ପୋଲିସ୍ ଉପସ୍ଥିତିରେ ଇମ୍ଫା କାରଖାନାରେ ଭଙ୍ଗାରୁଜା

ରାୟଗଡ଼ା: ରାୟଗଡ଼ାରେ ଥେରୁବାଲିର ଇମ୍ଫା କାରଖାନାରେ ଭଙ୍ଗାରୁଜା ହୋଇଛି। କାରଖାନା ଗେଟ୍ ବାହାରେ ଲାଗିଥିବା ସିସିଟିଭି, ଅନ୍ୟ କିଛି ଯନ୍ତ୍ରାଂଶ ଓ ଲାଇଟ୍ ଭାଙ୍ଗି ଦିଆଯାଇଛି। ପ୍ରାୟ ଶହେରୁ ଅଧିକ ଲୋକ ଏହି ଭଙ୍ଗାରୁଜାରେ ସାମିଲ ହୋଇଥିବା ସୂଚନା ମିଳିଛି। ଗତ ଦୁଇଦିନ ହେଲା ବିଭିନ୍ନ ଦାବିରେ ଗେଟ୍ ସାମ୍ନାରେ ଧାରଣା ଦେଇଛନ୍ତି ଆନ୍ଦୋଳନକାରୀ। ଗତକାଲି ରାତିରେ ସେମାନେ ଥେରୁବାଲି ଫାଣ୍ଡିକୁ ଯାଇ ଏସ୍‌ଡିପିଓଙ୍କୁ ୯ ଦଫା ଦାବିପତ୍ର ଦେଇଥିଲେ। ଆଉ ବୁଧବାର ଅପରାହ୍ନରେ ପୋଲିସ୍ ଉପସ୍ଥିତିରେ ଭଙ୍ଗାରୁଜା କରିଥିଲେ।

ଆନ୍ଦୋଳନକାରୀ କାରଖାନାର ମୁଖ୍ୟ ଫାଟକରେ ତାଲା ପକାଇବା ସହ ଅନ୍ୟାନ୍ୟ ରାସ୍ତା ଅବରୋଧ କରି ରଖିଛନ୍ତି। ଫଳରେ ଗତ ୩ ଦିନ ହେଲା ଇମ୍ଫା କାରଖାନା ସମ୍ପୂର୍ଣ୍ଣ ବନ୍ଦ ରହିଛି।

ଏଥିଯୋଗୁଁ କମ୍ପାନୀ ଉପରେ ନିର୍ଭର କରୁଥିବା ଦିନ ମଜୁରିଆମାନେ କାମକୁ ଯାଇପାରୁନାହାନ୍ତି। ଆନ୍ଦୋଳନକାରୀଙ୍କ ମଧ୍ୟରେ ଇମ୍ଫାର କୌଣସି କମ୍ପାନୀ କର୍ମଚାରୀ କିମ୍ବା ୟୁନିୟନ ଲିଡର ନଥିବାରୁ ଏହା ଏକ ଉଦ୍ଦେଶ ମୂଳକ ବୋଲି ଇମ୍ଫାର କର୍ପୋରେଟ୍ ଆଫେୟାର୍ସ ଆଣ୍ଡ ଲିଗାଲ୍ ହେଡ୍ କହିଛନ୍ତି।

You might also like