ଜ୍ୱର ପରେ ଫୋଟକା, ତା’ପରେ ଚିରନିଦ୍ରା

କୋରାପୁଟ: ପ୍ରଥମେ ଜ୍ୱର ହେଉଛି ଆଉ ତାପରେ ଫୋଟକା। ଶେଷରେ ସବୁଦିନ ପାଇଁ ଚିରନିଦ୍ରାରେ ଶୋଇଯାଉଛି ବ୍ୟକ୍ତିଟିଏ। କୋରାପୁଟ ଜିଲ୍ଲା ଲକ୍ଷ୍ମୀପୁର ବ୍ଲକ ଅନ୍ତର୍ଗତ ଉପରକୁଟିଙ୍ଗା ଗାଁରେ ଏହି ଅଜଣା ରୋଗ ଦେଖାଦେଇଛି।

କୋରାପୁଟ ଜିଲ୍ଲା ଲକ୍ଷ୍ମୀପୁର ବ୍ଲକ ଉପରକୁଟିଙ୍ଗା ଗାଁରେ ଭୟର ବାତାବରଣ। ଗତ ୧୯ରୁ ୨୨ ତାରିଖ ମଧ୍ୟରେ ଏଠାରେ ଅଜଣା ରୋଗ ନେଲାଣି ୩ ଜୀବନ। ପ୍ରଥମେ ଜ୍ୱର ହେଉଛି,ତାପରେ ଛାଡି ଯାଉଛି। ଏହାପରେ କିନ୍ତୁ ଯାଉଛି ଜୀବନ। କେବଳ ସେତିକି ନୁହେଁ ଏହା ଭିତରେ ୬ଟି ଗାଈଗୋରୁ ମଧ୍ୟ ମଲେଣି।

ଅଜଣା ରୋଗର କାରଣ କ’ଣ? କିଭଳି ଏହା ବ୍ୟାପୁଛି… ଏହି ପ୍ରଶ୍ନ ଏବେ ସମସ୍ତଙ୍କ ମନରେ। ତେବେ ଗାଁର ବିପର୍ଯ୍ୟସ୍ତ ପରିମଳ ବ୍ୟବସ୍ଥା ଏହାର କାରଣ ହୋଇପାରେ ବୋଲି ଗ୍ରାମବାସୀ ଆଶଙ୍କା କରୁଛନ୍ତି।

ଗାଁ ଚାରିଆଡ଼େ ସଫା ନ ହୋଇ କୁଢ କୁଢ ମଇଳା ପଡି ରହିଛି। ୧୫୦୦ ଜନସଂଖ୍ୟା ବିଶିଷ୍ଟ ଏହି ଗାଁକୁ ବିଶୁଦ୍ଧ ପାନୀୟ ଯୋଗାଇବା ପାଇଁ କୌଣସି ବି ବ୍ୟବସ୍ଥା ନାହିଁ। ସେପଟେ ରୋଗ ନ ବ୍ୟାପିବା ନେଇ ପଦକ୍ଷେପ ନିଆଯାଉଛି ବୋଲି ଲକ୍ଷ୍ମୀପୁର ମେଡିକାଲ ଅଫିସର କହିଛନ୍ତି।

ସେପଟେ ଡାକ୍ତରୀ ଟିମ୍ ଗାଁରେ ପହଞ୍ଚି ରକ୍ତନମୂନା ସଂଗ୍ରହ କରିବା ସହ କିଛି ରୋଗୀଙ୍କୁ କୋରାପୁଟ ସ୍ଥାନାନ୍ତର କରିଛନ୍ତି।

(କୋରାପୁଟରୁ ନାରାୟଣପାଟଣାରୁ ପି.ଗୋବିନ୍ଦ ରାଜୁ ସୁବୁଦ୍ଧିଙ୍କ ରିପୋର୍ଟ)

You might also like