ପୁଣି ଗାନ୍ଧି ପରିବାର ହାତରେ କଂଗ୍ରେସର କମାଣ୍ଡ୍

ସୋନିଆ ଅନ୍ତରୀଣ ମୁଖ୍ୟ ହେବା ପରେ ଦଳୀୟ ମହଲରେ ଉତ୍ସାହ

ଭୁବନେଶ୍ୱର :  ସାଧାରଣ ନିର୍ବାଚନ ପରେ ସ୍ଥାଣୁ ପାଲଟିଥିବା ଜାତୀୟ କଂଗ୍ରେସକୁ ସଞ୍ଜିବନୀ। ୨୦ ମାସ ପରେ ପୁଣି ଫେରିଲେ ସୋନିଆ। ଦଳର ସର୍ବୋଚ୍ଚ ନୀତି ନିର୍ଦ୍ଧାରଣ ସଂସ୍ଥା ସିଡବ୍ଲୁସି ସୋନିଆଙ୍କୁ ଅନ୍ତରୀଣ ସଭାପତି ଚୟନ କରିବା ପରେ ଦିଲ୍ଲୀରେ ଏବେ ନୂଆ ଉତ୍ସାହ। ହେଲେ ରାଜ୍ୟ କଂଗ୍ରେସ କଥା କଣ ? କାରଣ ନିର୍ବାଚନରେ ଶୋଚନୀୟ ପ୍ରଦର୍ଶନ ଏବଂ ପରେ ପରେ ମୁଖିଆ ପଦରୁ ନିରଞ୍ଜନଙ୍କ ଇସ୍ତଫା ପରଠୁ ଦଳ ଏଠି ଏକପ୍ରକାର ଦିଶାହୀନ।

ତେଣୁ ସୋନିଆ ଫେରିଥିବାରୁ ଏଠି ପୁଣି ଟ୍ରାକ୍‌କୁ ଫେରିବ କି କଂଗ୍ରେସ? କାରଣ ଆଗକୁ ବିଜେପୁର ଉପ ନିର୍ବାଚନ। ଦଳ ଏଠି କାହା ନେତୃତ୍ୱରେ ମଇଦାନକୁ ଓହ୍ଲାଇବ ତାକୁ ନେଇ ବି ସନ୍ଦେହ। ତେବେ ନେତାଙ୍କ ଆଶା, ସୋନିଆ ଓଡ଼ିଶା ସମ୍ପର୍କରେ ଭଲ ଭାବେ ଅବଗତ ଥିବାରୁ ନେତୃତ୍ୱକୁ ନେଇ ସଠିକ୍ ନିଷ୍ପତ୍ତି ନେବେ।

କଂଗ୍ରେସର ମହାଧିବେଶନ ପର୍ଯ୍ୟନ୍ତ ସୋନିଆ ହିଁ ରହିବେ ଦଳର ଅନ୍ତରୀଣ ଅଧ୍ୟକ୍ଷ। ଆଗାମୀ ମହାଧିବେଶନ ବେଳେ ହିଁ ସ୍ପଷ୍ଟ ହେବ କିଏ ହେବେ ଏଆଇସିସି ଅଧ୍ୟକ୍ଷ। ତେଣୁ ୟା ଭିତରେ ବିଭିନ୍ନ ରାଜ୍ୟ ସଂଗଠନରେ ପରିବର୍ତ୍ତନ ନିଶ୍ଚିତ। ତେବେ ବିଶେଷଜ୍ଞଙ୍କ ମତରେ ଯେଉଁ ରାଜ୍ୟରେ ନିର୍ବାଚନ ହେବାର ଅଛି, ସେଠାରେ ପ୍ରଥମେ ପିସିସି ସଭାପତି ପରିବର୍ତ୍ତନ ପରେ ଓଡ଼ିଶା କଥା ଚିନ୍ତା କରାଯାଇପାରେ।

ଜାତୀୟ କଂଗ୍ରେସରେ ନେତୃତ୍ୱ ଦ୍ୱନ୍ଦ୍ୱ ଦୂର ହୋଇଥିଲା ବେଳେ ରାଜ୍ୟ କଂଗ୍ରେସର ନବକଳେବର କେବେ ହେଉଛି, ତା ଉପରେ ସମସ୍ତଙ୍କ ନଜର।

You might also like