କଟକ: ଡନ୍ ଧଳସାମନ୍ତ ବ୍ରଦର୍ସଙ୍କ ଘରେ ପୋଲିସ୍ ରେଡ୍ କରିଛି। ଚଢ଼ାଉ ବେଳେ ତାଙ୍କ ଘରୁ ବିପୁଳ ପରିମାଣର ଗୁଳି ଓ ବନ୍ଧୁକ ମିଳିଛି। ଡି ବ୍ରଦର୍ସ ଜେଲରେ ଥାଇ ବି ଗୁଳିଗୋଳା ବ୍ୟବସାୟ କରୁଥିବା ନେଇ ବିଶେଷ ସୂତ୍ରରୁ ସୂଚନା ପାଇବା ପରେ କମିଶନରେଟ୍ ପୋଲିସ ତାଙ୍କ ସିଡିଏ ଘରେ ଅତର୍କିତ ଚଢାଉ କରିଥିଲା ।
ଚଢାଉ ବେଳେ ୫୦୦ ରାଉଣ୍ଡ ଗୁଳି ଓ ୭ଟି ବନ୍ଧୁକ ଜବତ କରିଛି । ଘରର ଇଣ୍ଟରିୟର ଡିଜାଇନିଂରେ ଗୋଟିଏ ସିଲ୍ ବାକ୍ସ ଭିତରୁ ଏହି ସବୁ ଗୁଳି ଓ ବନ୍ଧୁକ ମିଳିଛି । ଏ ଘଟଣାରେ ୩ ଜଣଙ୍କୁ ଅଟକ ରଖିଛି ପୋଲିସ । ଘରକୁ ପୋଲିସ ନିଜ କବଜାକୁ ନେଇଛି ।
ଧଳ ସାମନ୍ତ ଘରେ ରେଡ୍ ବେଳେ କଟକ ଡିସିପି, ଜଣେ ଅତିରିକ୍ତ ଡିସିପି ଏବଂ ୫ ଜଣ ଆଇଆଇସି ସାମିଲ ହୋଇଥିଲେ । ତେବେ ଧଳସାମନ୍ତ ଘରୁ ଏତେ ପରିମାଣର ଗୁଳି, ବନ୍ଧୁକ କେଉଁଠୁ ଆସିଲା ? ସେ ଦିଗକୁ ନେଇ ତଦନ୍ତ ହେଉଛି। ଆବଶ୍ୟକ ପଡ଼ିଲେ ଡି ବ୍ରଦର୍ସଙ୍କୁ ଜେଲରୁ ରିମାଣ୍ଡରେ ଆଣି ପୋଲିସ ପଚରା ଉଚରା କରିପାରେ।