ରାଜ୍ୟରେ ପ୍ରତିଦିନ ୬ ଜଣ ମହିଳା ଦୁଷ୍କର୍ମର ଶିକାର ହେଉଛନ୍ତି।ହେଲେ ଦଣ୍ଡବିଧାନ ହେଉଛି ବର୍ଷକୁ ମାତ୍ର ୬ ଜଣ ଅଭିଯୁକ୍ତଙ୍କୁ। ଅଶ୍ଳୀଳ ଭିଡିଓ ଭାଇରାଲ ଘଟଣା ବି ବଢ଼ିବାରେ ଲାଗିଛି। ଆଦିବାସୀ ଇଲାକାର ଆବାସିକ ସ୍କୁଲରେ ବି ଛାତ୍ରୀଟିଏ ସୁରକ୍ଷିତ ନୁହେଁ। ଥାନାରେ ଅଭିଯୋଗ କରିବାକୁ ଗଲେ ଦଳୀୟ ଭିତ୍ତିରେ ଏତଲା ରଖୁଛି ପୋଲିସ୍। ବିଗିଡିଯାଇଥିବା ଆଇନଶୃଙ୍ଖଳା ପରିସ୍ଥିତିର କଥା ରଖି ମୁଖ୍ୟମନ୍ତ୍ରୀଙ୍କୁ ନିଶାନା କରିଥିଲେ ବିରୋଧୀ ଦଳ ନେତା।
ସମ୍ବେଦନଶୀଳ ପ୍ରସଙ୍ଗରେ ଆଲୋଚନା ବେଳେ ମୁଖ୍ୟମନ୍ତ୍ରୀ ଗୃହରେ ଉପସ୍ଥିତ ନ ରହି ଅଫିସର ଦେଉଥିବା କାଗଜ ପଢୁଛନ୍ତି ବୋଲି ଅଭିଯୋଗ କରି ବର୍ଷିଥିଲେ ନରସିଂହ।
ଜବାବରେ ମୁଖ୍ୟମନ୍ତ୍ରୀ କହିଥିଲେ ମହିଳା, ଶିଶୁ ଓ ଦୁର୍ବଳବର୍ଗର ଲୋକଙ୍କ ସୁରକ୍ଷା ତାଙ୍କ ସରକାରଙ୍କ ପ୍ରାଥମିକତା ରହିଛି। ମହିଳାଙ୍କ ଉପରେ ଅତ୍ୟାଚାର ଅଭିଯୋଗକୁ ଗୁରୁତର ସହ ନିଆଯାଇଛି। ୨୦୧୫ ତୁଳନାରେ ଦୁଷ୍କର୍ମ ମାମଲା କମିଛି ବୋଲି କହିଥିଲେ ଶାସକଦଳର ମୁଖ୍ୟ ସଚେତକ ଅମର ପ୍ରସାଦ ଶତପଥୀ। ୨୦୧୫ରେ ୨୨୮୬ ଜଣ ଦୁଷ୍କର୍ମର ଶିକାର ହୋଇଥିବା ଅଭିଯୋଗ ଆସିଥିବା ବେଳେ ୨୦୧୭ରେ ଏହା କମି ୨୨୨୧ରେ ସୀମିତ ଥିଲା ବୋଲି ତଥ୍ୟ ରଖିଥିଲେ ମୁଖ୍ୟ ସଚେତକ।
ତେବେ ନାବାଳିକା ବଳାତ୍କାରୀଙ୍କ ପାଇଁ ଫାଶି ଦଣ୍ଡ ସପକ୍ଷରେ ଉଭୟ ଶାସକ ଓ ବିରୋଧୀ ବିଧାୟକଙ୍କ ସ୍ୱର ଏକ ଥିଲା।
]]>