ବରଗଡ଼ରେ ଚାଷୀ ଆତ୍ମହତ୍ୟା ଅଭିଯୋଗ

ବରଗଡ଼: ପୁଣି ଜଣେ ଚାଷୀ ଆତ୍ମହତ୍ୟାର ଖବର ସାମ୍ନାକୁ ଆସିଛି। ବିଜେପୁର ଉପନିର୍ବାଚନ ଲାଗି ସେଠାରେ ରାଜନୈତିକ ମହୋତ୍ସବ ଲାଗି ରହିଥିବା ବେଳେ ଏଭଳି ଖବର ଶୁଣିବାକୁ ମିଳିଛି। ମୃତ ଚାଷୀ ଜଣକ ହେଲେ ଗାଇସିଲଟ ବ୍ଲକ ନୂଆପାଲ୍ଲୀ ଗାଁର ଖେମସାଗର ବିଶ୍ୱାଳ। ଫସଲହାନୀ ଓ ଋଣ ଭାର ଯୋଗୁଁ ସେ ଆତ୍ମହତ୍ୟା କରିଥିବା ଅଭିଯୋଗ ହୋଇଛି।

ଖେମସାଗର ଗତ ୧୫ ତାରିଖ ଦିନ ବିଷ ପିଇ ଦେଇଥିଲେ। ଗତକାଲି ରାତିରେ ତାଙ୍କର ମୃତ୍ୟୁ ହୋଇଥିଲା। ପରିବାର ଲୋକଙ୍କ ଅଭିଯୋଗ ହେଉଛି ଯେ ଖେମସାଗର ଝିଅ ବାହାଘର ପାଇଁ ମହାଜନୀ ଋଣ ଆଣିଥିଲେ, କିନ୍ତୁ କ୍ରମାଗତ ଭାବେ ୩ ବର୍ଷ ଧରି ଫସଲହାନୀ ହେବା ପରେ ଋଣ ଶୁଝି ନପାରିବାରୁ ଚାପରେ ପଡ଼ି ସେ ଆତ୍ମହତ୍ୟା କରିଛନ୍ତି। ତେବେ ଏନେଇ ପ୍ରଶାସନ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ। ଏହି ଘଟଣା ପରେ ମୃତ ଚାଷୀଙ୍କ ପରିବାରକୁ ଭେଟିଛନ୍ତି ପିସିସି ସଭାପତି ପ୍ରସାଦ ହରିଚନ୍ଦନ। ଗାଁକୁ ଯାଇ ସ୍ଥିତିର ଅନୁଧ୍ୟାନ କରିବା ସହ ପରିବାର ଲୋକଙ୍କୁ ଭେଟି ସେ ସାନ୍ତ୍ୱନା ଜଣାଇଛନ୍ତି।

You might also like