ଲତାଙ୍କୁ ହତ୍ୟା କରିବାକୁ ହୋଇଥିଲା ଷଡ଼ଯନ୍ତ୍ର; କିଏ ସେହି ବିଶ୍ୱାସ ଘାତକ ?

ନୂଆଦିଲ୍ଲୀ: ଭାରତର କୋକିଳ କଣ୍ଠି ଲତା ମଙ୍ଗେସ୍କର। ସଫଳତା ଯେମିତି ବ୍ୟକ୍ତିତ୍ୱ ବି ସେମିତି। ମିଷ୍ଠଭାଷୀ, ଉଦାରବାଦୀୟ ଗାୟିକା। ଭାରତୀୟ ସିନେମା ପ୍ରତି ତାଙ୍କର ଅବଦାନ ଭୁଲି ହେବନି। ସେଇଥିପାଇଁ ତ ସିଏ ଭାରତ ରତ୍ନ, ଭାରତର ସମ୍ମାନ। ସାରା ଭାରତ ତାଙ୍କ ସଫଳତା ତାରେ ଖୁସୀ ଥିବା ବେଳେ ଦିନେ କେହି ଜଣେ ଈର୍ଷା କରିଥିଲେ ତାଙ୍କୁ। କେବଳ ଈର୍ଷା ନୁହେଁ, ତାଙ୍କୁ ଜୀବନରୁ ମାରିଦେବାକୁ ଷଡ଼ଯନ୍ତ୍ର ମଧ୍ୟ କରିଥିଲେ। ମହାନ ଗାୟିକା ଲତା ମଙ୍ଗେସ୍କରଙ୍କ ଜୀବନର ଏହି ଭୟଙ୍କର କାହାଣୀ ସମ୍ପର୍କରେ ଆସନ୍ତୁ ଜାଣିବା।

୧୯୨୯ ସେପ୍ଟେମ୍ବର ୨୮ରେ ଇନ୍ଦୋରରେ ଜନ୍ମ ହୋଇଥିଲେ ଲତା ମଙ୍ଗେସ୍କର। ବାପା ଦୀନାନାଥ ମଙ୍ଗେଶକରଙ୍କ ଠାରୁ ସଂଗୀତ ଶିକ୍ଷା କରିଥିଲେ। ଦିନାନାଥ ଜଣେ ଲୋକପ୍ରିୟ ସଂଗୀତଜ୍ଞ ହେବା ସହିତ ଜଣେ ଉଚ୍ଚକୋଟିର ମଞ୍ଚ ଅଭିନେତା ମଧ୍ୟ ଥିଲେ। ବାପାଙ୍କ ଠାରୁ କୁନି ବୟସରୁ ସଂଗୀତ ଶିକ୍ଷା ଆରମ୍ଭ କରି ଲତା ଯେ ଦିନେ ଭାରତର ରତ୍ନ ହେବେ ଏକଥା କିଏ ଜାଣିଥିଲା ?

ଧୀରେ ଧୀରେ ସଂଗୀତ ଦୁନିଆରେ ଗୋଟିଏ ପରେ ଗୋଟିଏ ସଫଳତା ପାଇଲେ ଲତା ମଙ୍ଗେସ୍କର। ୧୯୬୨ ମସିହାର କଥା। ସେତେବେଳେ ଲତାଙ୍କ ବୟସ ମାତ୍ର ୩୩ ବର୍ଷ। ଏତେ କମ୍‌ ବୟସରେ ଲତା ସଫଳତାର ଶିଖର ଛୁଇଁଥିବା ଦେଖି କିଛି ଲୋକ ଗୌରବ ଅନୁଭବ କରୁଥିବା ବେଳେ କିଛି ଲୋଙ୍କର ଈର୍ଷା ବି ବଢ଼ିଯାଇଥିଲା। ଶେଷରେ ସ୍ଲୋ ପୋଏଜନ୍ ଦେଇ ତାଙ୍କୁ ଜୀବନରୁ ମାରିଦେବାକୁ ଷଡ଼ଯନ୍ତ୍ର କରାଯାଇଥିଲା।

