ଅଜଗର ମୁହଁରୁ ଏମିତି ବର୍ତ୍ତିଗଲା ହରିଣ

ନୂଆଦିଲ୍ଲୀ: ଜଙ୍ଗଲର ଦ୍ରୁତ ହରିଣକୁ ମାଡ଼ିବସିଥିଲା ବିରାଟ ଅଜଗର। ଧୀରେ ଧୀରେ ହରିଣର ଶ୍ୱାସରୁଦ୍ଧ ହେଉଥିଲା।  ଏତିକିବେଳେ ଜଣେ ବ୍ୟକ୍ତି ଆସି ଅଜଗରକୁ ଘଉଡ଼ାଇବା ସହିତ ହରିଣର ଜୀବନ ବଞ୍ଚାଇଲେ। ଏମିତି ଏକ ଭିଡିଓ ଏବେ ସୋସିଆଲ୍‌ ମିଡିଆରେ ଭାଇରାଲ୍ ହେବା ପରେ ଏହାକୁ ନେଇ ନାନା ମତ ଦେଖିବାକୁ ମିଳୁଛି। ଅନେକ ଏହାକୁ ଠିକ୍ ଭୁଲ୍‌ର ମାପ କାଠିରେ ମାପୁଥିବା ବେଳେ କେହି କେହି ଏହି ଦୃଶ୍ୟକୁ ବିପଦଜନକ ବୋଲି କହିଛନ୍ତି।

ବିନୀତ ବିଶିଷ୍ଟ ନାମକ ଜଣେ ବ୍ୟକ୍ତି ଟ୍ୱିଟର୍‌ରେ ଏହି ଭିଡିଓଟିକୁ ଶେୟାର କରିଥିଲେ। ଭିଡିଓରେ ସାପଟି ହରିଣକୁ ନିଜ ଫାସରେ ଭିଡ଼ି ତାକୁ ମାରି ଗିଳିବା ଉଦ୍ଦେଶ୍ୟରେ ରହିଛି। ଏହି ସମୟରେ ଜଣେ ବ୍ୟକ୍ତି ହରିଣ ପାଖକୁ ଆସି ଗୋଟେ ଗଛ ଡାଳରେ ଅଜଗରକୁ ଧୀରେ ଧୀରେ ପିଟି ହରିଣକୁ ବଞ୍ଚାଇବାକୁ ଚଷ୍ଟା କରୁଛନ୍ତି। ବାରମ୍ବାର ଚେଷ୍ଟା କରିବା ପରେ ଅଜଗରଟି ହରିଣକୁ ଛାଡ଼ି ବୁଦା ଭିତରକୁ ପଶି ଯିବା ପରେ ହରିଣଟି ସେଠାରୁ ଜୀବନ ବିକଳରେ ଦଉଡ଼ି ପଳାଇ ଯାଉଛି।

ଏହି ଭିଡିଓ ଟ୍ୱିଟର୍‌ରେ ଅପ୍‌ଲୋଡ କରିବା ସହିତ ‘ଆପଣ କ’ଣ ଭାବୁଛନ୍ତି ? ବ୍ୟକ୍ତି ଜଣକ ଠିକ୍ କରିଛନ୍ତି କି ନାହିଁ ? ’ ବୋଲି କ୍ୟାପସନ୍ ଦେଇଛନ୍ତି ବିନୀତ। ବିନୀତିଙ୍କ ସୂଚନାନୁସାରେ ଭିଡିଓଟି ଉତ୍ତରାଖଣ୍ଡର ଜିମ୍‌ କୋରବେଟ୍‌ ନ୍ୟାସ୍‌ନାଲ୍‌ ପାର୍କର।ଟ୍ୱିଟର୍‌ରେ ଅପ୍‌ଲୋଡ ହେବା ମାତ୍ରେ ଭିଡିଓଟି ଭାଇରାଲ୍‌ ହେବାରେ ଲାଗିଛି। ଏପର୍ଯ୍ୟନ୍ତ ୧୮ ହଜାରରୁ ଉର୍ଦ୍ଧ୍ୱ ଲାଇକ୍ ମିଳିଥିବା ବେଳେ ଅନେକ ନେଟିଜେନ୍ସ ବିନୀତଙ୍କ ପ୍ରଶ୍ନର ଉତ୍ତର ରଖିଛନ୍ତି।

You might also like