ଗର୍ଭବତୀ ସ୍ତ୍ରୀଙ୍କୁ ଭେଟିବାକୁ ଯାଇଥିଲେ, ପିଟିଲେ ସୁରକ୍ଷାକର୍ମୀ

ଭୁବନେଶ୍ୱର: କ୍ୱାରେଣ୍ଟିନ୍ ସେଣ୍ଟରରେ ଯୁବକଙ୍କୁ ମାଡ଼ ଅଭିଯୋଗ। ଗର୍ଭବତୀ ସ୍ତ୍ରୀଙ୍କୁ ଭେଟିବାକୁ ଯାଇ ଆକ୍ରମଣର ଶିକାର ହେଲେ ଯୁବକ । ଏପରି ଅଭିଯୋଗ ଆସିଛି ଭଦ୍ରକ ଜିଲ୍ଲା ବନ୍ତ ବ୍ଲକ ତୋଡଙ୍ଗା ପଞ୍ଚାୟତ କ୍ୱାରେଣ୍ଟିନ୍ ସେଣ୍ଟରରୁ।

ଅଭିଯୋଗରୁ ଜଣାଯାଇଛି, ଉଭୟେ ସ୍ୱାମୀ-ସ୍ତ୍ରୀ କିଛି ଦିନ ତଳେ ଦିଲ୍ଲୀରୁ ଗାଁକୁ ଫେରିଥିଲେ।  ତେଣୁ ଘରକୁ ନ ଯାଇ ଉଭୟ  କ୍ୱାରେଣ୍ଟିନ୍ ସେଣ୍ଟରରେ ଥିଲେ। ଗତ ରାତିରେ ସ୍ତ୍ରୀଙ୍କ ପେଟରେ ଯନ୍ତ୍ରଣା ଅନୁଭବ କରିବାରୁ ସେ ସ୍ୱାମୀଙ୍କୁ ଫୋନ୍ କରିଥିଲେ । ମାତ୍ର ପତ୍ନୀଙ୍କୁ ଭେଟିବାକୁ ଯିବା ବେଳେ ସୁରକ୍ଷାକର୍ମୀ ତାଙ୍କୁ ବିରୋଧ କରିବା ସହ ତାଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଛି । ସେତିକି ନୁହେଁ ତାଙ୍କ ଗର୍ଭବତୀ ସ୍ତ୍ରୀଙ୍କୁ ମଧ୍ୟ ସୁରକ୍ଷା କର୍ମୀ ଠେଲାପେଲା କରିଥିବା ଯୁବକ ଅଭିଯୋଗ କରିଛନ୍ତି।

ଏ ନେଇ ବିଡିଓ କହିଛନ୍ତି ସ୍ୱାମୀ-ସ୍ତ୍ରୀଙ୍କୁ ଦିନ ବେଳା କଥା ହେବା ପାଇଁ ସୁଯୋଗ ଦିଆଯାଇଥିଲା। ମାତ୍ର ଯୁବକ ଜଣଙ୍କ ରାତିରେ ମହିଳା ରହୁଥିବା ରୁମକୁ ଯିବାରୁ ଅନ୍ୟ ମହିଳା ଅନ୍ତେବାସୀମାନେ ବିରୋଧ କରିଥିଲେ।  ଫଳରେ ସୁରକ୍ଷାକର୍ମୀମାନେ ତାଙ୍କୁ ବିରୋଧ କରିଥିଲେ ବୋଲି ବିଡିଓ କହିଛନ୍ତି।

You might also like