ଦୀର୍ଘ ୧୦ ମାସ ପରେ ଖୋଲିଲା ଅଙ୍ଗନୱାଡ଼ି : କୁନି ପିଲାଙ୍କ ପାଟିତୁଣ୍ଡ ଶୁଣି ଭାବବିହ୍ୱଳ ହେଲେ ଦିଦି

ବାରିପଦା(ମାନିକ ଲାଲ୍ ପାଣି): ଖୋଲିଲା ଅଙ୍ଗନୱାଡ଼ି କେନ୍ଦ୍ର। ପ୍ରାୟ ୧୦ ମାସ ବନ୍ଦ ରହିବା ପରେ ଆଜିଠୁ ରାଜ୍ୟରେ ଥିବା ବିଭିନ୍ନ ଅଙ୍ଗନୱାଡ଼ି କେନ୍ଦ୍ର ଖୋଲିଲା। ଅନେକ ଦିନର ବ୍ୟବଧାନ ପରେ ଶିଶୁଙ୍କୁ ପାଇ ଉଠୁଛି ପଡ଼ୁଛି ଅଙ୍ଗନୱାଡ଼ିର ଚାରି କାନ୍ଥ। ଆଉ ପୁଣି ଥରେ କୁନି କୁନି ପିଲାଙ୍କୁ ପାଖରେ ପାଇଁ ଭାବବିହ୍ୱଳ ହୋଇ ପଡ଼ିଛନ୍ତି ଅଙ୍ଗନବାଡ଼ି ଦିଦି ଓ ସହାୟିକା । ତେବେ ସମସ୍ତ କଟକଣା ମାନି ଅଙ୍ଗନୱାଡ଼ି କେନ୍ଦ୍ରକୁ ପ୍ରବେଶ କରିଛନ୍ତି କୁନି କୁନି ଶିଶୁ ।

ବାରିପଦା ତଖତପୁରର ଅଙ୍ଗନବାଡ଼ିର ଅଭୂତପୂର୍ବ ଦୃଶ୍ୟ। ଅନେକ ଦିନ ପରେ ଶିଶୁଙ୍କୁ ପାଟିତୁଣ୍ଡରେ ଫାଟି ପଡ଼ୁଛି ଅଙ୍ଗନୱାଡ଼ି କେନ୍ଦ୍ର। କରୋନା କଟକଣା ଯୋଗୁଁ ଦୀର୍ଘ ଦଶ ମାସ ପରେ ପୁଣି ମା’ ମାନେ ନିଜ ନିଜ ଶିଶୁଙ୍କୁ ଧରି ଆସିଛନ୍ତି ଅଙ୍ଗନବାଡ଼ି। ପୂର୍ବରୁ ଏଥିପାଇଁ ସମସ୍ତ ପ୍ରକାର ଆନୁସାଙ୍ଗିକ ପ୍ରସ୍ତୁତି ଶେଷ ହୋଇଥିଲେ ସୁଦ୍ଧା, ଗତ କାଲି ଅଙ୍ଗନୱାଡ଼ି କେନ୍ଦ୍ର ସାନିଟାଇଜ୍ କରିଥିଲେ ଦିଦି। ଆଜି ସକାଳ ନଅଟାରେ ଶିଶୁ ମାନେ ଆସିବା ପରେ ଖୁସିରେ ପୂରି ଉଠିଥିଲା ଅଙ୍ଗନବାଡ଼ି କେନ୍ଦ୍ର ।

ପ୍ରତିଦିନ ପରି କିଛି ସମୟ ପାଠ ପଢ଼ିବା ପରେ ଆଜି ବି ପିଲା ମାନଙ୍କର ହାତ ଧୋଇ ଦେଇ ପୁଣି ପୃଷ୍ଟିକର ଖାଦ୍ୟ ପରସା ଯାଇଥିଲା। କୁନି କୁନି ପିଲାଙ୍କ ପାଇଁ ପୂର୍ବରୁ ଡାଲମା ,ଭାତ, ଲେମ୍ବୁ ରସ ସହ ସିଝା ଅଣ୍ଡା ଆଦି ଖାଦ୍ୟ ତିଆରି ହୋଇଥିଲା। ଅନେକ ଦିନ ପରେ ସାଙ୍ଗସାଥୀ ମେଳରେ ପୁଣି ଥିରେ ସାମୁହିକ ଭୋଜନର ଆନନ୍ଦ ନେଲେ କୁନି କୁନି ଶିଶୁ ।

ସେପଟେ ଫେବ୍ରୁଆରୀ ଗାଇଡ ଲାଇନ୍ ଅନୁଯାୟୀ ଆଜି ରାଜ୍ୟର ବିଭିନ୍ନ ସ୍ଥାନରେ ଅଙ୍ଗନୱାଡି କେନ୍ଦ୍ର ଖୋଲିଛି। ଏନେଇ ମହିଳା ଓ ଶିଶୁ ବିକାଶ ଓ ମିଶନ ଶକ୍ତି ବିଭାଗ ପକ୍ଷରୁ ପୂର୍ବରୁ ସୂଚନା ଦିଆଯାଇଥିଲା। କରୋନା ମହାମାରୀ ଯୋଗୁଁ ଗତ ମାର୍ଚ୍ଚ ମାସରୁ ଅଙ୍ଗନୱାଡି କେନ୍ଦ୍ର ବନ୍ଦ କରିଦିଆଯାଇଥିଲା। ଆଉ ସେହି ସମୟରେ ଘରକୁ ଘର ଯାଇ ରନ୍ଧା ଖାଦ୍ୟ ଓ ଅଣ୍ଡା ଯୋଗାଇ ଦିଆଯାଉଥିଲା ।

ତେବେ ଅଙ୍ଗନୱାଡ଼ି ଖୋଲିବା ପରେ କୌଣସି ସ୍ଥାନରେ କରୋନା ସଂକ୍ରମଣ ଦେଖା ଦେଲେ, କେନ୍ଦ୍ର ସରକାରଙ୍କ ଗାଇଡଲାଇନ ମାନି ଜିଲ୍ଲାପାଳ ବା ସ୍ଥାନୀୟ କର୍ତ୍ତୃପକ୍ଷ କଣ୍ଟେନମେଣ୍ଟ ଜୋନ ଘୋଷଣା କରିପାରିବେ। ସଂକ୍ରମଣର ଆଶଙ୍କା ଥିଲେ ସ୍ୱତନ୍ତ୍ର ଧ୍ୟାନ ଦେବା ସହ ସେଚତନ ରହିବା ପାଇଁ ଅଙ୍ଗନୱାଡ଼ି ଦିଦି ମାନଙ୍କୁ ନିର୍ଦ୍ଦେଶ ଦିଆଯାଇଛି।ଅଙ୍ଗନୱାଡି କେନ୍ଦ୍ର ସକାଳ ୯ଟାରୁ ୧୧ଟା ପର୍ଯ୍ୟନ୍ତ ଖୋଲାଯିବ। ଏଥିରେ ପିଲାମାନଙ୍କୁ ୬ ଫୁଟ ଦୂରରେ ସାମାଜିକ ଦୂରତା ସହ ବସାଇବାକୁ କୁହାଯାଇଛି।

You might also like