ବିଡିଓଙ୍କୁ ତାଲା ପକାଇଲେ ବିଜେଡି ନେତା

ଫୁଲବାଣୀ: ବିଜେଡି ନେତାଙ୍କ ଦବଙ୍ଗଗିରି। ଜଣେ ବିଜେଡି ନେତା ବିଡିଓଙ୍କୁ କାର୍ଯ୍ୟାଳୟ ଭିତରେ ତାଲା ପକାଇବା ସହ ଧମକ ଚମକ ଦେଇଥିବା ଅଭିଯୋଗ ହୋଇଛି। ଏଭଳି ସାଂଘାତିକ ଅଭିଯୋଗ ଆସିଛି କନ୍ଧମାଳ ଜିଲ୍ଲାରୁ। କୋଟଗଡ଼ ବ୍ଲକର ବିଡିଓ ହୃଦ ରଞ୍ଜନ ସାହୁ ଏହି ଅଭିଯୋଗ କରିଛନ୍ତି । କନ୍ଧମାଳ ସାଂସଦଙ୍କ ପ୍ରତିନିଧି ତଥା କୋଟଗଡ଼ର ବିଜେଡି ନେତା ମନୋଜ କୁମାର ସାବତଙ୍କ ବିରୋଧରେ ସେ ଏହି ଅଭିଯୋଗ କରିଛନ୍ତି।

ବିଡିଓ ହୃଦ ରଞ୍ଜନ ସାହୁ ଅଭିଯୋଗ କରିଛନ୍ତି ଯେ, ମନୋଜ ତାଙ୍କ କାର୍ଯ୍ୟାଳୟରେ ପଶି ଜୋର୍ ଜବରଦସ୍ତ ଦୁଇଟି କାମ ପାଇଁ ୬ ଲକ୍ଷ ଟଙ୍କାର ବିଲ୍ କରାଇ ଦେବାକୁ ଚାପ ପକାଇଥିଲେ। ତେବେ କାର୍ଯ୍ୟର ତଦାରଖ କରି ନଥିବାରୁ ବିଲ୍ କରିବାକୁ ସେ ମନା କରି ଦେଇଥିଲେ। ଦୁଇ ଦିନ ଭିତରେ କାର୍ଯ୍ୟର ତଦାରଖ କରି ବିଲ୍ କରି ଦେବେ ବୋଲି ସେ କହିଥିଲେ। କିନ୍ତୁ ମନୋଜ ତାଙ୍କୁ ତୁରନ୍ତ ବିଲ୍ କରିବାକୁ କହିଥିଲେ ଓ ପାଟିତୁଣ୍ଡ କରିଥିଲେ। କାମ ନ ହେଲା ପର୍ଯ୍ୟନ୍ତ ହଲାଇ ଦେବେନି ବୋଲି କହିଥିଲେ। ତା’ପରେ ମନୋଜ ତାଙ୍କ ଅଫିସ୍‌ର ସିସିଟିଭି କ୍ୟାମେରାକୁ  ବନ୍ଦ କରି ଦେଇ ତାଙ୍କୁ ତାଲା ପକାଇ ଦେଇଥିଲେ। ଏହା ସହ ତାଙ୍କୁ ଧମକ ମଧ୍ୟ ଦେଇଥିଲେ ବୋଲି ବିଡିଓ କହିଛନ୍ତି।

ସୂଚନାଯୋଗ୍ୟ, ଗତ ୧୮ ତାରିଖରେ ବିଡିଓଙ୍କ ଅଫିସ୍‌ରେ ଏହି ଘଟଣା ଘଟିଥିଲା। ଏହି ଘଟଣା ସଂପର୍କରେ ବିଡିଓ ହୃଦ ରଞ୍ଜନ ସାହୁ ଜିଲ୍ଲାପାଳ ଡି. ବୃନ୍ଦାଙ୍କୁ ଅବଗତ କରାଇଛନ୍ତି।

ତେବେ ଏହି ଅଭିଯୋଗ ସମ୍ପର୍କରେ ମନୋଜ କୁମାର ସାବତ କହିଛନ୍ତି,“ବିଡିଓ ସଂପୂର୍ଣ୍ଣ ମିଛ କହୁଛନ୍ତି।”

ଅନ୍ୟପକ୍ଷରେ, ଏହି ଘଟଣା ସଂପର୍କରେ ବିଡିଓ ହୃଦାରଂଜନ ସାହୁ ଜିଲ୍ଲାପାଳ ଡ଼ା. ବୃନ୍ଦା ଡ଼ିଙ୍କୁ ଏ ସଂପର୍କରେ ଅବଗତ କରାଇଥିଲେ ମଧ୍ୟ କ୍ୟାମେରା ଆଗରେ ପ୍ରତିକ୍ରିୟା ଦେବାକୁ ମନା କରିଦେଇଛନ୍ତି ଜିଲ୍ଲାପାଳ।

You might also like