ଭୁବନେଶ୍ୱର: କୋଭିଡ୍ ଟିକାକରଣରେ ପୁଣି ହୋଇପାରେ ସମସ୍ୟା । ୧୮ରୁ ୪୪ ବର୍ଷ ଭିତରେ ୨ କୋଟି ନାଗରିକଙ୍କୁ ମାଗଣା ଟିକାକରଣରେ ହୋଇପାରେ ବିଳମ୍ବ । କାରଣ ରାଜ୍ୟ ସରକାରଙ୍କ ଗ୍ଲୋବାଲ ଟେଣ୍ଡରକୁ ଲାଗିଛି ଶକ୍ତ ଝଟକା । ଟେଣ୍ଡର ପ୍ରକ୍ରିୟାରେ ସାମିଲ ହେବାକୁ ଆଗ୍ରହ ଦେଖାଇଲେନି ଟିକା କମ୍ପାନୀ । କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀଙ୍କୁ ରାଜ୍ୟସ୍ୱାସ୍ଥ୍ୟ ମନ୍ତ୍ରୀ ଲେଖିଥିବା ଚିଠିରୁ ଏହା ସ୍ପଷ୍ଟ । ଚିଠିରେ ଉଲ୍ଲେଖ ଅଛି, ଟିକା କମ୍ପାନୀମାନେ ଟେଣ୍ଡରରେ ଅଂଶଗ୍ରହଣ କରିବାକୁ ଚାହୁଁନାହାନ୍ତି । ଏପରିକି ପ୍ରି-ବିଡ଼ିଂ ମିଟିଂକୁ ବି ଆସି ନାହାନ୍ତି ସେରମ୍ ଓ ଭାରତ ବାୟୋଟେକ୍ ।
ତେବେ କମ୍ପାନୀମାନେ କେନ୍ଦ୍ର ସରକାରଙ୍କ ସହ ଡିଲ୍ କରିବାକୁ ଚାହୁଁଛନ୍ତି ବୋଲି ସ୍ୱାସ୍ଥ୍ୟମନ୍ତ୍ରୀ ନବ ଦାସ ଚିଠିରେ ଉଲ୍ଲେଖ କରିଛନ୍ତି । ତେଣୁ ଟିକାକୁ ନେଇ ରାଜ୍ୟ ଅକଳରେ ପଡିବା ପରେ ଅନ୍ୟ କୌଣସି ବାଟ ନପାଇ କେନ୍ଦ୍ର କୋଟକୁ ବଲ ଫିଙ୍ଗିଛି । ତେବେ ପୂର୍ବରୁ ଖୋଦ୍ ଶାସକ ଦଳର ସାଂସଦ ଭର୍ତ୍ତୃହରି ମହତାବ ମଧ୍ୟ ଗ୍ଲୋବାଲ ଟେଣ୍ଡରକୁ ନେଇ ପ୍ରଶ୍ନ ଉଠାଇଥିଲେ । ଖବରକାଗଜରେ ଲେଖିଥିବା ନିବନ୍ଧରେ ଭର୍ତ୍ତୁହରି ଲେଖିଥିଲେ, ବିଦେଶୀ କମ୍ପାନୀମାନେ ସିଧାସଳଖ ରାଜ୍ୟକୁ ଟିକା ବିକ୍ରି କରିପାରିବେନି, କେବଳ କେନ୍ଦ୍ରକୁ ଦେଇପାରିବେ । ଏହା କଣ ରାଜ୍ୟ ସରକାର ଚଳାଉଥିବା ପଣ୍ଡିତମାନେ ଜାଣିନଥିଲେ । ଭର୍ତ୍ତୁହରି ଖବର କାଗଜରେ ସରକାରଙ୍କୁ ଏଭଳି ବାଣ ସମସ୍ତଙ୍କୁ ଚକିତ କରିଥିଲା । ଆଉ ଏବେ ଗ୍ଲୋବାଲ୍ ଟେଣ୍ଡର ଫେଲ୍ ମାରିଥିବା ସ୍ପଷ୍ଟ ହେବା ପରେ ରାଜ୍ୟ ସରକାରଙ୍କୁ କଡା ସମାଲୋଚନା କରିଛନ୍ତି ବିଜେପି ଓ କଂଗ୍ରେସ ।
୧୮ରୁ ୪୪ ବର୍ଷ ବୟସର ପ୍ରାୟ ୨କୋଟି ନାଗରିକଙ୍କୁ ମାଗଣାରେ ଟିକା ଦେବାକୁ ଘୋଷଣା ସହ ପବବର୍ତ୍ତୀ ସମୟରେ ଟିକା ଆଣିବାକୁ ଗ୍ଲୋବାଲ ଟେଣ୍ଡର ଆହ୍ବାନ କରିଥିଲେ ରାଜ୍ୟ ସରକାର । ହେଲେ କମ୍ପାନୀମାନଙ୍କଠୁ ମତାମତ ନେବା ପରେ ଟେଣ୍ଡର ନିୟମରେ କୋହଳ କରିଥିଲେ ଏବଂ ସର୍ତ୍ତରେ ପରିବର୍ତ୍ତନ କରିଥିଲେ । ଏହାସତ୍ତ୍ୱେ ବି କମ୍ପାନିଙ୍କ ଅନାଗ୍ରହ ଦେଖି ଟେଣ୍ଡରକୁ ଆହୁରି ସପ୍ତାହେ ଅର୍ଥାତ୍ ଜୁନ୍ ୪ ତାରିଖ ଯାଏଁ ବଢ଼ାଯାଇଛି ।
ହେଲେ ଏଠି ପ୍ରଶ୍ନ ଉଠୁଛି ଅନ୍ୟ ରାଜ୍ୟରେ ଗ୍ଲୋବାଲ ଟେଣ୍ଡରକୁ ସଫଳତା ମିଳିନଥିଲା ବେଳେ ଓଡ଼ିଶା ସରକାର କାହିଁକି ଏ ପ୍ରକ୍ରିୟାକୁ ଗଲେ ? ଉତ୍ପାଦନକାରୀ କମ୍ପାନିମାନେ ଆବଶ୍ୟକତା ଅନୁଯାୟୀ ଟିକା ଯୋଗାଇ ପାରୁନଥିବା ବେଳେ ସେମାନେ ଟେଣ୍ଡରରେ କାହିଁକି ବା ସାମିଲ ହୁଅନ୍ତେ ? ଏଭଳି ପ୍ରଶ୍ନ ଏବେ ସବୁଠି ଉଙ୍କି ମାରୁଛି । ଖାଲି ସେତିକି ନୁହେଁ ଗ୍ଲୋବାଲ ଟେଣ୍ଡର ଦ୍ୱାରା ସରକାର କେବଳ ତୁଚ୍ଛା ବାହାବା ସାଉଁଟିବାର ଉଦ୍ୟମ କରୁଥିଲେ ବୋଲି ସମାଲୋଚନା କରାଯାଉଛି ? ଏସବୁ ସହ ଟିକାକରଣ ରାଜ୍ୟରେ ଆଗକୁ କେମିତି ବଢ଼ିବ ତାକୁ ନେଇ ବି ପ୍ରଶ୍ନ ଉଠିଛି ।