କେବେ ହେବ ଦଶମ ଓ ଯୁକ୍ତ ଦୁଇ ପରୀକ୍ଷା ?

ଭୁବନେଶ୍ୱର: ମେ ୪ରୁ ଜୁନ୍ ୧୦ ଭିତରେ ବୋର୍ଡ ପରୀକ୍ଷା ଦେବେ ସିବିଏସ୍ଇ ଦଶମ ଓ ଦ୍ୱାଦଶ ଶ୍ରେଣୀ ପିଲା। କାଲି କେନ୍ଦ୍ର ଶିକ୍ଷା ମନ୍ତ୍ରୀ ରମେଶଙ୍କ ଏ ଘୋଷଣା ପରେ ପରୀକ୍ଷା ପାଇଁ ପ୍ରସ୍ତୁତି ଆରମ୍ଭ କରିଛନ୍ତି ସିବିଏସଇ ଛାତ୍ରଛାତ୍ରୀ। ଏଣେ ସିବିଏସଇର ପରୀକ୍ଷା ତାରିଖ ଧାର୍ଯ୍ୟ ପରେ କେବେ ହେବ ରାଜ୍ୟ ବୋର୍ଡ ଦ୍ୱାରା ପରିଚାଳିତ ଦଶମ ଓ ଯୁକ୍ତ ଦୁଇ ପରୀକ୍ଷା, ତାକୁ ନେଇ ବଢିଛି ଛାତ୍ରଛାତ୍ରୀଙ୍କ ଉତ୍କଣ୍ଠା ରାଜ୍ୟରେ ଏଯାଏ ସ୍କୁଲ୍ ଖୋଲିବା କି ପରୀକ୍ଷା ସମ୍ପର୍କରେ କିଛି ବି ନିଷ୍ପତ୍ତି ନେଇନି ସ୍କୁଲ ଓ ଗଣଶିକ୍ଷା ବିଭାଗ। ଫଳରେ ଧିମା ପାରିଛି ପିଲାଙ୍କ ପ୍ରସ୍ତୁତି।

ଗୋଟିଏ ପଟେ ୨୦୨୧ ପ୍ରବେଶ ପରେ ବି ରାଜ୍ୟରେ ଖୋଲିପାରିନି ଗୋଟିଏ ହେଲେ ବିଦ୍ୟାଳୟ। ତେଣୁ ଆଗକୁ ବାକି ଶିକ୍ଷାବର୍ଷର ପାଠପଢ଼ା କେମିତି ହେବ, ଅଫଲାଇନରେ ଶ୍ରେଣୀ ଶିକ୍ଷା ଦାନ ହେବ କି ନାହିଁ, ପରୀକ୍ଷା କେବେ ହେବ ସେ ନିଷ୍ପତ୍ତିକୁ ଅପେକ୍ଷା କରିଛନ୍ତି ଲକ୍ଷ ଲକ୍ଷ ଛାତ୍ରଛାତ୍ରୀ। ଏପଟେ ମାର୍ଚ୍ଚ ୧ରୁ ସିବିଏସ୍ଇ ପ୍ରାକ୍ଟିକାଲ୍ ପରୀକ୍ଷା କେମିତି ହେବ ଏବଂ ସିବିଏସଇ ସିଲାବସ ଅନୁକରଣ କରୁଥିବା ରାଜ୍ୟର ଆଦର୍ଶ ବିଦ୍ୟାଳୟ ପିଲାଙ୍କ ପାଇଁ ସରକାର କି ପଦକ୍ଷେପ ନେବେ ତାକୁ ନେଇ ଲାଗି ରହିଛି ଆଶା ଆଶଙ୍କା।

ପରୀ‍କ୍ଷା ତାରିଖ ଘୋଷଣା ସରିଛି। ସେଥିପାଇଁ ସରକାର ସ୍କୁଲ ଖୋଲିଦେବା ଦରକାର। ପିଲାମାନଙ୍କ ଯେଉଁ କନସେପ୍ଟ ଉପରେ ସମସ୍ୟା ଅଛି, ତାହା ସିଧାସଳଖ କଥା ହୋଇପାରିବେ। ଅନ୍‌ଲାଇନ୍ କ୍ଲାସ୍‌ରେ ଯାହା ପଢିଛନ୍ତି, ତାହା କ୍ଲାରିଟି ହୋଇଯିବ। 
-ପ୍ରକାଶ ଚନ୍ଦ୍ର ସାହୁ, ଅଧ୍ୟକ୍ଷ, ସାଇ ଇଣ୍ଟରନେସନାଲ୍ ସ୍କୁଲ

ଏପଟେ ସିବିଏସ୍ଇ ତାରିଖ ଘୋଷଣା ପରେ ବିଦ୍ୟାଳୟ ଓ ଗଣଶିକ୍ଷା ବିଭାଗ ଆରମ୍ଭ କରିଛି ମାନସ ମନ୍ଥନ। ଅଗ୍ରାଧିକାର ଭିତ୍ତିରେ ସିବିଏସ୍ଇ ପାଠ୍ୟକ୍ରମ ପଢାଯାଉଥିବା ଆଦର୍ଶ ବିଦ୍ୟାଳୟଗୁଡିକରେ କିପରି ସମାନ ତାରିଖରେ ପରୀକ୍ଷା ହେବ, ସେନେଇ ବିଚାର ବିମର୍ଶ କରାଯାଇଛି। ରାଜ୍ୟରେ କରୋନା ସ୍ଥିତି ନିୟନ୍ତ୍ରଣକୁ ଆସିଥିବାରୁ ରାଜ୍ୟ ବୋର୍ଡ ଦ୍ୱାରା ପରିଚାଳିତ ମାଟ୍ରିକ ଓ ଯୁକ୍ତ ଦୁଇ ପରୀକ୍ଷା କଥା ଖୁବ ଶୀଘ୍ର ନିଷ୍ପତ୍ତି ନିଆଯିବ ବୋଲି କହିଛନ୍ତି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ।

ଯେହେତୁ ସିବିଏସ୍‌ଇ ଘୋଷଣା କଲେଣି, ରାଜ୍ୟରେ କିପରି ସ୍କୁଲ ଖୋଲିବ ଏନେଇ ସାମଗ୍ରିକ ଭାବେ ବିଭାଗ ବିଚାର କରିବ। ପିଲାମାନଙ୍କର ସ୍ୱାସ୍ଥ୍ୟ ଯେହେତୁ ଆମମାନଙ୍କ ପାଇଁ ଗୁରୁତ୍ୱପୂର୍ଣ୍ଣ, ସେଥିପାଇଁ କଣ କରାଯାଇପାରିବ, ବିଭାଗ ମଧ୍ୟ ତାହା ଉପରେ ଚିନ୍ତା କରିବ।
-ସମୀର ଦାଶ, ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ

ରାଜ୍ୟରେ ପ୍ରାୟ ୯ ହଜାରରୁ ଅଧିକ ହାଇସ୍କୁଲ୍ ଓ ପ୍ରାୟ ୧୨ ଶହ ଯୁକ୍ତ ଦୁଇ କଲେଜ ରହିଛି ମାଟ୍ରିକରେ ପ୍ରତିବର୍ଷ ପାଖାପାଖି ୬ଲକ୍ଷ ପିଲା ପରୀକ୍ଷା ଦେଉଥିବାବେଳେ ଯୁକ୍ତ ଦୁଇରେ ପରୀକ୍ଷାର୍ଥୀଙ୍କ ସଂଖ୍ୟା ପ୍ରାୟ ୩ ଲକ୍ଷ।

You might also like