ନୟାଗଡ଼(ଆର୍ତ୍ତତ୍ରାଣ ପ୍ରଧାନ) : ସରକାରଙ୍କ ବିକାଶ ଚିତ୍ରର ଆଉ ଏକ ଆଇନା । ରାସ୍ତା, ପାଣି, ବିଜୁଳି ଓ ସ୍ୱାସ୍ଥ୍ୟ ସେବା ନିର୍ବାଚନର ଏ ଚାରି ପ୍ରମୁଖ ପ୍ରସଙ୍ଗକୁ ନେଇ ଏବେ ମଇଦାନରେ ମୁହାଁମୁହିଁ ହେଉଛନ୍ତି ନେତା। ନିର୍ବାଚନ ପୂର୍ବରୁ ଭୋଟରଙ୍କ ପାଖରେ ପ୍ରତିଶ୍ରୁତିର ପାହାଡ଼ ଠିଆ କଲା ବେଳେ ସବୁ ଦଳର ଫୋକସରେ ରହୁଛି ଏ ଚାରି ପ୍ରସଙ୍ଗ। ହେଲେ ରାଜ୍ୟରେ ଏବେ ବି ଏମିତି ଅପହଞ୍ଚ ଇଲାକା ଅଛି ଯେଉଁଠି ନେତାଙ୍କ ପାଦ କେବଳ ଭୋଟ୍ ବେଳେ ପଡେ। ସ୍ଥିତି ନଗଡା ଭଳି । ବିକାଶର ନା ଗନ୍ଧ ନାହିଁ ନୟାଗଡ଼ର ନଗଡା ତଥା ନୂଆଗାଁରେ । ଗାଁକୁ ନା ଅଛି ପକ୍କା ରାସ୍ତା ନା ଅଛି ସ୍କୁଲ କି ଅଙ୍ଗନବାଡି । ପାଣି, ବିଜୁଳି ବି ସାତ ସପନ ।
ନୟାଗଡ଼ ଜିଲ୍ଲା ରଣପୁର ବ୍ଲକ ନରେନ୍ଦ୍ରପୁର ପଞ୍ଚାୟତ ବଧିପାଟଣା ମୌଜାର ଏକ ଛୋଟ ଗାଁ ନୂଆଗାଁ । ଖୋର୍ଦ୍ଧା- ବଲାଙ୍ଗୀର ୫୭ ନମ୍ବର ଜାତୀୟ ରାଜପଥ ଠାରୁ ମାତ୍ର ୧ କିଲୋମିଟର ର ଦୂରତା । ସ୍ଥିତି କିନ୍ତୁ ଉପାନ୍ତ ଇଲାକା ଠାରୁ ବି ଆହୁରି ସଙ୍ଗୀନ । ଅଭିଶପ୍ତ ଜୀବନ ବିତାଉଛନ୍ତି ଗାଁ ଲୋକ । ମୌଳିକ ସୁବିଧାରୁ ସେମାନଙ୍କ ପାଇଁ ସାତ ସପନ । ଦୀପ ତଳ ଅନ୍ଧାର ଭଳି ଏତେ ବର୍ଷ ପରେ ମଧ୍ୟ ଗାଁକୁ ପକ୍କା ସଡ଼କ ଟିଏ ନାହିଁ କି ପିଇବା ପାଣିର ସୁବିଧା ନାହିଁ ।
ନା ଅଛି ଅଙ୍ଗନବାଡି ନା ଅଛି ବିଦ୍ୟାଳୟ । ବିଦ୍ୟୁତ ଖୁଣ୍ଟ ଅଛି ହେଲେ ବିଜୁଳି ଇଚ୍ଛାରେ ଆସୁଛି ଆଉ ଯାଉଛି । ଛୋଟ ପିଲା ମାନେ ଚାଲି ଚାଲି ୨ କିମି ଦୂର ଅଙ୍ଗନବାଡି ପଢିବାକୁ ଯାଉଥିବା ବେଳେ ବର୍ଷା ଦିନେ ରୋଗୀକୁ ଦୋଳାରେ ବୋହି ନେବାକୁ ବାଧ୍ୟ ହୁଅନ୍ତି ଲୋକେ । ଗାଁର ଅଧାରୁ ଅଧା ଲୋକ ଜଙ୍ଗଲରୁ କେନ୍ଦୁପତ୍ର ତୋଳି ଜୀବନ ନିର୍ବାହ କରନ୍ତି । ଆଉ କିଛି ଲୋକ ଦିନମଜୁରୀ ଲାଗି ପରିବାର ମଧ୍ୟ ପ୍ରତିପୋଷଣ କରନ୍ତି ।
ହେଲେ ବର୍ତମାନ ଲକଡାଉନ ପାଇଁ କାମ ବନ୍ଦ ଅଛି । ତେଣୁ ପରିବାର ଚଳାଇବା ସହ ପେଟକୁ ଦୁଇ ମୁଠା ଦାନା ଯୋଗାଡ଼ କରିବା ସେମାନଙ୍କ ପାଇଁ କଷ୍ଟକର ହୋଇପଡ଼ିଛି । ତେବେ ଏନେଇ ପ୍ରଶାସନ ନିକଟରେ ବାରମ୍ବାର ଗୁହାରୀ କଲେ ସୁଦ୍ଧା ବାବୁମାନେ ଆଖିରେ ଆଙ୍ଗୁଠି ଗେଞ୍ଜି ବସି ରହିଛନ୍ତି । ତେଣୁ ଏଥର ଆଉ ଭୋଟ ଦେବୁ ନାହିଁ ବୋଲି କହୁଛନ୍ତି ସ୍ଥାନୀୟ ବାସିନ୍ଦା ।
ତେବେ ବିଡ଼ିଓ ଏବଂ ସରପଞ୍ଚଙ୍କ ସହ ଆଲୋଚନା କରି ଏହି ଗାଁର ବିକାଶ ପାଇଁ ପଦକ୍ଷେପ ନେବେ ବୋଲି କହିଛନ୍ତି ନୟାଗଡ଼ ଉପ ଜିଲ୍ଲାପାଳ ଲଗ୍ନଜିତ ରାଉତ । ତେବେ ନୟାଗଡରେ ବିକାଶର ଏଭଳି ସାଙ୍ଘାତିକ ଚିତ୍ର ଦେଖିଲେ ଯେ କେହି ବି କହିବ ଏଇ ଗାଁ ହେଉଛି ନୟାଗଡ଼ର ଆଉ ଏକ ନଗଡା ।