ବିଜେପି ନେତା ଆକ୍ରମଣ ଘଟଣା: ବରଗଡ଼ ଏସ୍‌ପିଙ୍କ କାର୍ଯ୍ୟାଳୟ ଆଗରେ ଧାରଣା ଦେଲା ଦଳ

ବରଗଡ଼: ବିଜେପି ରାଜ୍ୟ ଯୁବ ମୋର୍ଚ୍ଚା ସମ୍ପାଦକଙ୍କୁ ଆକ୍ରମଣ ଘଟଣା ପ୍ରତିବାଦରେ ରାଜ୍ୟ ବିଜେପି ପକ୍ଷରୁ ବରଗଡ଼ ଏସ୍‌ପିଙ୍କ କାର୍ଯ୍ୟାଳୟ ଆଗରେ ଗଣଧାରଣା ଦିଆଯାଇଛି। ରାଜ୍ୟ ଉପସଭାପତି ଅଶ୍ୱିନୀ ଷଡଙ୍ଗୀଙ୍କ ନେତୃତ୍ୱରେ ବିଜେପି ନେତା ଓ କର୍ମୀମାନେ ଏହି ଗଣଧାରଣା ଦେଇଛନ୍ତି। ଏଥିସହିତ ଘଟଣାରେ ଶାସକ ଦଳ ଓ ମନ୍ତ୍ରୀ ସୁଶାନ୍ତ ସିଂଙ୍କ ହାତ ଥିବା ଅଭିଯୋଗ କରିଛି ବିଜେପି। ଘଟଣାର ନ୍ୟାୟିକ ତଦନ୍ତ ସହ ମୁଖ୍ୟ କାର୍ପଟଦାରଙ୍କୁ ଗିରଫ କରିବା ପାଇଁ ଦାବି କରିଛି ଦଳ।

ଏହି ଆକ୍ରମଣ ଘଟଣା ପରେ ବିଜେପିକୁ ଟାର୍ଗେଟ କରିଛନ୍ତି ଶ୍ରମମନ୍ତ୍ରି ସୁଶାନ୍ତ ସିଂ। ଆସନ୍ତା ନିର୍ବାଚନ ପୂର୍ବରୁ ଦଙ୍ଗା, ଗୁଣ୍ଡାଗିରି ଏବଂ ହତ୍ୟା କରି ବିଜେପି କ୍ଷମତାକୁ ଆସିବାକୁ ଚାହୁଁଛି ବୋଲି ମନ୍ତ୍ରୀ ଅଭିଯୋଗ କରିଛନ୍ତି। ଏଥିରେ ପ୍ରତିକ୍ରିୟା ରଖି ବିଜେପି ମୁଖପାତ୍ର ସଜ୍ଜନ ଶର୍ମା କହିଛନ୍ତି ଯେ, ବିଜେଡି ଗୁଣ୍ଡାଗିରି କରି ବିଜେପି ସ୍ୱରକୁ ଚପାଇ ଦେବାକୁ ଚାହୁଁଛି। ଏହାକୁ ସ୍ଥାନୀୟ ବାସିନ୍ଦା ଓ ଓଡ଼ିଶାବାସୀ କେବେବି ବରଦାସ୍ତ କରିବେ ନାହିଁ। ସେପଟେ ଏହି ଘଟଣା ସହିତ କୌଣସି ରାଜନୈତିକ ସମ୍ପର୍କ ନାହିଁ ବୋଲି ବରଗଡ଼ ଅତିରିକ୍ତ ଏସ୍‌ପି ଯଶୋବନ୍ତ ସେନାପତି କହିଛନ୍ତି। ପୃଥକ ପୃଥକ ଏତଲା ଆଧାରରେ ଗିରଫ ହୋଇଥିବା ୪ ଜଣଙ୍କର କୌଣସି ରାଜନୈତିକ ଲିଙ୍କ ନାହିଁ ବୋଲି ସେ ଆଜି ଏକ ସାମ୍ବାଦିକ ସମ୍ମିଳନୀରେ କହିଛନ୍ତି।

You might also like
Comments
Loading...