• translate
Pramod Behera

ଭୁବନେଶ୍ୱର : ବରିଷ୍ଠ ସାମ୍ବାଦିକ ବସନ୍ତ ଦାସଙ୍କ ବିୟୋଗ।  କରୋନାରେ ତାଙ୍କର ବିୟୋଗ ହୋଇଥିବା ପରିବାର ପକ୍ଷରୁ ସୂଚନା ମିଳିଛି।  ପୁଅ ଚନ୍ଦନ ଦାସ କହିଛନ୍ତି, ମେ ୧୬ ତାରିଖରେ କରୋନା ପଜିଟିଭ ଚିହ୍ନଟ ହେବା ପରେ ବସନ୍ତ ଦାସ ହୋମ କ୍ୱାରେଣ୍ଟିନରେ ଥିଲେ। ଅବସ୍ଥା ବିଗିଡ଼ିବାରୁ ତାଙ୍କୁ ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା । ଚିକିତ୍ସାଧୀନ ଅବସ୍ଥାରେ ରାତି ୧୧ଟାରେ ତାଙ୍କର ବିୟୋଗ ହୋଇଥିବା ଜଣାଯା‍ଇଛି। ମୃତ୍ୟୁ ବେଳକୁ ତାଙ୍କୁ ୮୨ ବର୍ଷ ହୋଇଥିଲା। ପତ୍ନୀ ପ୍ରମୋଦା ଦାସ ମଧ୍ୟ କରୋନା ଆକ୍ରାନ୍ତ ହୋଇ ଆଇସୋଲେସନରେ ରହିଥିଲେ।

ବସନ୍ତ ଦାସ ରାଜ୍ୟର ଜଣେ ବରିଷ୍ଠ ସାମ୍ବାଦିକ ତଥା ରାଜନୈତିକ ସମୀକ୍ଷକ ଥିଲେ। ତାଙ୍କ ବିୟୋଗରେ ସାମ୍ବାଦିକ ମହଲ ତଥା ବିଭିନ୍ନ ବୁଦ୍ଧିଜୀବୀ ମହଲରେ ଶୋକର ଛାୟା ଖେଳିଯାଇଛି। ତାଙ୍କ ବିୟୋଗକୁ ନେ‍ଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଶୋକ ପ୍ରକାଶ କରିଛନ୍ତି।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶୋକ ପ୍ରକାଶ କରିବା ସହିତ କହିଛନ୍ତି ଯେ ବସନ୍ତ ଦାସ ଜଣେ ସ୍ତମ୍ଭକାର ତଥା ରାଜନୈତିକ ବିଶ୍ଳେଷକ ଭାବରେ ଏକ ସୁନାମ ଅର୍ଜନ କରିଥିଲେ। ସେ ଅର୍ଦ୍ଧ ଶତାବ୍ଦୀରୁ ଅଧିକ ସମୟ ଧରି ସାମ୍ବାଦିକତା ବୃତ୍ତିରେ ସକ୍ରିୟ ଥିଲେ। ସାହିତ୍ୟ ଓ ସାମ୍ବାଦିକତା କ୍ଷେତ୍ରରେ ତାଙ୍କର ଅବଦାନ ପାଇଁ ତାଙ୍କୁ ସ୍ମରଣ କରାଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି।

ସେହିପରି ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡା ମଧ୍ୟ ବସନ୍ତଙ୍କ ବିୟୋଗରେ ଶୋକ ବ୍ୟକ୍ତ କରିଛନ୍ତି। ଏହାସହ ଟ୍ୱିଟ୍ କରି ବସନ୍ତଙ୍କ ପରିବାର ପ୍ରତି ସମବେଦନା ଜଣାଇଛନ୍ତି ବୈଜୟନ୍ତ।

‘ଆଧୁନିକ ଓଡିଶାର ରାଜନୈତିକ ଇତିହାସ’ ଶୀର୍ଷକ ପୁସ୍ତକ ପାଇଁ ଜଣାଶୁଣା ଦାସ ତାଙ୍କ ଶ୍ରେଷ୍ଠ ୧୬ ଟି ପୁସ୍ତକ ରଚନା କରିଥିଲେ। ତାଙ୍କ ପୁସ୍ତକ ‘ଜେ ଦେଶ ଜୟ’, ପାଇଁ ତାଙ୍କୁ ସମ୍ମାନଜନକ ଓଡିଶା ସାହିତ୍ୟ ଏକାଡେମୀ ପୁରସ୍କାର ପ୍ରଦାନ କରାଯାଇଥିଲା। ଏନେଇ ସେ ଅନେକ ସଂଗଠନର ପ୍ରଶଂସା ପାଇଥିଲେ।

ବହୁମୁଖୀ ବ୍ୟକ୍ତିତ୍ୱ ବସନ୍ତ ଦାସ, ଉତ୍କଳ ବିଶ୍ୱବିଦ୍ୟାଳୟରୁ ରାଜନୀତି ବିଜ୍ଞାନରେ ସ୍ନାତକୋତ୍ତର ସମାପ୍ତ କରିବା ପରେ ଏକ ଲାଭଜନକ ସରକାରୀ ଚାକିରୀକୁ ପ୍ରତ୍ୟାଖ୍ୟାନ କରି ସାମ୍ବାଦିକତାକୁ ବାଛିଥିଲେ। ସେ ଓଡ଼ିଶାର ଏକମାତ୍ର ଇଂରାଜୀ ଦୈନିକ ଇଷ୍ଟର୍ଣ୍ଣ ଟାଇମ୍ସରେ ସମ୍ବାଦଦାତା ଭାବରେ ୧୯୬୫ମସିହାରେ ନିଜର କ୍ୟାରିଅର୍ ଆରମ୍ଭ କରିଥିଲେ।

ସେ ୧୯୯୬ ମସିହାରେ ଓଡ଼ିଶା ପାଇଁ ଅମୃତ ବଜାର ପତ୍ରିକା ଗୋଷ୍ଠୀର ପ୍ରକାଶନ ବ୍ୟୁରୋ ଚିଫ୍ ଥାଇ ଅବସର ନେଇଥିଲେ।

ଅବସର ପରେ ବରିଷ୍ଠ ସାମ୍ବାଦିକ ତଥା ସାହିତ୍ୟିକ ପୁସ୍ତକ ଲେଖିବା ଜାରି ରଖିଥିଲେ। ସେ ଓଡିଶା ମିଡିଆ ଏକାଡେମୀ ସମେତ ବହୁ ସଂଖ୍ୟକ ସାମାଜିକ ସଂଗଠନ ସହିତ ଜଡିତ ଥିଲେ।

Other Stories