କେନ୍ଦ୍ରାପଡ଼ା: ଥମୁନି ଲଜ୍ଜା। ଗଣ ଦୁଷ୍କର୍ମର ଅନେକ ଲୋମହର୍ଷଣକାରୀ ଘଟଣା ମନରୁ ଲିଭି ନଥିବା ବେଳେ ଏବେ ଏଭଳି ଆଉ ଏକ ଘଟଣା ସାମ୍ନାକୁ ଆସିଛି। କେନ୍ଦ୍ରାପଡ଼ା ଜିଲ୍ଲା ମାର୍ଶାଘାଇ ଥାନା ଅଞ୍ଚଳରେ ଏହି ଲୋମହର୍ଷଣକାରୀ ଘଟଣା ଘଟିଛି।
ଜଣେ ବିଧବା ମହିଳାଙ୍କୁ ୬ ଜଣ ବ୍ୟକ୍ତି ଗଣ ଦୁଷ୍କର୍ମ କରିଥିବା ଥାନାରେ ଅଭିଯୋଗ ହୋଇଛି। ଏହି ଘଟଣାରେ ପୁଲିସ୍ ୪ ଜଣଙ୍କୁ ଅଟକ ରଖି ପଚରାଉଚରା ଚଳାଇଛି। ଅଭିଯୋଗ ଅନୁସାରେ ଚାଷ କାମରେ ସହଯୋଗ କରିବା ଲାଗି ମାର୍ଶାଘାଇ ଥାନା ଅଞ୍ଚଳର ଜଣେ ବ୍ୟକ୍ତି ଜଣେ ମହିଳା, ତାଙ୍କ ଝିଅ ଓ ଜ୍ୱାଇଁଙ୍କୁ ଡାକି ଆଣିଥିଲେ। ଗତ ଶୁକ୍ରବାର ରାତିରେ ୬ ଜଣ ଲୋକ ପୁଲିସ୍ର ପରିଚୟ ଦେଇ ପୀଡ଼ିତାଙ୍କ ଭଡ଼ା ଘରକୁ ଆସିଥିଲେ।
ସେଠାରେ ପୀଡ଼ିତା, ତାଙ୍କ ଝିଅ ଓ ଜ୍ୱାଇଁ ଏବଂ ସେମାନଙ୍କୁ ଡାକିଥିବା ବ୍ୟକ୍ତିଙ୍କୁ ମାଡ଼ ମାରିଥିଲେ। ପରେ ସେମାନେ ମହିଳା, ତାଙ୍କ ଜ୍ୱାଇଁ ଓ ସମ୍ପୃକ୍ତ ବ୍ୟକ୍ତିଙ୍କୁ ଏକ ଗାଡିରେ ଅନ୍ୟ ଏକ ସ୍ଥାନକୁ ଆଣିଥିଲେ। ସେଠାରେ ମହିଳାଙ୍କୁ ଗଣ ଦୁଷ୍କର୍ମ କରିଥିବା ଅଭିଯୋଗ ହୋଇଛି।
ଅନ୍ୟପଟେ ଏହି ଘଟଣାକୁ ନେଇ ପୁଲିସ୍ ଛାନ୍ଭିନ୍ ଆରମ୍ଭ କରିଛି। ସେପଟେ ଗୁରୁତର ହୋଇପଡିଥିବା ମହିଳାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି।