ନିଶା ନିବାରଣ ନେଇ ହାଇକୋର୍ଟଙ୍କ ଆଦେଶ ମାନୁ ନାହାନ୍ତି ସରକାର

ଭୁବନେଶ୍ୱର: ଲୋକେ ମଦ ପିଇ ମାତାଲ୍। ସରକାର ବି ମଦରୁ ରାଜସ୍ୱ କମାଇ ମାଲାମାଲ୍। ହେଲେ ହାଇକୋର୍ଟଙ୍କ ନିଶା ନିବାରଣ ଆଦେଶକୁ ଭୁଲି ଯାଇଛନ୍ତି ସରକାର। ଏ ନେଇ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ ବିଭାଗର ଚିଠି ଖୋଲିଛି ଗୁମର। ଲୋକଙ୍କ ଭିତରେ ସଚେତନା ସୃଷ୍ଟି ସହ ଜିଲ୍ଲାମୁଖ୍ୟ ଚିକିତ୍ସାଳୟରେ ନିଶା ନିବାରଣ କେନ୍ଦ୍ର ଖୋଲିବା ପାଇଁ ୨୦୧୫ରେ ନିର୍ଦ୍ଦେଶ ଦେଇଥିଲେ ହାଇକୋର୍ଟ। ଏ ବାବଦରେ ମଦ ନିଗମ ପ୍ରଥମ ବର୍ଷ ୨କୋଟି ଖର୍ଚ୍ଚ କରିଥିଲେ ବି ଗଲା ୩ ବର୍ଷ ହେଲା ଟଙ୍କାଟିଏ ବି ଖର୍ଚ୍ଚ କରିନି।

ନିର୍ବାଚନ ବେଳେ ଭଦ୍ରକ ତିହିଡିର ମଦମୃତ୍ୟୁ ବିଭୀଷିକା ଏବେ ବି ତାଜା ରହିଛି। ବିଷାକ୍ତ ମଦ ପିଇ ଏଠି ଚାଲିଯାଇଥିଲା ୧୨ ଅମୂଲ୍ୟ ଜୀବନ । ମଦ ପିଇ ବେପରୁଆ ଗାଡି ଚାଳନା ଓ ଦୁର୍ଘଟଣା ନିତିଦିନିଆ ଘଟଣା ହୋଇଗଲାଣି । ଏପରି ସ୍ଥିତିରେ ନିଶାନିବାରଣକୁ ଗୁରୁତ୍ୱ ଦେଇ ସବୁ ଜିଲ୍ଲା ମୁଖ୍ୟ ଚିକିତ୍ସାଳୟ ସହ ମେଡିକାଲ କଲେଜରେ ନିଶା ନିବାରଣକେନ୍ଦ୍ର ଖୋଲିବା ପାଇଁ ୨୦୧୫ରେ ସରକାରଙ୍କୁ ନିର୍ଦ୍ଦେଶ ଦେଇଥିଲେ ହାଇକୋର୍ଟ। ହେଲେ କୋର୍ଟଙ୍କ ଏ ନିର୍ଦ୍ଦେଶକୁ ପାଳନ କରିନାହାଁନ୍ତି ସରକାର । ହାଇକୋର୍ଟଙ୍କ ଏ ନିର୍ଦ୍ଦେଶକୁ ମନେପକାଇ ଏବେ ଅବକାରୀ ସଚିବଙ୍କୁ ଚିଠି ଲେଖିଛି ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତକରଣ ବିଭାଗ। ନିଶା ନିବାରଣ ପାଇଁ ସଚେତନତା ସୃଷ୍ଟି କରିବାକୁ ଅବକାରୀ ବିଭାଗ ପ୍ରତିବର୍ଷ ୨ କୋଟି ଟଙ୍କା ଦେବାର ଥିଲେ ବି ୨୦୧୫ ପରଠାରୁ ଆଉ ଦେଉ ନାହିଁ ବୋଲି ଚିଠିରେ ଉଲ୍ଲେଖ ଅଛି। ତେଣୁ ସରକାରୀ ହସ୍ପିଟାଲରେ ନିଶା ନିବାରଣ କେନ୍ଦ୍ର ଖୋଲିବା ହେଉ କି ଲୋକଙ୍କୁ ସଚେତନ କରିବା ହେଉ ପୂରା ନିରବ ପଡ଼ିଯାଇଛି ସରକାରଙ୍କ ପଦକ୍ଷେପ।

ସେପଟେ ମଦରୁ ପ୍ରତିବର୍ଷ ରାଜସ୍ୱ ଆଦାୟ ବଢ଼ିଚାଲିଛି। ୨୦୧୭-୧୮ ବର୍ଷରେ ମଦରୁ ୩ ହଜାର ୨୨୧ କୋଟି ମିଳିଥିବା ବେଳେ ୧୮-୧୯ ବର୍ଷରେ ଏହା ୨୧ ପ୍ରତିଶତ ବଢ଼ି ୩ ହଜାର ୯୨୫ କୋଟି ହୋଇଥିଲା । ତେବେ ଏତେ ଟଙ୍କା ରାଜସ୍ୱ ମିଳିଥିଲେ ବି ସରକାର ନିଶାନିବାରଣ ପାଇଁ ଆନ୍ତରିକତା ଦେଖାଉନାହାଁନ୍ତି। ଏପଟେ ୨୦୧୫ରେ ନିଶାନିବାରଣ ପାଇଁ ୨ କୋଟି ଟଙ୍କା ଦେଇଥିବା ମଦ ନିଗମ ତାପରେ ନିଶାନିବାରଣ ପାଇଁ  କିନ୍ତୁ ଆଉ ମନ ଦେଉନି । ସେପଟେ ଅବକାରୀ ବିଭାଗ ହାଇକୋର୍ଟଙ୍କ ନିର୍ଦ୍ଦେଶକୁ ମାନୁ ନଥିବା ଅଭିଯୋଗ ସରକାରଙ୍କୁ ଘେରିଛନ୍ତି ବିରୋଧୀ। ତେବେ ମଦ ନିଗମ କହିଛି ସରକାରଙ୍କ ନିର୍ଦ୍ଦେଶ ମିଳିଲେ ନିଶାନିବାରଣ ପାଇଁ ଟଙ୍କା ଖର୍ଚ୍ଚ କରିବ।

You might also like