ରାଜ୍ୟର ଏହି ସବୁ ଗାଁକୁ ଏବେ ବି ପଶିନି କରୋନା ମହାମାରୀ…..

ଏମାନଙ୍କୁଠାରୁ କିଛି ଶିଖିବା ଦରକାର....

  • ସାମୂହିକ ଉଦ୍ୟମ ହେଉ କି କଠୋର ଅନୁଶାସନ
  • ଓଡ଼ିଶାର ବହୁ ଆଦିବାସୀ ଅଧ୍ୟୁଷିତ ଗାଁ ଏବେ ବି କରୋନା ଶୂନ୍ୟ
  • ପ୍ରଥମ ପରେ ଦ୍ୱିତୀୟ ଲହରରେ ବି ଏଯାଏଁ ପଶିପାରିନି ଭୟଙ୍କର ଭାଇରସ୍

ନୂଆଦିଲ୍ଲୀ: ଚାଇନାର ଉହାନରୁ ଉତ୍ପନ୍ନ ପରେ ବିଶ୍ୱର କୋଣ ଅନୁକୋଣରେ ପହଞ୍ଚିଛି ଭୟଙ୍କର କରୋନା ଭୂତାଣୁ। ଆମ ଦେଶରେ ବି ଲହର ପରେ ଲହର ଆସି ନାକେଦମ୍ କଲାଣି ଏ ଭାଇରସ। ହେଲେ ୟାରି ଭିତରେ ଭଲ ଖବର ହେଉଛି, ଆମ ରାଜ୍ୟରେ ଏମିତି କିଛି ଗ୍ରାମାଞ୍ଚଳ ଅଛି, ଯାହା ଆଜି ବି କରୋନା ଶୂନ୍ୟ। ସଂକ୍ରମଣ ରୋକିବାକୁ ଗାଁ ଲୋକଙ୍କ ସାମୁହିକ ଉଦ୍ୟମ ହେଉ କି କଠୋର କରୋନା ଅନୁଶାସନ, ଗାଁକୁ ଛୁଇଁ ପାରିନି ସଂକ୍ରମଣ।

ଗଜପତି ଜିଲ୍ଲା ଗୁମ୍ମା ବ୍ଲକର ଆଦିବାସୀ ଅଧ୍ୟୁଷିତ ତରଙ୍ଗଡ଼ା ପଞ୍ଚାୟତର ୪ ଗାଁ ତଳ ତାମୁସିଂ, ଉପର ତାମୁସିଂ, ତଳପାଙ୍ଗୁଡ଼ା ଓ ଉପର ପାଙ୍ଗୁଡ଼ା ମହାମାରୀର ଦ୍ୱିତୀୟ ଲହର କେବଳ ସହରାଞ୍ଚଳ ନୁହେଁ ଗ୍ରାମାଞ୍ଚଳରେ ବି ଆତଙ୍କ ଖେଳାଇ ଦେଇଛି। ତେବେ ଗଜପତି ଜିଲ୍ଲାର ଏହି ୪ ଗାଁ କିନ୍ତୁ ବ୍ୟତିକ୍ରମ। ପ୍ରଥମ ଲହର ହେଉ କି ଦ୍ୱିତୀୟ ଯାଏଁ ଏହି ୪ ଗାଁକୁ ଛୁଇଁ ପାରିନି କରୋନା। ଏସବୁ ଗାଁର ଲୋକସଂଖ୍ୟା ୫ ଶହରୁ ଅଧିକ। ଏମିତି ନୁହେଁ ଯେ, ସଂକ୍ରମଣ ଭୟରେ ଗାଁରୁ କେହି ବାହାରକୁ ଯାଉନାହାନ୍ତି କି ବାହାରୁ କେହି ଗାଁକୁ ଆସୁନାହନ୍ତି। ଗାଁକୁ ଲୋକଙ୍କ ଯାଆସ ସତ୍ତ୍ୱେ ଏଠାରେ କେହି ବି ସଂକ୍ରମିତ ହୋଇନାହାନ୍ତି।

କରୋନାଠାରୁ ଏବେ ବି ଦୂରେଇ ଥିବା ଆଉ ଏକ ଗାଁ କୋରାପୁଟ ଲମତାପୁଟ ବ୍ଲକର ହନୁମାଳ। ଆଦିବାସୀ ବହୁଳ ଏ ଗାଁରେ ରୁହନ୍ତି ୧୬୦ ପରିବାର। ହେଲେ ଏ ଗାଁରେ କେହି ଜଣେ ବି କରୋନାରେ ଆକ୍ରାନ୍ତ ନାହାନ୍ତି। ଚାଷବାସ କରି ଜୀବୀକା ନିର୍ବାହ କରୁଥିବା ଏଠାକାର ବାସିନ୍ଦା ଉଚ୍ଚଶିକ୍ଷିତ ନହେଲେ ବି ସରକାରୀ ଗାଇଡଲାଇନକୁ ଅକ୍ଷର ଅକ୍ଷରେ ପାଳୁଛନ୍ତି। ପିଲାଠୁ ବୁଢା ଯାଏଁ ସମସ୍ତେ ମାସ୍କ ପିନ୍ଧୁଛନ୍ତି। ସଂକ୍ରମଣ ରୋକିବାକୁ ମାସ୍କ ଏକମାତ୍ର ଉପାୟ, ଏଠିକାର ବାସିନ୍ଦା ତାହା ବେଶ ଭଳ ଭାବେ ବୁଝିଛନ୍ତି।

ସତର୍କତା ଓ ସଚେତନତାକୁ ଗଣ୍ଠିଧନ କରି କୋରନାକୁ ଚକମା ଦେଇଥିବା ଏହି ଗାଁ ହେଉଛି ନବରଙ୍ଗପୁର ଜିଲ୍ଲା କୋଷାଗୁମୁଡ଼ା ବ୍ଲକର ବାଲେଙ୍ଗା ଗାଁର ଲୋକସଂଖ୍ୟା ୧୫ ଶହରୁ ଅଧିକ ରହିଛି। ଏଠିକାର ଅଧିକାଂଶ ଲୋକ ଦାଦନ ଖଟିବାକୁ ଆନ୍ଧ୍ରପ୍ରଦେଶ ଯାଆନ୍ତି, ହେଲେ ସଂକ୍ରମଣ ମାଡ଼ୁଥିବା ଦେଖି ଏଠାକାର ଆଶା ଓ ଅଙ୍ଗନବାଡ଼ି କର୍ମୀ ଗାଁରେ ଘନ ଘନ ବୈଠକ କରି ଲୋକଙ୍କୁ ସଚେତନ କରାଇଥିଲେ। ଲୋକେ ସତର୍କ ହେଲେ, ଗାଁ ପ୍ରବେଶ ପଥକୁ ବାଡ଼ ଦେଇ ଅବରୋଧ କରିବା ସହ ଗାଁରେ ମହାମାରୀକୁ ପୁରାଇ ନଦେବାକୁ ଶପଥ ନେଲେ। ଯାହାର ଫଳ ସ୍ୱରୂପ ବଲେଙ୍ଗା ଗାଁ ଏବେ ବି କରୋନା ମୁକ୍ତ। ସଚେତନତା ଓ ସତର୍କତାକୁ ମୂଳ କରି ଏସବୁ ଗାଁର ଲୋକେ ଯଦି କରୋନାର ମୁକାବିଲା କରିପାରିଲେ ଅନ୍ୟମାନେ କାହିଁକି କରିନପାରିବେ ତାହା ହିଁ ବଡ଼ ପ୍ରଶ୍ନ।

You might also like