ଭଦ୍ରକ: କାର୍ଯ୍ୟକ୍ଷମ ହୋଇପାରୁନି ଭଦ୍ରକ ଜିଲ୍ଲାର ମନ୍ତେଇ ବ୍ରିଜ୍ । ମୁଖ୍ୟମନ୍ତ୍ରୀଙ୍କ ଶିଳାନ୍ୟାସକୁ ୮ ବର୍ଷ ବିତିଥିଲେ ବି ଅଧପନ୍ତରିଆ ପଡିଛି କାମ । ଜିଲ୍ଲାର ତିହିଡି ଓ ବାସୁଦେବପୁର ବ୍ଲକକୁ ସଂଯୋଗ କରିବା ପାଇଁ ବହୁ ଦାବି ପରେ ମନ୍ତେଇ ନଦୀରେ ଏହି ବ୍ରିଜଟି ତିଆରି ହେଉଥିଲା । ହେଲେ ବିଭାଗୀୟ ଅଧିକାରୀଙ୍କ ଉଦାସୀନତା ଯୋଗୁଁ କାମ ଅଧାରେ ଅଟକି ରହିଛି । ଏଥିପାଇଁ ସ୍ଥାନୀୟ ବାସିନ୍ଦାଙ୍କ ମନରେ ପ୍ରବଳ ଅସନ୍ତୋଷ ।
ତିହିଡି ଓ ବାସୁଦେବପୁର ବ୍ଲକକୁ ସଂଯୋଗ କରିବା ପାଇଁ ମନ୍ତେଇ ନଦୀରେ ଗତ ୮ ବର୍ଷ ହେଲା ନିର୍ମାଣ ହେଉଛି ଏହି ସେତୁ । ମାତ୍ର ଏହା କାର୍ଯ୍ୟକ୍ଷମ ହେଉନଥିବାରୁ ହଇରାଣ ହେଉଛନ୍ତି ୧୨ଟି ପଂଚାୟତର ଶତାଧିକ ଲୋକେ । ବନ୍ୟାଂଚଳ ହୋଇଥିବାରୁ ମାଟିସାହିରେ ଥିବା ଭଙ୍ଗା କାଠ ପୋଲଟି ବର୍ଷର ୪ ମାସ ପାଣିରେ ବୁଡି ରହେ ।
ବହୁ ଦାବି ପରେ ୨୦୧୩ ମସିହା ଫେବୃଆରୀ ୧୧ ତାରିଖରେ ମୁଖ୍ୟମନ୍ତ୍ରୀ ଏଠାରେ ସେତୁ ପାଇଁ ଶିଳାନ୍ୟାସ କରିଥିଲେ । ମାତ୍ର ଘରୋଇ ଜମି ବିବାଦରୁ ଦୀର୍ଘ ବର୍ଷ କାମ ବନ୍ଦ ହେବା ପରେ ଗଲା ୩ ବର୍ଷ ହେଲା ସେତୁର ଛାତ ପଡିଛି । ହେଳେ ଆପ୍ରୋଚ୍ ରୋଡ କାମ ସରୁନି । ପୁଣି ସେତୁର ଛାତ ନିକଟରୁ ରିଟର୍ଣ୍ଣିଂ ୱାଲ୍ ନିର୍ମାଣ ହୋଇନଥିବାରୁ ଠିକାସଂସ୍ଥା ପକ୍ଷରୁ ପକାଯାଉଥିବା ମାଟି ସବୁ ନଦୀରେ ମିଶିଯାଉଥିବା ଅଭିଯୋଗ କରିଛନ୍ତି ଲୋକେ ।
କାଠ ପୋଲଟି ବିପଦପୂର୍ଣ୍ଣ ଅବସ୍ଥାରେ ଥିବାରୁ ଆମ୍ବୁଲାନ୍ସ ବା ଅଗ୍ନିଶମ ଗାଡି ଏହି ପୋଲ ଉପରେ ଆସିପାରୁନି । ଏହାସହ ଗତ ୟାସ୍ ବାତ୍ୟାରେ ମାଟି ପଡିଥିବା ଆପ୍ରୋଚ୍ ରୋଡଟି ମଧ୍ୟ ଧୋଇ ଯାଇଛି । ସେତୁ ପାଇଁ ବିଭିନ୍ନ ଫୋରମରେ ଅଭିଯୋଗ ପରେ ବି କିଛି ସୁଫଳ ମିଳୁନଥିବାରୁ ଅସନ୍ତୋଷ ବ୍ୟକ୍ତ କରିଛନ୍ତି ଲୋକେ । ଅନ୍ୟପଟେ ନିର୍ବାହୀ ଯନ୍ତ୍ରୀ କହିଛନ୍ତି, ରିଟର୍ଣ୍ଣିଂ ୱାଲ୍ରେ ତ୍ରୁଟି ଥିବାରୁ ଖୁବ୍ ଶୀଘ୍ର ନୂଆ ଡିଜାଇନ୍ କରାଯିବ ।