ଭୁବନେଶ୍ୱର: ରାଜ୍ୟରେ ମଣ୍ଡି ଅବ୍ୟବସ୍ଥା ଓ ଟୋକନ୍ ସମସ୍ୟାକୁ ନେଇ ଆନ୍ଦୋଳନକୁ ଓହ୍ଲାଇବ ବିଜେପି । ଆସନ୍ତା ଜୁଲାଇ ୧ ଓ ୨ରେ ରାଜ୍ୟର ସବୁ ମଣ୍ଡି ଓ ଯୋଗାଣ ଅଧିକାରୀଙ୍କ ଅଫିସ ଆଗରେ ଧାରଣା ଦିଆଯିବ ବୋଲି ଆଜି ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ବିଜେପି ରାଜ୍ୟ ସଭାପତି ସମୀର ମହାନ୍ତି । ପ୍ରେସ୍ମିଟରେ ରାଜ୍ୟ ସରକାରଙ୍କୁ ଟାର୍ଗେଟ କରି ବିଜେପି ସଭାପତି କହିଛନ୍ତି, ମଣ୍ଡିରେ ଧାନ ଗଜା ହେଉଛି, କିନ୍ତୁ ଚାଷୀର ଧାନ ଉଠୁନି ।
ରାତି ଅନିଦ୍ରା ହୋଇ ବର୍ଷା ସମୟରେ ବି ଚାଷୀ ମଣ୍ଡିରେ ପଡ଼ିରହୁଛି । ମଣ୍ଡି ଅବ୍ୟବସ୍ଥା ନେଇ କେନ୍ଦ୍ରୀୟ କମିଟି ରିପୋର୍ଟ ଦେଇଛି । ମୋଦି ଓଡ଼ିଶାକୁ ଫୋକସ୍ କରୁଥିବା ବେଳେ ରାଜ୍ୟ ସରକାର ଚାଷୀଙ୍କୁ ଧୋକା ଦେଉଥିବା କହିଛନ୍ତି ସମୀର ମହାନ୍ତି ।
ସେହିଭଳି ପ୍ରଧାନମନ୍ତ୍ରୀ ଆବାସ ଯୋଜନାରେ ଯୋଗ୍ୟ ଲୋକଙ୍କୁ ଘର ନମିଳିବା ଏବଂ ୯ଟି ଜିଲ୍ଲାକୁ ଆବାସ ଯୋଜନାରେ ଘର ନଦେବାକୁ ଦୃଢ଼ ବିରୋଧ କରୁଛି ବିଜେପି । ଏହାର ପ୍ରତିବାଦରେ, ଆସନ୍ତା ଜୁଲାଇ ୭,୮ ଓ ୯ ତାରିଖରେ ରାଜ୍ୟର ସବୁ ବ୍ଲକ୍ ଅଫିସ୍ ଆଗରେ ଧାରଣା ଦେବାକୁ ଦଳ ନିଷ୍ପତ୍ତି ନେଇଛି ।
ସେପଟେ ମଣ୍ଡି ପ୍ରସଙ୍ଗକୁ ନେଇ ବିଜେପିର ଅଭିଯୋଗ ଉପରେ ଜବାବ ରଖିଛି ବିଜେଡି । ସରକାରୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ ମଣ୍ଡିରୁ ଧାନ ଉଠାଇବାକୁ କେନ୍ଦ୍ର ସରକାର ଜୁନ ୩୦ ତାରିଖ ଧାର୍ଯ୍ୟ କରିଛନ୍ତି । ରାଜ୍ୟ ବିଜେପି ନେତା କେନ୍ଦ୍ରକୁ କହି ନିୟମ ଉଠାଇ ଦିଅନ୍ତୁ । ଆଗକୁ ନିର୍ବାଚନ ଅଛି, ସେମାନେ ବିଭିନ୍ନ କଥା କହିବେ କିନ୍ତୁ ଲୋକେ ତାକୁ ଗ୍ରହଣ କରିବେନି ବୋଲି କହିଛନ୍ତି ବିଜେଡି ନେତ୍ରୀ ପ୍ରମିଳା ମଲ୍ଲିକ ।
ଅନ୍ୟପଟେ ବରଗ଼ଡ଼ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାନ ବସ୍ତା ରଖି ଚାଷୀଙ୍କ ଧାରଣା ଦେଖିବାକୁ ମିଳିଛି । ମଣ୍ଡିରୁ ଧାନ ଉଠାଇବା ସମସ୍ୟା ନେଇ ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ଧାରଣା ଦେଇଛନ୍ତି ଚାଷୀ । ବରଗଡ଼ ଜିଲ୍ଲା ଭେଡେନ୍ ବ୍ଲକ ଅନ୍ତର୍ଗତ ରେଶମ ପଞ୍ଚାୟତର ଅନେକ ଚାଷୀ ମଣ୍ଡି ସମସ୍ୟା ନେଇ ଜିଲ୍ଲାପାଳଙ୍କ ଦ୍ୱାରସ୍ଥ ହୋଇଛନ୍ତି । ଧାନ ବିକ୍ରି କରିବାକୁ ଚାଷୀଙ୍କୁ ଟୋକନ ଦେବା, ଯେଉଁ ଚାଷୀଙ୍କୁ ଟୋକନ ମିଳି ଅବଧି ସରିଯାଇଛି ପୁଣି ତାଙ୍କୁ ଟୋକନ ପ୍ରଦାନ କରିବା ଇତ୍ୟାଦି ଦାବି ରଖିଛନ୍ତି ଚାଷୀ । ଏନେଇ ଗତକାଲି ଜିଲ୍ଲା ଯୋଗାଣ ଅଧିକାରୀଙ୍କ ଅଫିସ୍ରେ ତାଲା ପକାଇ ଦେଇଥିଲେ । ଏବେ ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ଧାନବସ୍ତା ରଖି ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ ଧାରଣା ଦେଇଛନ୍ତି ।