ପାଞ୍ଚ ଦିନ ହେବ ଲୋୟର ସୁକତେଲ ପ୍ରକଳ୍ପ ବନ୍ଦ

ବଲାଙ୍ଗିର: ଗତ ପାଞ୍ଚ ଦିନ ଧରି ବନ୍ଦ ରହିଛି ବଲାଙ୍ଗିର ଜିଲ୍ଲା ଲୋୟର ସୁକତେଲ ସ୍ପିଲ୍ ୱେ ନିର୍ମାଣ କାମ। ଏକକାଳୀନ କ୍ଷତିପୂରଣ ଓ ଉପଯୁକ୍ତ ଥଇଥାନ ଦାବିରେ ପରଧିଆପାଲି ବାସିନ୍ଦାଙ୍କ ଆନ୍ଦୋଳନ ଯୋଗୁଁ  ଏହି କାମ ବନ୍ଦ ରହିଛି। ପ୍ରତି ମାସରେ ଜନଶୁଣାଣି ହେବା ସତ୍ୱେ ୨୦୧୩ ପଲିସି ଅନୁଯାୟୀ ଏକକାଳୀନ କ୍ଷତିପୂରଣ ସହିତ ଉଚିତ ଥଇଥାନ ଦିଆଯାଉ ବୋଲି ଆନ୍ଦୋଳନକାରୀ ଜିଦ୍ ଧରିଛନ୍ତି।

ଲୋୟର ସୁକତେଲ ଡ୍ୟାମ କାର୍ଯ୍ୟକ୍ଷମ ହେଲେ, ୨୯ ଟି ଗାଁ ମଧ୍ୟରୁ ପ୍ରଥମେ ପରଧିଆପାଲି ଗାଁକୁ ପାଣି ମାଡ଼ିବ। ବଲାଙ୍ଗିର ଜିଲ୍ଲାପାଳ ନିଜେ ଗାଁକୁ ଯାଇ ଲୋକଙ୍କ ସହ କଥାବାର୍ତ୍ତା କରିଥିଲେ ବି କ୍ଷତିପୂରଣ ଓ ଥଇଥାନ ନେଇ କୌଣସି ସମାଧାନ ବାହାରିପାରିନାହିଁ। ସେପଟେ ସ୍ପିଲ ୱେ କାମ ସାରିବା ପାଇଁ ୨୦୧୯ ଓ ପ୍ରକଳ୍ପ କାମ ୨୦୨୧ ସୁଦ୍ଧା ସାରିବାକୁ ଟାର୍ଗେଟ୍‌ ରଖାଯାଇଛି। ବର୍ତ୍ତମାନ ସୁଦ୍ଧା ସ୍ପିଲ୍ ୱେ କାମ ୭୦ ପ୍ରତିଶତ ସରିଥିବା ବେଳେ ମାଟି ବନ୍ଧ କାମ ଅଧା ହୋଇଛି।  ତେବେ ଆସନ୍ତାକାଲି ସୁଦ୍ଧା କାମ ଆରମ୍ଭ ହୋଇପାରେ ବୋଲି ଆଶା ରଖିଛନ୍ତି ପ୍ରକଳ୍ପର ମୁଖ୍ୟଯନ୍ତ୍ରୀ।

You might also like