ରାଜ୍ୟପାଳ ପୁରସ୍କାରପ୍ରାପ୍ତ ଶିକ୍ଷକଙ୍କ ଶବକୁ ଅସମ୍ମାନ: ଜଙ୍ଗଲରେ ଶବ ପଡିଥିବା ଫଟୋ ଭାଇରାଲ

କାମାକ୍ଷନଗର:କରୋନାରେ ଉଜୁଡି ଯାଉଛି ଘର, ଭାଙ୍ଗି ଯାଉଛି ପରିବାର । ଆପଣାର ଲୋକମାନେ ହୋଇ ଯାଉଛନ୍ତି ସାତପର ।  ମୃତ୍ୟୁ ମୁହଁରେ ଛଟପଟ ହେଉଥିବା ବାପାଙ୍କୁ ପାଣି ଟୋପାଏ ଦେବାକୁ ଡ଼ରୁଛି ପୁଅ । ଶବ ତା ଏଠି ଅଲୋଡ଼ା । ତାଙ୍କୁ କରୋନା ହୋଇଥାଉ ବା ନ ଥାଉ, ସନ୍ଦେହରେ ଲୋକେ ପାଖ ମାଡୁ ନାହାନ୍ତି । ସେ ଶବ ଯେତେ ମହାନ ବ୍ୟକ୍ତିଙ୍କର ହେଉ ନା କାହିଁକି ।  ଢେଙ୍କାନାଳ ଜିଲ୍ଲାର ଏମିତି ଜଣେ ବ୍ୟକ୍ତି, ଯାହାଙ୍କୁ ବଂଚିଥିବାବେଳେ ଏତେ ସମ୍ମାନ ମିଳୁଥିଲା । ହେଲେ ମଲା ପରେ ତାଙ୍କ ଶବ ହୋଇଗଲା ଅଲୋଡ଼ା ।  ଅନ୍ତିମ ସଂସ୍କାର କରିବାକୁ ବି କେହି ଆସିଲେ ନାହିଁ ।

ଢେଙ୍କାନାଳ ଜିଲ୍ଲା କାମାକ୍ଷ୍ୟାନଗର ଅଂଚଳର ରାଷ୍ଟ୍ରପତି ପୁରସ୍କାରପ୍ରାପ୍ତ ଶିକ୍ଷକ ଶ୍ୟାମସୁନ୍ଦର ।  ୮୨ ବର୍ଷ ବୟସ୍କ ଶ୍ୟାମସୁନ୍ଦର ଗତ କିଛିନ ଦିନ ହେଲା ଅସୁସ୍ଥ ଥିଲେ । ରୋଗ ଶଯ୍ୟାରେ ପଡି ମୃତ୍ୟୁ ସହ ଲଢୁଥିଲେ । ଘରେ ପୁଅ, ବୋହୁ ସମସ୍ତେ ଥିଲେ, ହଠାତ ପରିବାରର ସବୁ ସଦସ୍ୟ କୋଭିଡରେ ପଡିଗଲେ । ଅବସ୍ଥା ଖରାପ ହେବାରୁ ସବୁ ସଦସ୍ୟଙ୍କୁ ହସ୍ପିଟାଲକୁ ନିଆଗଲା ।  ଘରେ ଏକୁଟିଆ ରୋଗ ଶଯ୍ୟାରେ ପଡ଼ିଥିଲେ ବୃଦ୍ଧ ଶ୍ୟାମସୁନ୍ଦର । ବଂଚିବା ପାଇଁ ଚଳାଇଥିଲେ ଶେଷ ଯୁଦ୍ଧ । ଶେଷରେ କିନ୍ତୁ ହାରିଗଲେ । ରବିବାର ତାଙ୍କର ମୃତ୍ୟୁ ଘଟିଥିଲା । ପରିବାର ଲୋକଙ୍କ ଫେରିବା ବାଟକୁ ଚାହିଁ ଚାହିଁ ଆଖି ବୁଜିଦେଲେ ଶ୍ୟାମସୁନ୍ଦର।

ହେଲେ ସମସ୍ୟା ଆରମ୍ଭ ହେଲେ ଏହିଠାରୁ । କିଏ ନେବ ଶବ ? କିଏ କରିବ ଅନ୍ତିମ ସଂସ୍କାର ? କାରଣ ପରିବାର ସବୁ ସଦସ୍ୟ କୋଭିଡ ହସ୍ପିଟାଲରେ। ଗାଁ ଲୋକ ବି ଅନ୍ତିମ ସଂସ୍କାର କଲେନି । କାରଣ ତାଙ୍କ ଘରର ସବୁ ସଦସ୍ୟ ଯେତେବେଳେ କରୋନା ଆକ୍ରାନ୍ତ ଥିଲେ, ତେଣୁ ଶ୍ୟାମସୁନ୍ଦରଙ୍କୁ କରୋନା ହୋଇଥିବ ଭାବି କେହିଁ ଶବକୁ ଛୁଇଁଲେନି ।

ଫଳରେ ଦୀର୍ଘ ସମୟ ଧରି ମୃତଦେହ ଘରେ ପଡି ରହିଥିଲା । ପରେ କାମାକ୍ଷାନଗର ଏନ୍ଏସି କର୍ତ୍ତୃପକ୍ଷଙ୍କ ସହଯୋଗରେ ସୁଇପରମାନେ ପିପିଇ କିଟ୍ ପିନ୍ଧି ମୃତଦେହକୁ ଉଠାଇଥିଲେ । ହେଲେ ଅନ୍ତିମ ସତ୍କାର କରି ନ ଥିଲେ । ରାଷ୍ଟ୍ରପତି ପୁରସ୍କାର ପ୍ରାପ୍ତ ଶିକ୍ଷକଙ୍କର ଶବ କାମାକ୍ଷାନଗର ଗୁଣ୍ଡିଚାନାଳୀ ଜଙ୍ଗଲରେ ପଡିଥିଲା । ଯାହାର ଭିଡିଓ ଭାଇରାଲ୍ ହେବାରେ ଲାଗିଥିଲା ।
ଏହାକୁ ନେଇ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା ।

ସେପଟେ କାମାକ୍ଷାନଗର ଏନ୍ଏସି କାଯର୍ୟନିର୍ବାହୀ ଅଧିକାରୀ ବିରଜା ପ୍ରସାଦ ରଥ କହିଛନ୍ତି, ମୃତଦେହ ପୋତିବା ପାଇଁ ଜେସିବି ମେସିନ ଡକାଯାଇଥିଲା । ମେସିନ ବିଳମ୍ବରେ ପହଞ୍ଚିବାରୁ ମୃତଦେହକୁ ଏକ ଗଛ ମୂଳେ ରଖାଯାଇଥିଲା । ଏହି ସମୟରେ କେହି ଫଟୋ ଉଠାଇ ଭାଇରାଲ୍ କରିଦେଇଛନ୍ତି ।

You might also like