କରୋନା ମୁକାବିଲା: ସହାୟତାର ହାତ ବଢ଼ାଇଲେ ମାଷ୍ଟର୍ ବ୍ଲାଷ୍ଟର୍‌

ମୁମ୍ବାଇ: କରୋନା ଭାଇରସ୍ ବିରୋଧରେ ସାରା ବିଶ୍ୱ ଲଢ଼ୁଛି। ଏହି ମହାମାରୀ ପାଇଁ ଅନେକ ସେଲିବ୍ରିଟି ସହାୟତାର ହାତ ବଢ଼ାଇଛନ୍ତି। ଏବେ ଏଥିରେ ସାମିଲ୍ ହୋଇଛନ୍ତି ମାଷ୍ଟର୍ ବ୍ଲାଷ୍ଟର୍ ସଚିନ ତେନ୍ଦୁଲକର।

ସଚିନ କୋଭିଡ୍‌-୧୯ ବିରୋଧରେ ଲଢ଼ିବା ପାଇଁ ମୋଟ ୫୦ ଲକ୍ଷ ଟଙ୍କା ଦାନ କରିଛନ୍ତି। ପିଟିଆଇ ପକ୍ଷରୁ ଜଣେ ବ୍ୟକ୍ତି ନିଜ ନାଁ ଗୁପ୍ତ ରଖି କହିଛନ୍ତି, ସଚିନ, କରୋନା ବିରୋଧରେ ଲଢ଼େଇ ପାଇଁ ପ୍ରଧାନମନ୍ତ୍ରୀ ରିଲିଫ ଫଣ୍ଡ୍ ଏବଂ ମୁଖ୍ୟମନ୍ତ୍ରୀ ରିଲିଫ ଫଣ୍ଡକୁ ୨୫ ଲକ୍ଷ ଟଙ୍କା ଲେଖାଏ ଯୋଗଦାନ କରିବାକୁ ନିଷ୍ପତ୍ତି ନେଇଛନ୍ତି।

ସଚିନଙ୍କ ପୂର୍ବରୁ ଆଉ କିଛି କ୍ରୀଡ଼ାବିତ୍ ଏବଂ କ୍ରିକେଟର୍ ମଧ୍ୟ କରୋନା ବିରୋଧରେ ସହାୟତା କରିଛନ୍ତି।

ପୂର୍ବତନ କ୍ରିକେଟର୍ ତଥା ଓପନିଂ ବ୍ୟାଟ୍ସମ୍ୟାନ୍ ଗୌତମ ଗମ୍ଭୀର ୫୦ ଲକ୍ଷ ଟଙ୍କାର ସହାୟତା ପ୍ରଦାନ କରିଥିବା ବେଳେ ବିସିସିଆଇ ଅଧ୍ୟକ୍ଷ ସୌରଭ ଗାଙ୍ଗୁଲି ଏକ ଚାଉଳ କମ୍ପାନୀ ସହ ମିଶି ୫୦ ଲକ୍ଷ ଟଙ୍କାର ସହ ଚାଉଳ ଗରିବମାନଙ୍କୁ ଦାନ କରିବାକୁ ନିଷ୍ପତ୍ତି ନେଇଛନ୍ତି। ସେହିପରି ରେସଲର୍ ବଜରଙ୍ଗ ପୁନିଆ ନିଜର ୬ ମାସ ଦରମା ଦାନ କରିବାକୁ ଘୋଷଣା କରିଥିବା ବେଳେ ତାରକା ମହିଳା ଶଟଲର୍ ପିଭି ସିନ୍ଧୁ ୧୦ ଲକ୍ଷ ଟଙ୍କା ସହାୟତା କରିଛନ୍ତି।

ଅନ୍ୟ କ୍ରିକେଟରଙ୍କ ମଧ୍ୟରେ ପଠାନ୍ ବ୍ରଦର୍ସ ଯଥା ଇରଫାନ୍ ଓ ୟୁସୁଫ୍ ବରୋଦା ପୁଲିସ୍ ଓ ସ୍ୱାସ୍ଥ୍ୟ ବିଭାଗକୁ ୪ ହଜାର ମାସ୍କ ଦାନ କରିଥିବା ବେଳେ ମହେନ୍ଦ୍ର ସିଂ ଧୋନି ଏକ ଏନଜିଓ ଜରିଆରେ ୧ ଲକ୍ଷ ଟଙ୍କାର ଯୋଗଦାନ କରିଛନ୍ତି।

ସୂଚନାଯୋଗ୍ୟ, କରୋନା ଭାଇରସ୍ ଏବେ ସାରା ବିଶ୍ୱରେ ଦ୍ରୁତ ଗତିରେ ବ୍ୟାପିବାରେ ଲାଗିଛି।

You might also like