• translate
Odishatv Bureau

ନୂଆ ଦିଲ୍ଲୀ: ବାମ ଗଡ଼ରେ ଉଡ଼ିଲା ଗେରୁଆ ଝଣ୍ଡା। ଉତ୍ତର-ପୂର୍ବ ରାଜ୍ୟ ତ୍ରିପୁରାରେ ଇତିହାସ ରଚିଲା ଭାରତୀୟ ଜନତା ପାର୍ଟି। ୨୦୧୩ରେ ଏଠାରେ ଗୋଟିଏ ବି ଆସନ ଜିତିପାରି ନଥିବା ଗେରୁଆ ଦଳ ଏଥର ୨୫ ବର୍ଷର ବାମପନ୍ଥୀ ମେଣ୍ଟ ସରକାରର ପତନ ଘଟାଇବାରେ ସକ୍ଷମ ହୋଇଛି। ୬୦ ଆସନ ବିଶିଷ୍ଟ ତ୍ରିପୁରା ବିଧାନସଭାର ଦୁଇ ତୃତୀୟାଂଶ ଆସନ ହାସଲ କରିଛନ୍ତି ବିଜେପି ଓ ଏହାର ସହଯୋଗୀ ଇଣ୍ଡିଜିନିୟସ୍ ପିପୁଲ୍ସ ଫ୍ରଣ୍ଟ ଅଫ୍  ତ୍ରିପୁରା(IPFT)। ଗତଥର ୧୦ଟି ଆସନ ଜିତିଥିବା କଂଗ୍ରେସ ଏଥର ଖାତା ଖୋଲିବାରେ ବିଫଳ ହୋଇଛି। ବିଜେପିର ବିପୁଳ ବିଜୟ ପରେ ତ୍ରିପୁରା ରାଜଧାନୀ ଅଗରତାଲାରୁ ଆରମ୍ଭ କରି ଜାତୀୟ ରାଜଧାନୀ ଦିଲ୍ଲୀ ପର୍ଯ୍ୟନ୍ତ ଖୁସି ମନାଇଛନ୍ତି ବିଜେପି କର୍ମୀ ଓ ନେତା।

ତ୍ରିପୁରା ସହ ଉତ୍ତର-ପୂର୍ବର ଆଉ ଏକ ରାଜ୍ୟ ନାଗାଲାଣ୍ଡରେ ମଧ୍ୟ ସରକାର ଗଢ଼ିବାକୁ ଯାଉଛି। ବିଜେପି ମେଣ୍ଟ ପୂର୍ବତନ ମୁଖ୍ୟମନ୍ତ୍ରୀ ନେଫିଉ ରିଓଙ୍କ ନବ ଗଠିତ ନ୍ୟାସନାଲ ଡେମୋକ୍ରାଟିକ୍ ପ୍ରୋଗ୍ରେସିଭ୍ ଫ୍ରଣ୍ଟ-NDPP ସହ ମେଣ୍ଟ କରି ନିର୍ବାଚନ ଲଢିଥିବା ବିଜେପି ଏଠି ହାସଲ କରିଛି ମ୍ୟାଜିକ୍ ନମ୍ବର।  କ୍ଷମତାସୀନ ନାଗାଲାଣ୍ଡ ପିପୁଲ୍ସ ଫ୍ରଣ୍ଟ-NPFକୁ ଏଥର ପରାଜୟର ମୁହଁ ଦେଖିବାକୁ ମିଳିଛି। NPF କେନ୍ଦ୍ରରେ ବିଜେପି ନେତୃତ୍ୱାଧୀନ ଏନ୍‌ଡିଏ ସରକାରର ସହଯୋଗୀ ଥିବା ବେଳେ ରାଜ୍ୟରେ କିନ୍ତୁ ପରସ୍ପର ବିରୋଧରେ ଲଢୁଥିଲେ।

ହେଲେ ବଡ଼ କଥା ହେଉଛି ଏଠି ଦଶନ୍ଧିରୁ ଅଧିକ ସମୟ ଧରି ଶାସନ କ୍ଷମତାରେ ଥିବା କଂଗ୍ରେସ ଏଥର ଖାତା ଖୋଲିପାରିନି। ତେବେ ମେଘାଳୟରେ କଂଗ୍ରେସକୁ ଲିଡ୍ ମିଳିଥିଲେ ବି ଦଳ ପୁଣି ଥରେ କ୍ଷମତାକୁ  ଫେରିବା ନେଇ ଅନିଶ୍ଚିତତା ଦେଖାଦେଇଛି। କାରଣ ଏଠି ଭୋଟର କାହା  ସପକ୍ଷରେ ପୂର୍ଣ୍ଣ ବହୁମତ ଦେଇ ନାହାନ୍ତି।

ଆସାମ, ଅରୁଣାଚଳ ପ୍ରଦେଶ ଓ ମଣିପୁରରେ କ୍ଷମତା ହାସଲ ପରେ ବିଜେପିକୁ ଉତ୍ତର-ପୂର୍ବରେ ପୁଣି ମିଳିଛି ଆଶାତୀତ ସଫଳତା। କାମ ଦେଇଛି ମୋଦି ଶାହଙ୍କ ମିଶନ୍ ଲୁକ୍ ଇଷ୍ଟ୍ ଫର୍ମୁଲା।

 

Other Stories