ସୁଡ଼ଙ୍ଗ ଖୋଳି ସୁନା ଲୁଟ୍

କଳାକନା ବୁଲାଇଲେ ଲୁଟେରା

ଖୋର୍ଦ୍ଧା : ରାସ୍ତାକଡ଼ର ଡ୍ରେନ୍‌ ଭିତରେ ସୁଡ଼ଙ୍ଗ। ଡ୍ରେନ୍‌ ପାଣି ଭିତରେ ପଶି ଅପରାଧୀମାନେ ରାତାରାତି ସୁଡ଼ଙ୍ଗ ଖୋଳି ବାହାରିଛନ୍ତି ଅଳଙ୍କାର ଦୋକାନ ଭିତରେ। ଆଉ ଦୁଇ ଫୁଟ୍‌ର ସୁଡ଼ଙ୍ଗ ଭିତର ଦେଇ ଅପରାଧୀମାନେ ଦୋକାନ ଭିତରେ ବାହାରିବା ସହିତ ଲୁଟିଛନ୍ତି ଲକ୍ଷାଧିକ ଟଙ୍କାର ସୁନା ଅଳଙ୍କାର। ଖୋର୍ଦ୍ଧା ଜିଲ୍ଲା ଜଟଣୀ ସହରର ରାଜା ବଜାରରେ ଦୁର୍ବୃତ୍ତମାନେ ଏଭଳି ଅଭିନବ ଢଙ୍ଗରେ ଲୁଟ୍ କରି କମିଶନରେଟ୍ ପୋଲିସକୁ ଚ୍ୟାଲେଞ୍ଜ ଦେଇଛନ୍ତି।

ଗତ ରାତିରେ ଜନଗହଳିପୂର୍ଣ୍ଣ ଅଞ୍ଚଳ ଭାବେ ଜଣାଶୁଣା ରାଜା ବଜାରର ଗୋଲ୍ଡ ପ୍ଲାଜା ନାମକ ଏକ ଜୁଏଲାରୀରେ ଅପରାଧୀମାନେ କଳାକନା ବୁଲାଇ ଦେଇଛନ୍ତି। ଦୁର୍ବୃତ୍ତଙ୍କ ଏଭଳି ନିଆରା ଢଙ୍ଗରେ ଲୁଟ୍‌ତରାଜ ବ୍ୟବସାୟୀ ମହଲରେ ଆଲୋଡନ ଖେଳାଇ ଦେଇଛି।

ପ୍ରଥମେ ଜଟଣୀ ପୋଲିସ ପହଞ୍ଚି ପ୍ରାଥମିକ ଅନୁସନ୍ଧାନ କରିଥିଲା। ପରେ ପରେ ସନ୍ଧାନୀ କୁକୁର ଓ ସାଇଣ୍ଟିଫିକ୍ ଟିମ୍ ସହାୟତାରେ ଭୁବନେଶ୍ୱର ଡିସିପି ଘଟଣାସ୍ଥଳରେ ପହଞ୍ଚି ଆରମ୍ଭ କରିଥିଲେ ଛାନ୍‌ଭିନ୍‌। ସୁଡ଼ଙ୍ଗ ଭିତରୁ ଗୋଟିଏ ଛୋଟ ଶାବଳ, ହାତୁଡି ଓ ଗାମୁଛା ପୋଲିସ ହାତରେ ଲାଗିଛି। ତେବେ ସୁନା ଦୋକାନର ସିସିଟିଭି କ୍ୟାମେରା ଖରାପ ଥିବାରୁ ପୋଲିସ ତଦନ୍ତରେ ବାଧା ସୃଷ୍ଟି ହୋଇଛି। ତଥାପି ଅପରାଧୀଙ୍କୁ ଖୁବ୍ ଶୀଘ୍ର ଗିରଫ କରାଯିବ ବୋଲି ଡିସିପି କହିଛନ୍ତି।

You might also like