ଛାତ୍ରଛାତ୍ରୀଙ୍କୁ ମିଳିବ ମଧ୍ୟାହ୍ନ ଭୋଜନ ଚାଉଳ ଓ ରୋଷେଇ ଖର୍ଚ୍ଚ

ଭୁବନେଶ୍ୱର: ଲକ୍‌ଡାଉନ୍‌ ସମୟରେ ଓଡ଼ିଶାର ଛାତ୍ରଛାତ୍ରୀଙ୍କୁ ମିଳିବ ୫୭ ଦିନର ମଧ୍ୟାହ୍ନ ଭୋଜନ ଚାଉଳ। ଅର୍ଥାତ୍‌ ଜୁନ୍ ୧୪ରୁ ହିସାବକରି ଅଗଷ୍ଟ ୩୧ ଯାଏ ମୋଟ୍‌ ୫୭ଟି କାର୍ଯ୍ୟ ଦିବସ ପାଇଁ ଛାତ୍ରଛାତ୍ରୀଙ୍କୁ ଏହି ଚାଉଳ ମିଳିବ। ସ୍କୁଲ୍‌ରେ ଗଚ୍ଛିତ ଥିବା ଚାଉଳକୁ ଛାତ୍ରଛାତ୍ରୀଙ୍କୁ ଦିଆଯିବ।

ଯେଉଁଠି ଚାଉଳ ନିଅଣ୍ଟ ଥିବ ବା ନ ଥିବ ସେସବୁ ସ୍ଥାନରେ ଛାତ୍ରଛାତ୍ରୀଙ୍କୁ ଏକ କୁପନ୍‌ ମିଳିବ।  ଏହି କୁପନ୍‌ ଦେଖାଇ ପିଡିଏସ୍‌ କାଉଣ୍ଟରରୁ ଚାଉଳ ନେଇପାରିବେ ଛାତ୍ରଛାତ୍ରୀ। ଏନେଇ ରାଜ୍ୟ ମଧ୍ୟାହ୍ନ ଭୋଜନ ନୋଡାଲ ଅଫିସରଙ୍କୁ ବିଦ୍ୟାଳୟ ଓ ଗଣଶିକ୍ଷା ବିଭାଗ ଚିଠି ଲେଖିଛି। ସେହିପରି ରନ୍ଧା ଖର୍ଚ୍ଚ ଅଭିଭାବକଙ୍କ ବ୍ୟାଙ୍କ୍‌ ଆକାଉଣ୍ଟକୁ ପଠାଇବା ଲାଗି ଚିଠିରେ ନିର୍ଦ୍ଦେଶ ରହିଛି।

ଅନ୍ୟପକ୍ଷରେ, ଯେଉଁ ସ୍କୁଲ୍‌ ଗୁଡ଼ିକରେ କ୍ୱାରେଣ୍ଟିନ୍‌ ସେଣ୍ଟର ହୋଇଛି, ସେହି ସ୍କୁଲ୍‌ର ପ୍ରଧାନଶିକ୍ଷକ ବିଦ୍ୟାଳୟ ପରିସରରେ ଚାଲୁଥିବା କ୍ୱାରେଣ୍ଟିନ୍ ସେଣ୍ଟରର ଫୁଡ୍‌ ସପ୍ଲାୟର୍‌ଙ୍କୁ ଚାଉଳ ବିକ୍ରି କରିପାରିବେ। କିଲୋ ୩୨ ଟଙ୍କା ଦରରେ ଚାଉଳ ବିକି ପାରିବେ। ବିକ୍ରି ହୋଇଥିବା ଏହି ଟଙ୍କାକୁ ପ୍ରଧାନଶିକ୍ଷକମାନେ ଜିଲ୍ଲା ଶିକ୍ଷା ଅଧିକାରୀଙ୍କ ନିକଟରେ ଜମା କରିପାରିବେ। ଏହା ହେଉଛି ଦ୍ୱିତୀୟ ପର୍ଯ୍ୟାୟ।

ସୂଚନାଥାଉ କି, ପ୍ରଥମ ପର୍ଯ୍ୟାୟରେ ମାର୍ଚ୍ଚ ୧୩ରୁ ଜୁନ୍‌ ୧୩ ଯାଏ ୯୦ ଦିନ ପାଇଁ ଛାତ୍ରଛାତ୍ରୀଙ୍କୁ ଚାଉଳ ଓ ରୋଷେଇ ଖର୍ଚ୍ଚ ପ୍ରଦାନ କରାଯାଇଛି।

You might also like