ଭାରତ ଓ ଆଫ୍‌ଗାନିସ୍ତାନ୍ ମଧ୍ୟରେ ମ୍ୟାଚ୍ ଡ୍ର

ପୁଣି ସମସ୍ତଙ୍କ ହୃଦୟ ଜିତିଲା ଆଫ୍‌ଗାନିସ୍ତାନ୍

ଦୁବାଇ: ଚଳିତ ଏସିଆ କପ୍‌ର ସବୁଠୁ ରୋମାଞ୍ଚଭରା ମ୍ୟାଚ୍‌ ଗତକାଲି ଦେଖିଛନ୍ତି ଦର୍ଶକ। ଏହି ମ୍ୟାଚ୍ ହୋଇଥିଲା ଭାରତ ଓ ଆଫ୍‌ଗାନିସ୍ତାନ୍ ମଧ୍ୟରେ। ଏହି ମ୍ୟାଚ୍ ଡ୍ର’ରେ ଶେଷ ହୋଇଛି। ଆଉ ଏହା ସହିତ ପୁଣି ସମସ୍ତଙ୍କ ହୃଦୟ ଜିତିଛି ଆଫ୍‌ଗାନିସ୍ତାନ୍।ପ୍ରଥମେ ବ୍ୟାଟିଂ କରି ଆଫ୍‌ଗାନିସ୍ତାନ୍ ୨୫୨ରନ୍ କରିଥିବା ବେଳେ ଭାରତ ମଧ୍ୟ ୨୫୨ରନ୍‌ କରିଥିଲା। ଶେଷ ଓଭରରେ ଟିମ୍‌ ଇଣ୍ଡିଆକୁ ବିଜୟ ପାଇଁ ୭ ରନ୍ ଦରକାର ଥିବାବେଳେ ଦଳ ମାତ୍ର ୬ ରନ୍ କରିବାରେ ସକ୍ଷମ ହୋଇଥିଲା।

ଦମ୍‌ଦାର ଇନିଂସ ପାଇଁ ଆଫ୍‌ଗାନିସ୍ତାନ୍‌ର ମହମ୍ମଦ ଶେହେଜାଦଙ୍କୁ ‘ମ୍ୟାନ୍‌ ଅଫ୍ ଦ ମ୍ୟାଚ୍‌’ ବିବେଚନା କରାଯାଇଛି। ଭାରତ ପକ୍ଷରୁ ଏସିଆ କପ୍‌ରେ ନିଜର ପ୍ରଥମ ମ୍ୟାଚ୍‌ ଖେଳୁଥିବା କେଏଲ୍‌ ରାହୁଲ ସର୍ବାଧିକ ୬୦ ରନ୍‌ କରିଥିବା ବେଳେ ଅମ୍ବାତି ରାୟିଡୁ ୫୭, ଦୀନେଶ କାର୍ତ୍ତିକ ୪୪, ଧୋନି ୮, ମନୀଷ ପାଣ୍ଡେ ୮, କେଦାର ଯାଦବ ୧୯ ଓ ରବୀନ୍ଦ୍ର ଜାଡେଜା ୨୬ ରନ୍‌ର ଇନିଂସ୍‌ ଖେଳିଥିଲେ।

ଆଫ୍‌ଗାନିସ୍ତାନ୍ ପକ୍ଷରୁ ଗୁଲବଦିନ ନବି, ରଶିଦ୍ ଖାନ୍, ଅଫତାବ୍ ଆଲାମ୍ ୨ଟି ଲେଖାଏ ୱିକେଟ୍‌ ନେଇଥିବା ବେଳେ ଜାଭେଦ ଅହମଦି ଗୋଟିଏ ୱିକେଟ୍‌ ନେଇଥିଲେ। ଆଫ୍‌ଗାନିସ୍ତାନ୍ ଚଳିତ ଏସିଆ କପ୍‌ର ଫାଇନାଲ୍‌ ଖେଳିବାକୁ ବିଫଳ ହୋଇଥିଲେ ହେଁ ଦଳ ପୂରା ଟୁର୍ଣ୍ଣାମେଣ୍ଟ୍‌ରେ ଜବରଦସ୍ତ ପ୍ରଦର୍ଶନ କରି ସମସ୍ତଙ୍କ ହୃଦୟ ଜିତିବାକୁ ସକ୍ଷମ ହୋଇଛି।

ଟସ୍‌ ଜିତି ପ୍ରଥମେ ବ୍ୟାଟିଂ କରିଥିବା ଆଫ୍‌ଗାନିସ୍ତାନ୍ ଓପନର୍‌ ମହମ୍ମଦ ଶେହେଜାଦ୍‌ଙ୍କ ବିସ୍ଫୋରକ ୧୨୪ ଓ ଅଲ୍‌ରାଉଣ୍ଡର ମହମ୍ମଦ ନାବିଙ୍କ ୬୪ ରନ୍‌କୁ ଆଧାର କରି ୮ ୱିକେଟ୍‌ ହରାଇ ୨୫୨ ରନ୍‌ କରିଥିଲା। ୨୫୩ ରନ୍‌ର ଟାର୍ଗେଟ ପାଇଥିବା ଟିମ୍‌ ଇଣ୍ଡିଆ ନିୟମିତ ଓପନର୍‌ ରୋହିତ ଶର୍ମା ଓ ଶିଖର ଧୱନଙ୍କୁ ବିଶ୍ରାମ ଦେଇଥିବାରୁ ରାହୁଲ ଓ ଅମ୍ବାତି ରାୟିଡୁଙ୍କ ଦ୍ୱାରା ଇନିଂସ୍‌ ଓପନ୍‌ କରିବାକୁ ନିଷ୍ପତ୍ତି ନେଇଥିଲା। ଉଭୟ ଜବରଦସ୍ତ ଆରମ୍ଭ କରି ଟିମ୍‌ ମ୍ୟାନେଜମେଣ୍ଟର୍‌ ନିଷ୍ପତ୍ତିକୁ ଠିକ୍‌ ବୋଲି ପ୍ରମାଣିତ କରିଥିଲେ।

ଉଭୟ ଦ୍ରୁତ ଗତିରେ ରନ୍‌ ସଂଗ୍ରହ କରିବା ସହ ପ୍ରଥମ ୱିକେଟ୍‌ ପାଇଁ ୧୧୦ରନ୍‌ର ଭାଗୀଦାରି କରିଥିଲେ। ତେବେ ବ୍ୟକ୍ତିଗତ ଭାବେ ୫୭ ରନ୍‌ କରିଥିବା ବେଳେ ରାୟିଡୁଙ୍କୁ ମହମ୍ମଦ ନାବି ଆଉଟ୍‌ କରିଦେଇଥିଲେ। ଏହାପରେ ରଶିଦ୍‌ କେଏଲ ରାହୁଲ (୬୦)ଙ୍କୁ ନିଜର ସ୍ପିନ୍‌ ଜାଲ୍‌ରେ ଫସାଇ ଦେଇଥିଲେ।

You might also like