ଲେଖିକା ପଦ୍ମା ସଚଦେବଙ୍କ ଲିଖିତ ବହି ‘ଐସା କାହାଁ ସେ ଲାଉଁ’ ପ୍ରକାଶିତ ହେବା ପରେ ଏହି ଘଟଣା ସମ୍ପର୍କରେ ଜଣା ପଡ଼ିଥିଲା। ପଦ୍ମାଙ୍କ ବହିରେ ଲେଖାଥିବା ଘଟଣା ଅନୁସାରେ, ସେତେବେଳେ ଲତାଙ୍କୁ ମାତ୍ର ୩୩ ବର୍ଷ। ଦିନେ ଲତା ଶୋଇକି ଉଠିବା ପରେ ସକାଳୁ ସକାଳୁ ହଠାତ୍ ତାଙ୍କ ପେଟରେ ପ୍ରବଳ ଯନ୍ତ୍ରଣା ହୋଇଥିଲା। ସେ ଦୁଇ-ତିନି ଥର ଥର ବାନ୍ତି ମଧ୍ୟ କରିଥିଲେ। ବାନ୍ତିର ରଙ୍ଗ ସବୁଜ ଥିଲା। ସେ ଖୁବ୍‌ ଦୁର୍ବଳ ହୋଇଯାଇଥିଲେ ଓ ଯନ୍ତ୍ରଣା ଅନୁଭବ କରିଥିଲେ। ଚାଲିପାରିଲେ ନାହିଁ। ତିନି ଦିନ ଜୀବନ ମୃତ୍ୟୁ ସହିତ ଯୁଝିବା ପରେ ତାଙ୍କ ସ୍ୱାସ୍ଥ୍ୟାବସ୍ଥା ଧୀରେ ଧୀରେ ସୁଧୁରିଥିଲା।  

ଏହି ଘଟଣାରେ ଲତା ୩ରୁ ୪ ମାସ ବେଡ୍ ରେଷ୍ଟ କରିବା ସହିତ ଗୀତ ଗାଇପାରି ନଥିଲେ। ଅନ୍ତଃନଳୀରେ ଯନ୍ତ୍ରଣା ହେବାରୁ ତାଙ୍କୁ ଡାକ୍ତରଙ୍କ ପରାମର୍ଶକ୍ରମେ ସତର୍କ ରହିବାକୁ ପଡ଼ିଥିଲା। ତାଙ୍କୁ ସ୍ଲୋ ପୋଏଜନ ଦିଆଯାଇଥିବାରୁ ଏପରି ହୋଇଥିଲା ବୋଲି ଡାକ୍ତରମାନେ କହିଥିଲେ।

ଏହି ଘଟଣାକୁ ଆଜି ୫୯ ବର୍ଷ ବିତିଗଲାଣି। କିନ୍ତୁ ଲତାଙ୍କୁ କିଏ ହତ୍ୟା କରିବା ପାଇଁ ଚେଷ୍ଟା କରିଥିଲା ତାହା ଆଜି ପର୍ଯ୍ୟନ୍ତ ଜଣାପଡ଼ି ନାହିଁ।

ତେବେ ଘଟଣା ପରେ ଲତାଙ୍କ ରୋଷେୟା କେଉଁ ଆଡ଼େ ଫେରାର୍ ହୋଇଯାଇଥିଲା। ଏମିତି ବଳକା ବେତନ ନେବା ପାଇଁ ଆସିନଥିଲା। ତେଣୁ ରୋଷେୟା ଉପରେ ସନ୍ଦେହ ଘନେଇ ଥିଲେ ବି ସିଏ ଯେ ହତ୍ୟା ଷଡ଼ଯନ୍ତ୍ରକାରୀ ତାହା ଏଯାଏ ସ୍ପଷ୍ଟ ହୋଇନାହିଁ। ରୋଷେୟା ଫେରାର୍‌ ପରେ ଲତାଙ୍କ ଭଉଣୀ ନିଜ ରୋଷେଇ ଦାୟୀତ୍ୱ ନେଇଥିଲେ।

ହେମାରୁ କେମିତି ହେଲା ଲତା

ଲତାଙ୍କ ତିନି ଉଭଣୀ ଅଛନ୍ତି। ସେମାନେ ହେଲେ ମୀନା ମଙ୍ଗେଶକର, ଆଶା ଭୋଁସଲେ, ଉଷା ମଙ୍ଗେଶକର ଏବଂ ଗୋଟିଏ ଭାଇ ହୃଦୟନାଥ ମଙ୍ଗେଶକର। ଚାରି ଭଉଣୀ ଓ ଗୋଟିଏ ଭାଇରେ ଲତା ଥିଲେ ସବୁଠାରୁ ବଡ଼। ତାଙ୍କ ପିଲାବେଳର ନାମ ଥିଲା ହେମା। କିନ୍ତୁ ଦିନେ ଥିଏଟରରେ ‘ଲତିକା’ ଭୂମିକାରେ ଅଭିନୟ କରିଥିଲେ ଲତା। ଏହାପର ଠାରୁ ସେ ତାଙ୍କ ନାଁ ପରିବର୍ତ୍ତନ କରିଦେଇ ଲତା ରଖିଥିଲେ। ସେବେଠାରୁ ହେମାଙ୍କ ବଦଳରେ ସେ ଲତା ନାରେଁ ପରିଚିତ।