କରୋନା ସଂକ୍ରମଣ ରୋକିବା ଲାଗି ଓଡ଼ିଶା ସରକାରଙ୍କ ନୂଆ ଗାଇଡ୍‌ଲାଇନ୍ସ, କଡ଼ାକଡ଼ି ପାଳନ ଲାଗି ନିର୍ଦ୍ଦେଶ

ଭୁବନେଶ୍ୱର: ରାଜ୍ୟରେ ଦିନକୁ ଦିନ କରୋନା ସଂକ୍ରମଣ ବଢୁଥିବାରୁ ଏଥିରୁ ରକ୍ଷା ପାଇବା ଲାଗି ରାଜ୍ୟ ସରକାର ନୂଆ ଗାଇଡ୍‌ଲାଇନ୍ସ ଜାରି କରିଛନ୍ତି। ଜାରି ହୋଇଥିବା ଗାଇଡ୍‌ଲାଇନ୍‌କୁ କଡ଼ାକଡ଼ି ପାଳନ କରିବା ଲାଗି ସରକାରଙ୍କ ପକ୍ଷରୁ ନିର୍ଦ୍ଦେଶ ଦିଆଯାଇଛି।

ସମସ୍ତ ସରକାରୀ ବିଭାଗ ଓ କାର୍ଯ୍ୟାଳୟରେ ସାମାଜିକ ଦୂରତା ବଜାୟ ରଖିବା ଲାଗି ସରକାରଙ୍କ ପକ୍ଷରୁ ଏହି ନିୟମାବଳୀରେ ନିର୍ଦ୍ଦେଶ ଦିଆଯାଇଛି।

  • ଅଫିସର ସମସ୍ତ କର୍ମଚାରୀ ଓ ଅଧିକାରୀ ଡ୍ୟୁଟି ସମୟରେ ମାସ୍କ ପିନ୍ଧିବା ବାଧ୍ୟତାମୂଳକ କରାଯାଇଛି। ଏଥିରେ ଖିଲାପ କଲେ  କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
  • ସେହିପରି ଅଫିସରେ ବସିବା ବେଳେ ସାମାଜିକ ଦୂରତା ଯେପରି ନିଶ୍ଚୟ ବଜାୟ ରହିବ, ତାକୁ ସମସ୍ତେ ପ୍ରାଧାନ୍ୟ ଦେବେ। ବିଭାଗୀୟ ଡ୍ରାଇଭର , ସୁରକ୍ଷାକର୍ମୀ ଓ ଜଗୁଆଳି ସମସ୍ତେ ମାସ୍କ ପିନ୍ଧିବେ। ନିୟମିତ ହାତ ଧୋଇବେ ଓ ସାମାଜିକ ଦୂରତା ନିଶ୍ଚିତ ବଜାୟ ରଖିବାକୁ ଏଥିରେ କୁହାଯାଇଛି।
  • ସେହିପରି ଅଫିସ ପରିସରରେ ଛେପ ପକାଇବା ସମ୍ପୂର୍ଣ୍ଣ ନିଷେଧ କରାଯାଇଛି। ଏହା କର୍ମଚାରୀ ଓ ଭିଜିଟରଙ୍କ ପାଇଁ ମଧ୍ୟ ଲାଗୁ ହେବ। ଯଦି କେହି ଏହାର ଖିଲାପ କରନ୍ତି, ତେବେ ସେମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
  • ସ୍ୱାସ୍ଥ୍ୟଗତ ସମସ୍ୟା ଥିବା ବୟସ୍କ କର୍ମଚାରୀ, ଗର୍ଭବତୀ କର୍ମଚାରୀ ସାଧାରଣ ଲୋକଙ୍କ ସଂସ୍ପର୍ଶରେ ନ ଆସିବାକୁ କୁହାଯାଇଛି। ଅଫିସରେ ଲିଫ୍ଟ ବ୍ୟବହାର ନ କରି ଶିଢ଼ିରେ ଯିବାକୁ ପରାମର୍ଶ ଦିଆଯାଇଛି। ସବୁବେଳେ ହାତ ଲାଗୁଥିବା ଉପକରଣକୁ ସର୍ବଦା ସାନିଟାଇଜ ହେବ।
  • ଓ୍ୱାର୍କଷ୍ଟେସନ,keyboard, ଟେଲିଫୋନ୍, ଶିଢ଼ି ରେଲିଂ, ଡୋର୍‌ ହ୍ୟାଣ୍ଡେଲ ଆଦି ସ୍ଥାନକୁ ସାବୁନ କିମ୍ବା ବିଶୋଧକ ସାମଗ୍ରୀରେ ସଫା ହେବ। ଯଥା ସମ୍ଭବ ଅନ୍ୟର ମୋବାଇଲ୍, ଡେସ୍କ ଓ ଅନ୍ୟ ବ୍ୟବହାର ସାମଗ୍ରୀ ଠାରୁ ଦୂରେଇ ରହିବାକୁ ପରାମର୍ଶ।
  • ଲିଫ୍ଟ ଭିତରେ ୪ରୁ ଅଧିକ ଲୋକ ଯିବାକୁ ବାରଣ କରାଯାଇଛି।