- ଖରାଦିନ ସାଙ୍ଗକୁ ବଢୁଛି ତରଭୁଜର ଚାହିଦା
- ଯାଜପୁର ରାସ୍ତା କଡ଼ରେ ଜମୁଛି ତରଭୁଜ ବେପାର
- କେନ୍ଦ୍ରାପଡ଼ା ଜିଲ୍ଲା ରାଜକନିକାରେ ଚିନ୍ତାରେ ଚାଷୀ
- ତରଭୁଜ ଚାଷରେ ପୋକ ଲାଗୁଥିବାରୁ ଚିନ୍ତାରେ ଚାଷୀ
- ଔଷଧ ଯୋଗାଇ ଦେବାକୁ ଚାଷୀଙ୍କ ଦାବି
ଆଳି,ଯାଜପୁର ( ବନମାଳୀ ସାହୁ, ଗୁଲାମ ଗସ): ଚାହିଦାରେ ତରଭୁଜ ଚାଷ । ଖରା ବଢ଼ିବା ସାଙ୍ଗକୁ ତରଭୁଜ ବେପାର ଜମି ଆସୁଥିବା ବେଳେ ରୋଗ ପୋକକୁ ନେଇ ଚିନ୍ତାରେ ଚାଷୀ । ସବୁ ପ୍ରକାର କୀଟନାଶକ ସିଞ୍ଚନ ପରେ ବି କୌଣସି ଲାଭ ନ ମିଳିବାରୁ ସରକାରୀ ସହାୟତା ପାଇଁ ଦାବି କରିଛନ୍ତି ଚାଷୀ ।
କେନ୍ଦ୍ରାପଡ଼ା ଜିଲ୍ଲା ରାଜକନିକା କାଟଣାବଣିଆ ଅଞ୍ଚଳର ପ୍ରାୟ ୩ ଶହରୁ ଅଧିକ ଚାଷୀ ୧ ହଜାର ଏକରରୁ ଅଧିକ ଜମିରେ ଲଗାଇଛନ୍ତି । ତରଭୁଜ ଏବେ ଫଳ ଧରି ଆସୁଥିବାବେଳେ ରୋଗପୋକ ଯୋଗୁଁ ଚିନ୍ତାରେ ପଡ଼ିଛନ୍ତି ଚାଷୀ । ଯେତେ କୀଟନାଶକ ବ୍ୟବହାର କଲେ ମଧ୍ୟ କିଛି କାମ କରୁନି । ଫଳରେ ଋଣ କରି ଚାଷ କରିଥିବା ଚାଷୀ ଏବେ କଣ କରିବେ କିଛି ବୁଝିପାରୁନାହାନ୍ତି । ସରକାରଙ୍କ ତରଫରୁ ଏହାର ଅନୁଧ୍ୟାନ କରାଯିବା ସହ ଔଷଧ ଯୋଗାଇ ଦେବାକୁ ଚାଷୀ ଦାବି କରିଛନ୍ତି । ଅନ୍ୟପଟେ ପ୍ରତିବର୍ଷ ଗୋଟିଏ ପ୍ରକାର ଚାଷ କରୁଥିବାରୁ ସମସ୍ୟା ଉପୁଜିଛି । ଉପଯୁକ୍ତ ଔଷଧ ସିଞ୍ଚନ ପାଇଁ ଚାଷୀଙ୍କୁ ପରାମର୍ଶ ଦିଆଯାଇଥିବା କହିଛନ୍ତି କୃଷି ଉଦ୍ୟାନ ବିଭାଗ ସହ ଅଧିକାରୀ ।
#ଚାଷୀ_ଚାଷ_କରିବେ_କେମିତି ?
ଧାନ ଫସଲ ବଢ଼ି ପାଣି ଧୋଇ ନେଲା ତରଭୁଜ ବି ପୋକ ଖାଇଗଲା। ଚାଷୀ ପୁଅ ଏବେ କରିବ କଣ? #Kendrapara #Odisha pic.twitter.com/GIv023Yon0— ଓଟିଭି (@otvkhabar) March 30, 2021
ଏପଟେ ଯାଜପୁରର ରାସ୍ତା କଡ଼ରେ ଗଦା ହୋଇଛି ଲାଲ୍ ଟହଟହ ତରଭୁଜ । ବିଭିନ୍ନ ପ୍ରକାରର ତରଭୁଜ ଦେଖି ଅଟକି ଯାଉଛନ୍ତି ଯାତ୍ରୀ । ଯାଜପୁର ୧୬ ନମ୍ବର ଜାତୀୟ ରାଜପଥର ରାସ୍ତାରେ ଯିବା ବେଳେ ତରଭୁଜ ଖାଇ ଖରା ଓ ଗରମରୁ ଆଶ୍ୱସ୍ତି ଲାଭ କରୁଛନ୍ତି ଯାତ୍ରୀ । ଖରା ବଢ଼ିବା ସାଙ୍ଗକୁ ଭଲ ବ୍ୟବସାୟ ମଧ୍ୟ ହେଉଥିବା କହିଛନ୍ତି ବ୍ୟବସାୟୀ । ଗତବର୍ଷ କରୋନା ଓ ଲକଡାଉନ୍ ଯୋଗୁଁ ତରଭୁଜ ବ୍ୟବସାୟ ମାନ୍ଦା ପଡ଼ିଥିଲା ଚଳିତ ବର୍ଷ ଲକଡାଉନ୍ କଟକଣା ନଥିବାରୁ ଭଲ ଦି ପଇସା ରୋଜଗାର କରିବାକୁ ଲକ୍ଷ୍ୟ ରଖିଛନ୍ତି ବ୍ୟବସାୟୀ ।