ବର୍ଷ ବର୍ଷର ସ୍ୱପ୍ନ। ମୁଖ୍ୟମନ୍ତ୍ରୀଙ୍କ ଦ୍ୱାରା ଉଦ୍‌ଘାଟନ ପୂର୍ବରୁ ବିଚ୍ଛିନ୍ନାଞ୍ଚଳବାସୀଙ୍କ ସୁବିଧା ପାଇଁ ଖୋଲାଯାଇଛି ସମ୍ପର୍କର ସେତୁ ଗୁରୁପ୍ରିୟା। ଆରମ୍ଭ ହୋଇଛି ଯାତାୟାତ। ଫଳରେ ଏବେ ଡଙ୍ଗା ଛାଡ଼ି ସ୍ଥଳପଥରେ ସୁବିଧାରେ ଯାତାୟାତ କରିପାରୁଛନ୍ତି ଲୋକେ।

କିଏ ଚାରି ଚକିଆ ତ କିଏ ଦୁଇ ଚକିଆ ଯାନରେ ଆଉ କିଏ ପରିବାର ସହ ଚାଲି ଚାଲି ଯାଉଛି। ଏବେ ଜଳପଥ ଛାଡ଼ି ସ୍ଥଳପଥରେ ପୁଣି ରାତି ହେଉ ବା ଦିନ ଯେତେବେଳେ ଚାହିଁଲେ ବିଚ୍ଛିନ୍ନାଞ୍ଚଳକୁ ଭେଦ କରି ଆରପଟକୁ ଯିବାର ସୁବିଧା ମିଳିଥିବାରୁ ବେଶ୍ ଖୁସି ବିଚ୍ଛିନ୍ନାଞ୍ଚଳବାସୀ।

ସେତୁ ନିର୍ମାଣକାରୀ ସଂସ୍ଥା ଓ ବିଭାଗୀୟ କର୍ତ୍ତୃପକ୍ଷଙ୍କ ଅନୁମତି ପରେ ବିଛିନ୍ନାଞ୍ଚଳବାସୀଙ୍କୁ ଯାଆସ ପାଇଁ ଛଡ଼ାଯାଇଛି। ତେବେ ସେତୁ ଉପରେ ଭାରୀ ଯାନ ଛଡ଼ାଯାଉନାହିଁ। ସେପଟେ ସେତୁର ସୁରକ୍ଷା ପାଇଁ ସଜାଗ ଅଛନ୍ତି ବିଏସ୍ଏଫ୍ ଯବାନ। ଅନ୍ୟପଟେ ଗୁରୁପ୍ରିୟା ସେତୁ ଓ ମୁଖ୍ୟମନ୍ତ୍ରୀଙ୍କ ଗସ୍ତକୁ ବିରୋଧ କରିଛନ୍ତି ମାଓବାଦୀ। ଏଥିପାଇଁ ଆସନ୍ତାକାଲି ମାଲକାନଗିରି ଜିଲ୍ଲା ବନ୍ଦ ଡାକରା ଦିଆଯାଇଛି ।

ଦୀର୍ଘ ବର୍ଷର ପ୍ରତୀକ୍ଷା ପରେ ଗୁରୁପ୍ରିୟା ସେତୁ ଖୋଲାଯାଇଥିବାରୁ ଏହାଦ୍ୱାରା ଉପକୃତ ହେବେ ୭ଟି ପଞ୍ଚାୟତର ୩୦ ହଜାରରୁ ଅଧିକ ଲୋକ। ସବୁଠୁ ବଡ଼ କଥା ହେଉଛି, ଏଣିକି ବିଚ୍ଛିନ୍ନାଞ୍ଚଳବାସୀଙ୍କ ପାଖରେ ଆମ୍ବୁଲାନ୍ସ ଅତି ସହଜରେ ପହଞ୍ଚି ପାରିବ।

(ଚିତ୍ରକୋଣ୍ଡାରୁ ରତ୍ନାକର ପ୍ରଧାନଙ୍କ ସହ ମାଲକାନଗିରିରୁ ଜିତେନ୍ଦ୍ର ବେଉରାଙ୍କ ରିପୋର୍ଟ)

You might also like