କରୋନା ମୁକାବିଲା ପାଇଁ କେନ୍ଦ୍ର ସରକାରଙ୍କ ପାଖରେ ଏହିସବୁ ଦାବି ରଖିଲେ ନବୀନ

ଭୁବନେଶ୍ୱର: କରୋନା ସଂକ୍ରମଣକୁ ରୋକିବା ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ମିଳିତ ଭାବେ ପ୍ରୟାସ କରୁଥିବାବେଳେ ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ର ପାଖରେ କିଛି ଦାବି ରଖିଛନ୍ତି। କରୋନା ସ୍ଥିତି ନେଇ ପ୍ରଧାନମନ୍ତ୍ରୀ ଓ ଟିମ୍‌ ସହିତ ଅପରାହ୍ନରେ ଭିଡିଓ କନ୍‌ଫରେନ୍ସିଂ ମାଧ୍ୟମରେ ଆଲୋଚନା କଲା ବେଳେ ଏହି ଦାବି ରଖିଥିଲେ ନବୀନ।

ଉଭୟ ଘରୋଇ ଓ ସରକାରୀ ଭାବେ ମାଗଣା ନମୂନା ପରୀକ୍ଷଣ ପାଇଁ ଅଧିକ ସଂଖ୍ୟକ ପରୀକ୍ଷା କେନ୍ଦ୍ର ସ୍ଥାପନ ଏବଂ ପ୍ରତିଷେଧକ ଉପକରଣ, ମାସ୍କ ଓ ଅନ୍ୟ ଉପକରଣ ଉପଲବ୍ଧ କରାଇବା ଦିଗରେ କେନ୍ଦ୍ର ସରକାର ପଦକ୍ଷେପ ନିଅନ୍ତୁ। ବୋଲି ନବୀନ କହିଥିଲେ।
ଏଥିସହିତ କରୋନା ସଂକ୍ରମଣକୁ ଦୃଷ୍ଟିରେ ରଖି ମନରେଗା ଶ୍ରମିକମାନଙ୍କୁ ଅତିକମରେ ୫୦ଦିନର ମଜୁରୀ ପ୍ରଦାନ, ଜାତୀୟ ଖାଦ୍ୟ ସୁରକ୍ଷା ଆଇନର ହିତାଧିକାରୀଙ୍କୁ ଆର୍ଥିକ ସହାୟତା ସହ ଚାଷୀଙ୍କ ପାଇଁ ଉଦ୍ଦିଷ୍ଟ ପିଏମକିଷାନର ଅତିରିକ୍ତ କିସ୍ତି, ନିର୍ମାଣ ଶ୍ରମିକ ଓ ଅନ୍ୟାନ୍ୟ କ୍ଷେତ୍ର ନିମନ୍ତେ ଆର୍ଥିକ ପ୍ୟାକେଜ୍ ଆଦି ନିମନ୍ତେ କେନ୍ଦ୍ର ସରକାର ଆଗୁଆ ଅର୍ଥ ପ୍ରଦାନ କରନ୍ତୁ ବୋଲି  ନବୀନ ଦାବି କରିଥିଲେ।
ଏହି ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ର ସରକାରଙ୍କ ଦ୍ୱାରା ବିଦେଶ ଗସ୍ତ ଉପରେ କଟକଣା, ପ୍ରଭାବିତ ଅଞ୍ଚଳରୁ ଭାରତୀୟଙ୍କୁ ବିମାନରେ ସ୍ୱଦେଶ ଅଣାଯିବା ଓ କରୋନା ମୁକାବିଲା ପାଇଁ ରାଜ୍ୟ ବିପର୍ଯ୍ୟୟ ପାଣ୍ଠିରୁ ଅର୍ଥ ଉପଯୋଗ ନିମନ୍ତେ କେନ୍ଦ୍ର ସରକାରଙ୍କ ନିଷ୍ପତ୍ତିକୁ ପ୍ରଶଂସା ମଧ୍ୟ କରିଥିଲେ।

 

ଏହି ଭିଡିଓ କନଫରେନ୍ସିଂରେ ରାଜ୍ୟ ମୁଖ୍ୟ ସଚିବ ଅସିତ୍ କୁମାର ତ୍ରିପାଠୀଙ୍କ ସମେତ ରାଜ୍ୟର ସମସ୍ତ ବରିଷ୍ଠ ପଦାଧିକାରୀମାନେ ଉପସ୍ଥିତ ଥିଲେ।

You might also like